Omapsalme 21:1-13
Komuwiliki. Eimbilo laDavid.
21 Omwene Jehova, ohamba oya nyakukwa omolweenghono doye;Oya hafa unene omolwoilonga yoye yexupifo.
2 Owe i wanifila po omahalo omutima wayo,Noino i anyena osho ya pula nomilungu dayo. (Sela)
3 Osheshi owe i pa omanangeko noupuna mahapu;Owe i dika oshikoroni shoshingoli elela* komutwe wayo.
4 Oye ku pula omwenyo, ndele owe i u pa,Omwenyo mule,* alushe fiyo alushe.
5 Oilonga yoye yexupifo otai i etele efimano linene.
Owe i dika etumbalo nosho yo efimano.
6 Owe i nangeka noupuna fiyo alushe;Owe i hafifa nehafo lokukala po* kwoye.
7 Osheshi ohamba oye lineekela muJehova;Omolwohole i na oudiinini yOmukombadambada, itai tengauka nandenande.*
8 Eke loye otali ka hanga ovatondi voye aveshe;Eke loye lokolulyo otali ka hanga ovo ve ku tonde.
9 Oto ke va ninga ngaashi ediko la hanya peufwafimbo loye, eshi to ke va katukila onghatu.
Jehova ote ke va pona po mehandu laye, nomundilo otau ke va lungwinifa po.
10 Oludalo* lavo oto ke li hanauna po kombada yedu,Nosho yo oludalo lalo, olo la dja movana vovanhu.
11 Osheshi ova halelela oku ku ningila owii;Ova pangela eemhangela, odo itadi ka pondola.
12 Osheshi oto ke va ningifa va ye onhapoMoku va shoneka nouta* woye.
13 Omwene Jehova, fikama, u ulike eenghono doye.
Omolweenghono doye dinene, ohatu ke ku imbila omaimbilohambelelo.*
Eshangelo lopedu
^ Ile “sha hemunwa.”
^ Eln., “Omafiku male.”
^ Eln., “loshipala.”
^ Ile “itai pungauka nandenande (funga).”
^ Eln., “Oiimati.”
^ Eln., “ofipa youta.”
^ Eln., “imba nokushika omusika.”
