Omayeletumbulo 26:1-28
26 Ngaashi olumi* pefimbo lokwenye nodula pefimbo leteyo,Efimano itali dulu okupewa elai.
2 Ngaashi ashike okadila ihaka tuka oduduluka, ile okaandilili ihaka ingaana epwanga,Efingo nalo ihali uya nopehe na etomheno lasha.*
3 Onghambe ohai wilikwa nongola, ondongi onoshitomo,Noshimwati ohashi dengifwa kombuda yomalai.
4 Ino nyamukula elai she likolelela koulai walo,Opo uhe litule pondodo yalo.*
5 Nyamukula elai she likolelela koulai walo,Opo liha diladile kutya oli na eendunge.
6 Ngaashi omunhu oo ta lemaneke omhadi yaye nokulimonifa oshiponga ye mwene,*Omunhu oo te lineekelele elai oinima naye osho e li.
7 Ngaashi oshilema tashi shongola,*Eyeletumbulo lelai nalo osho li li.
8 Okumangela emanya koshiumbifoOsha fa okufimaneka elai.
9 Ngaashi oshitai shomakiya shi li meke longholwe,Eyeletumbulo lelai nalo osho li li.
10 Ngaashi omuumbi wouta ta umbaumba momhepo,*Oo ta kutu elai, ile ovo tava ende pondjila navo osho ve li.
11 Elai olo hali endulula oulai walo,Ola fa ombwa tai shuna konghungo yayo.
12 Oshixwepo okukwafela elai,
Shi dulife okukwafela oo ta diladila kutya omunaendunge.
13 Omukwandede ota ti: “Mondjila omu na onghoshi yonyasha,Mehalandjadja omu na onghoshi!”
14 Ngaashi omuvelo hau ningi wa yeuluka wa idile omolwomakandula,Omukwandede naye oha kala ta tanauka e li kombete.
15 Omukwandede ota tula onyala yaye moshiyaxa shoitendele,Ndele ota nyengwa oku i kufa mo e i shunife kokanya kaye.
16 Omukwandede oha diladila kutya omunaendungeE dule ovanhu vaheyali, ovo hava nyamukula pandunge.
17 Ngaashi omunhu oo ta kwata ombwa komatwi,Omunhu oo ta ende po, ndele ta handukifwa* keenhamanana dihe fi daye naye osho e li.
18 Ngaashi omunhu oo ta umbu oikuti ya xwama omundilo notai dipaa,*
19 Omunhu oo ta kengelele mukwao, ndele ta ti, “Onda li ashike handi ningi omashendjo,” naye osho e li.
20 Ngeenge kape na oikuni, omundilo otau dimi po,Naapo pehe na omulundili, itapa kala eenhangu.
21 Ngaashi omakala taa xwameke omakala makwao noikuni yomundilo,Omunhu oo e hole eenhamanana naye oha tukulula eenhangu.
22 Eendjovo domulundili odi li ngaashi oikulya tai tokola elaka;*Ohadi ponwa hamudilu da yukilila medimo.
23 Ngaashi oshiyuma sha vaekwa oshisilveri,Eendjovo dohole tadi di* momutima u na omauko mai nado osho di li.
24 Omunhu oo e tonde vakwao ihe shi holola nomilungu daye,Ndele meni laye omu yadi oukengeleledi.
25 Nonande oha popi eendjovo diwa, ino mu lineekela,Molwaashi momutima waye omu na oinima iheyali itondifa.*
26 Nonande outondwe waye owa hondama omolwoukengeleledi,Owii waye otau ka nyanekwa pomutenya meongalo.
27 Omunhu oo ta fe elambo ota ka wila mo,Naao ta undula po emanya . . . otali ke mu wila vali.
28 Elaka li na oipupulu oli tonde ovo tava ehamekwa kulo,Nokanya taka popi eendjovo domaheka otaka etifa ehanauno.
Eshangelo lopedu
^ Ile “o-snow.”
^ Ile tashi dulika, “Efingo itali ku hange ino li lilongela.”
^ Ile “Opo uha faafane nalo.”
^ Eln., “nokunwa oukolokoshi.”
^ Ile “ndoveke.”
^ Ile “ta ehameke keshe umwe.”
^ Ile tashi dulika, “te lidopo”
^ Ile “oikuti yefyo.”
^ Ile “ngaashi oinima tai ponwa hamudilu.”
^ Eln., “Omilungu tadi ulike ohole.”
^ Ile “Molwaashi omutima waye outondifa filufilu.”
