Levitikus 6:1-30
6 Jehova okwa lombwela Moses, a ti:
2 “Ngeenge umwe* okwa nyono nokwa kala ehe fi omudiinini kuJehova mokukengelela omushiinda shaye shi na sha noshinima osho a li e lineekelelwa, ile noshinima osho a li a tuvikilifwa, ile a nyeka, ile a kengelela omushiinda shaye,
3 ile ngeenge okwa toola sha, ndele te shi holeke po, nongeenge okwa ningi eano loipupulu moshinima keshe osho tashi dulika a nyona, oku na okuninga ngaha:
4 Ngeenge okwa nyona, nokwa kala e na etimba, oku na okushunifa osho a vaka, osho a nyokoma, osho a kufa moukengeleledi, osho a li e lineekelelwa, ile osho a toola sha kana,
5 ile keshe osho a ningila eano loipupulu, oku na oku shi futa pauyadi, noku na okuweda ko oshititano shongushu yasho. Oku na oku shi yandja kumwene washo mefiku olo a monika etimba.
6 Ota ka yandja komupristeri odi yondume ya koshoka ya dja moufita waye, i li elivelombediyambo laye kuJehova, she likolelela kongushu oyo ya tengenekwa, i na sha nelivelombediyambo.
7 Omupristeri ote ke mu koshola koshipala shaJehova, nota ka diminwa po keshe osho tashi dulika she mu ningifa a kale e na etimba.”
8 Jehova okwa twikila okulombwela Moses, ta ti:
9 “Lombwela Aron novanamati vaye, to ti, ‘Omhango i na sha nexwikiloyambo oyo ei: Exwikiloyambo oli na okukala pomundilo koaltari oufiku aushe fiyo ongula, nomundilo ou na okukalekwa wa tema koaltari.
10 Omupristeri ota ka djala oikutu yoliina youpristeri, nota ka djala oumbulukweva vaxupi* voliina. Ota ka kufa ko omute* wexwikiloyambo olo la xwikwa po komundilo koaltari, ndele te u tula pomunghulo woaltari.
11 Opo nee ota ka kufa mo oikutu yaye nokudjala oikutu ikwao, ndele ta twala omute ponhele ya yela kondje yonhanda.
12 Omundilo ou na okukalekwa wa tema koaltari. Kau na okudima. Omupristeri oku na okutema ko noikuni ongula keshe nokutula ko exwikiloyambo, nokuxwikila ko oinghene yomayambo oukumwe.
13 Omundilo ou na okukalekwa alushe wa tema koaltari. Kau na okudima.
14 “‘Omhango i na sha neendjayambo oyo ei: Nye ovanamati vaAron omu na oku di yandja koshipala shaJehova komesho yoaltari.
15 Umwe womuvo na kufe eshambekela loufila wa nakwa nawa weendjayambo nomaadi amwe ao neka alishe ledimba liwa, olo li li meendjayambo, note ke i xwikila koaltari i li edimba liwa* li lile po eyambo alishe* kuJehova.
16 Aron novanamati vaye otava ka lya osho sha xupa po. Otashi ka lilwa monhele iyapuki ngaashi omungome inau ya efulika. Otave ke shi lila moshihale shetwali lokwoongalela.
17 Kashi na okutelekwa noshinima keshe sha ya efulika. Onde shi yandja shi li oshitukulwa shavo sha dja momayambo ange, oo a yambwa okupitila momundilo. Oshi li oshinima shiyapuki elela ngaashi etimbayambo nongaashi elivelombediyambo.
18 Ovanamati vaAron aveshe otave ke shi lya. Oshi li oshitukulwa shavo shaalushe komapupi eni aeshe sha dja momayambo aJehova, oo a yambwa okupitila momundilo. Keshe shimwe osho tashi a kumu* otashi kala shiyapuki.’”
19 Jehova okwa popya vali naMoses, a ti:
20 “Eyambo eli olo Aron novanamati vaye tava ka yandja kuJehova mefiku olo ta vaekwa: oshitimulongo shoefa* shoufila wa nakwa nawa, u li eendjayambo odo hadi yandjwa pandjikilile, etata lao otali yandjwa ongula, netata likwao lao okomatango.
21 Oli na okutelekwa nomaadi moshipana. Ou na oku li eta la pilulilwa nawa omaadi, noto ke li yandja moipambu li li eendjayambo da telekwa di li edimba liwa* kuJehova.
22 Omupristeri, a vaekwa, oo te ke mu pingena po okudja movanamati vaye, oye te ke li yamba. Oyo onghedimhango yaalushe. Eyambo alishe olo otali ka xwikilwa Jehova.
23 Eendjayambo domupristeri adishe odi na okuxwikwa po filufilu. Kadi na okuliwa.”
24 Jehova okwa popya vali naMoses, a ti:
25 “Lombwela Aron novanamati vaye kutya omhango i na sha netimbayambo oyo ei: Ponhele opo hapa dipaelwa oshinamwenyo shexwikiloyambo, opo yo pe na okudipaelwa oshinamwenyo shetimbayambo koshipala shaJehova. Oshi li oshinima shiyapuki elela.
26 Omupristeri oo e shi yamba omolwetimba ote ke shi lya. Otashi ka lilwa monhele iyapuki, moshihale shetwali lokwoongalela.
27 “‘Keshe shimwe osho sha kuma ombelela yasho otashi kala shiyapuki, nongeenge umwe okwa shamine ohonde yasho imwe koshikutu shaye, osho sha shaminwa nohonde ou na oku shi koshela monhele iyapuki.
28 Ombiya yedu omo sha li sha fulukifilwa oi na okutataulwa po. Ashike ngeenge osha li sha fulukifilwa mombiya yoshivela,* ombiya oyo oi na okukweywa nokukoshwa nomeva.
29 “‘Omulumenhu keshe womovapristeri ote ke shi lya. Oshi li oshinima shiyapuki elela.
30 Ashike oshinamwenyo shetimbayambo kashi na okuliwa, ngeenge ohonde yasho imwe oya twalwa metwali lokwoongalela i ka kosholifwe onhele iyapuki. Oshi na okuxwikwa po momundilo.
Eshangelo lopedu
^ Ile “omwenyo.”
^ Ile “oumbulukweva vokoshi.”
^ Ile “omute womaadi,” sha hala okutya, omute oo wa ndodelwa komaadi omaxwikiloyambo.
^ Ile “tali udifa nawa; tali tulumukifa.” Eln., “tali fuwifa.”
^ Ile “oshitukulwa sheyambo osho shi li edimbulukifo.”
^ Ile “omayambo.”
^ Oshitimulongo shoefa oshi fike peelita 2,2. Tala Oshiwedelwako B14.
^ Ile “tali udifa nawa; tali tulumukifa.” Eln., “tali fuwifa.”
^ Ile “yakashitenda.”
