Nehemia 6:1-19
6 Diva eshi Sanballat, Tobia, Gesem Omuarabia novatondi vetu aveshe va lombwelwa kutya onda tungulula ekuma nonokutya kala li la fyaala ombululu, (nonande pefimbo opo kanda li nda tula po omivelo),
2 Sanballat naGesem ova tumina nge diva etumwalaka eli, tali ti: “Ila tu tulei po efimbo tu shakeneni pomikunda, odo di li mOluhaela lomEfilu laOno.” Ashike ova li tava pangele omhangela va ningile nge owii.
3 Onghee onde va tumina ovatumwa, nda ti: “Ame ohandi kufa ombinga moilonga inene, noitandi dulu okudja po. Omolwashike oilonga i na okukanghama noku i fiya po ndi uye kunye?”
4 Ova tumina nge etumwalaka la faafana oikando ine, noshikando keshe, onde va pa enyamukulo la faafana.
5 Opo nee Sanballat okwa tumina nge omupiya waye oshikando oshititano, e na etumwalaka la faafana, nonhumwafo ya patuluka i li meke laye.
6 Oya li ya shangwa ngaha: “Osha udika mokati koiwana, na Gesem ote shi popi yo kutya ove nOvajuda otamu pangele omhangela mu tukule ounashibofa. Nomolwaasho to tungu ekuma; she likolelela komahokololo oo, oove to ningi ohamba yavo.
7 Natango, owa nangeka po ovaprofeti va shiivife kombinga yoye muJerusalem ashishe kutya: ‘MuJuda omu na ohamba!’ Paife oinima ei otai ka lombwelwa ohamba. Onghee, ila, tu shi kundafaneni pamwe.”
8 Ashike onde mu tumina enyamukulo eli: “Kape na nande oshimwe shomoinima, oyo wa popya, sha ningwa; owe i tota ashike ove mwene.”*
9 Aveshe ova li tava kendabala oku tu tilifa, tava ti: “Omake avo otaa ka loloka koilonga, noitai ka pwa.” Paife, ohandi ilikana, Kalunga, pameka omake ange.
10 Opo nee onda ya keumbo laShemaia, omonamati waDelaia, omonamati waMehetabel, pefimbo olo a li iha di mo meumbo laye. Okwa ti: “Tu tule po efimbo tu shakene keumbo laKalunga kashili motembeli, ndele hatu idile omivelo dotembeli, molwaashi otave uya ve ku dipae. Otave uya ve ku dipae oufiku.”
11 Ndele onda tya: “Mbela omulumenhu ngaashi ame ota dulu ngoo okuya onhapo? Mbela omulumenhu ngaashi ame ota dulu tuu okuya motembeli, ndele ta kala e na omwenyo? Itandi i mo!”
12 Opo nee onda didilika kutya Kalunga kashili ine mu tuma, ndele Tobia naSanballat ovo ve mu futa a popye exunganeko olo li li omhinge naame.
13 Okwa li a kutwa, opo a tilife nge noku nyonife nge, opo va kale ve na omatomheno okunyona po edina lange liwa nokusheka nge.
14 Kalunga kange, dimbuluka Tobia, Sanballat, oilonga ei nosho yo Noadia, omuprofeti omukainhu, novaprofeti aveshe, ovo va li alushe hava kendabala okutilifa nge.
15 Onghee ekuma ola li la pwa mo 25 aElul,* moule womafiku 52.
16 Diva eshi ovatondi vetu ve shi uda noiwana aishe oyo ye tu dingilila ye shi mona, ova li va fya ohoni neenghono nova li va mona kutya oilonga oyo oya pwa ashike kekwafo laKalunga ketu.
17 Pefimbo olo, omalenga omuJuda okwa li haa tumine Tobia eenhumwafo, na Tobia okwa li he di nyamukula.
18 Vahapu muJuda ova li va ana kutya otava kala tave mu yambidida, molwaashi okwa li oshitenya shaSekania, omonamati waArah, nomonamati waJohanan okwa li a hombola omonakadona waMesullam, omonamati waBerekia.
19 Natango, ova li hava lombwele nge alushe oinima iwa kombinga yaye nohave mu lombwele osho nda popya. Opo nee Tobia oha tumu eenhumwafo a tilife nge.
