Nehemia 5:1-19
5 Ovashamane novakulukadi vavo ova li tava lilaana mokule omolwovamwaina Ovajuda.
2 Vamwe ova li tava ti: “Otuvahapu fye novana vetu ovamati noukadona. Otwa pumbwa oikulya, opo tu kale nomwenyo.”
3 Vakwao ova li tava ti: “Fye ohatu yandje po omapya etu, oikunino yomandjebele nomaumbo etu i li onga eshilipaleko tu mone oikulya pefimbo londjala.”
4 Natango, vamwe ova li tava ti: “Ohatu ningi omapya noikunino yetu yomandjebele eshilipaleko lokukalela po omikuli doimaliwa, odo hatu li, opo tu fute eemhale* dohamba.
5 Fye ombelela nohonde imwe novamwameme,* novana vavo ongaashi ashike ovana vetu, ndele ohatu fininikwa tu yandje ovanamati novanakadona vetu moupika, novana vetu vamwe oukadona ove li nale moupika. Ashike katu na eenghono dokuxulifa po oshinima eshi, molwaashi omapya etu noikunino yetu yomandjebele oya ninga po yavamwe.”
6 Onda handuka neenghono, eshi nda uda ekemo lavo nosho yo eendjovo odo.
7 Onghee onda kala handi diladila oinima oyo momutima wange nonda tangunina omalenga novapangeli veendodo dopedu, nda ti: “Keshe umwe womunye ota pula mumwaina oishoshela.”
Onda unganeka oshoongalele shinene omolwavo.
8 Onda tya kuvo: “Otwa ninga ngaashi hatu dulu, opo tu lande ko ovamwameme Ovajuda, ovo va li va landifwa po koiwana imwe; ndele mbela omu na vali okulandifa po ovamwanyoko, notu na vali oku va landa kunye, opo va kale va manguluka?” Okudja opo, ova kala va mwena noinava nyamukula sha.
9 Onda ti vali: “Osho tamu ningi kashiwa. Mbela kamu na okuulika etilokalunga mukeshe osho tamu ningi,* opo oiwana, ovatondi vetu, ihe tu sheke?
10 Shikwao vali, ame, ovamwameme novapiya vange ohatu va pe oimaliwa noikulya. Onghee hano, natu efei po oku va pula oishoshela mwaasho twe va pa.
11 Alikana, shunifeni nena kuvo omapya avo, oikunino yavo yomandjebele, omiti davo deemono nomaumbo avo. Shunifeni oishoshela* yoimaliwa, yoikulya, yomaviinyu mape noyomaadi, oyo hamu va pula.”
12 Ova nyamukula va ti: “Fye ohatu ke va shunifila oinima oyo, noitatu ka pula sha kuvo. Ohatu ka ninga naanaa ngaashi wa popya.” Opo nee onda ifana ovapristeri nonda anifa ovalumenhu ovo va wanife po eudaneko lavo.
13 Konima yaasho, onda tukumuna oshikutu shange, ndele handi ti: “Kalunga kashili naye na tukumune mo ngaha momaumbo eni omulumenhu keshe, oo ita wanifa po eudaneko laye, a kale kokule nomaliko aye. Kalunga ote ke mu tukumuna mo ngaha, opo a kale hamakasha.” Opo nee eongalo alishe ola ti: “Amen!”* Ova hambelela Jehova, novanhu aveshe ova wanifa po eudaneko lavo.
14 Shikwao vali, okudja ngoo kefiku olo ohamba ya nangeka nge po ndi ninge ngoloneya wavo moshitukulwa shaJuda, okudja momudo 20 fiyo 32 wepangelo lohamba Artasasta, sha hala okutya, omido 12, ame nosho yo ovamwameme inatu lya oikulya, oyo i na okupewa ngoloneya.
15 Ashike oongoloneya, ovo va tetekela nge, ova li va twika ovanhu omutengi nova li have va kufa eesekeli* doisilveri 40 efiku keshe va ka lande omungome nomaviinyu. Natango, ovapiya vavo ova li hava fininike ovanhu. Ashike ame inandi shi ninga, molwaashi ohandi tila Kalunga.
16 Onda kufa yo ombinga moilonga yokutunga, noinatu kufa eehepele omapya ado. Ovapiya vange aveshe ova li yo tava longo.
17 Onda li handi li pamwe nOvajuda 150, ovapangeli veendodo dopedu nosho yo vamwe ovo ve uya kufye va dja moiwana.
18 Efiku keshe, onda li handi lande ongobe yomhedi, eedi hamano da ondoka noudila, i tu longekidilwe, nopa li yo hapa etwa omaviinyu mahapu omaludi aeshe mefiku etimulongo keshe. Ashike nande ongaho, inandi kala handi pula oimaliwa yoikulya, oyo i na okupewa ngoloneya, molwaashi ovanhu ova li va wililwa po nale koilonga yavo.
19 Kalunga kange, alikana, ino dimbwa nge; nangeke nge noupuna omolwaaishe oyo nda ninga omolwoshiwana eshi.
Eshangelo lopedu
^ Ile “eefuto odo da li hadi pewa eehamba.”
^ Eln., “ombelela yovamwameme oi li ngaashi ombelela yetu.”
^ Eln., “okweenda mokutila Kalunga ketu.”
^ Eln., “oshitifele,” tashi ulike kopresenda imwe yoishoshela komwedi.
^ Ile “Nashi kala ngaho!”
^ Osekeli imwe oi fike peegrama 11,4. Tala Oshiwedelwako B14.
