Numeri 17:1-13
-
Edidiliko tali hololwa kodibo yaAron, eshi ya tutuma (1-13)
17 Jehova okwa tya kuMoses:
2 “Popya nOvaisrael, ndele tave ku pe odibo yepata keshe, tai di kelenga lepata keshe, eedibo adishe kumwe odi na okukala 12. Shanga edina lakeshe umwe kodibo yaye.
3 Ou na okushanga edina laAron kodibo yaLevi, molwaashi odibo imwe oi lile po omutwe wepata keshe.
4 Eedibo odo ou na oku di tula metwali lokwoongalela popepi noshikefa shOipelende yOumbangi, opo handi ku lihololele pandjikilile.
5 Odibo yomulumenhu oo handi hoolola otai ka tutuma, nohandi ka mweneka Ovaisrael ovo tava ngongotele nge, notave mu ngongotele yo.”
6 Onghee Moses okwa popya nOvaisrael, nomalenga aeshe okwe mu pa eedibo, odibo yelenga lepata keshe, eedibo 12, nodibo yaAron oya li mokati keedibo davo.
7 Opo nee Moses okwa tula eedibo odo koshipala shaJehova metwali omo mu na oshikefa shOipelende yOumbangi.
8 Mefiku la shikula ko, eshi Moses a ya metwali omo mu na oshikefa shOipelende yOumbangi, tala, odibo yaAron, yomeumbo laLevi, oya li ya tutuma, ya tula ko eenhemo, ya ninga eengala noya ima ee-almond da pya.
9 Opo nee Moses okwa kufa po eedibo adishe koshipala shaJehova, nokwe di etela Ovaisrael aveshe. Ove di tala, nomulumenhu keshe okwa kufa po odibo yaye.
10 Jehova okwa lombwela Moses, a ti: “Shuna odibo yaAron koshikefa shOipelende yOumbangi i kale edidiliko lovanashibofa, opo okungongotela nge kwavo ku xule po, novaha fye.”
11 Moses okwa ninga divadiva ngaashi Jehova e mu lombwela. Osho naanaa a ninga.
12 Opo nee Ovaisrael ova tya kuMoses: “Paife ohatu fi, ohatu xulu po filufilu, atushe ohatu ka xula po filufilu!
13 Keshe oo te uya popepi netwalihangano laJehova ota ka fya! Mbela osho ashike tu na okufya ngaho?”
