Levitikus 4:1-35
-
Etimbayambo (1-35)
4 Jehova okwa lombwela vali Moses, a ti:
2 “Lombwela Ovaisrael kutya, ‘Ngeenge umwe* okwa nyono shihe fi oshiningilewina, mokuninga oshinima keshe osho Jehova a popya shiha ningwe, oku na okuninga ngaha:
3 “‘Ngeenge omupristeri, oo a nangekwa po, okwa nyono, ndele ta etele ovanhu etimba, oku na okuyandja kuJehova ondumetana ya koshoka, i li etimbayambo lenyono laye.
4 Ota ka eta omhedi oyo poshivelo shetwali lokwoongalela koshipala shaJehova, nota ka tenheka omake aye komutwe wayo, ndele te i dipaa moipafi yaJehova.
5 Opo nee omupristeri, oo a nangekwa po, ota ka kufa ohonde imwe yomhedi, ndele te i twala metwali lokwoongalela,
6 nomupristeri ota ka yava omunwe waye mohonde nokushamina ohonde imwe luheyali komesho yetukulifolapi lomonhele iyapuki koshipala shaJehova.
7 Omupristeri ota ka tula yo ohonde imwe keembinga doaltari oko haku twiminwa oitwimifo yedimba liwa, oyo i li koshipala shaJehova metwali lokwoongalela, nota ka tila ohonde yomhedi aishe oyo ya xupa po koshitako shoaltari yomaxwikiloyambo, oyo i li poshivelo shetwali lokwoongalela.
8 “‘Opo nee ota ka kufa ko oinghene aishe yomhedi yetimbayambo, mwa kwatelwa oinghene oyo i li komandjadja, oinghene oyo ya dingilila omandjadja,
9 nosho yo eefiyo mbali noinghene oyo i li kudo, oyo i li popepi nekalo. Ota ka kufa ko yo oinghene oyo i li kexuli nosho yo eefiyo.
10 Oi na okukala ya faafana naayo a kufa kongobe yomhedi yeyambo loukumwe. Omupristeri ote ke i xwikila koaltari yomaxwikiloyambo.
11 “‘Ashike oshikafa shomhedi oyo nosho yo ombelela yayo aishe pamwe nomutwe wayo, oitukulwa yayo, omandjadja ayo noshandja shayo,
12 oinima aishe yomhedi, oyo ya xupa po, oku na oku i twala pondje yonhanda opo pa yela, ponhele opo hapa tilwa omute,* note ke i xwika po noikuni oyo i li pediko. Oi na okuxwikilwa konhele oko haku tilwa omute.
13 “‘Ngeenge ongudu aishe yOvaisrael oya nyono shihe fi oshiningilewina, ndele tai kala i na etimba, ashike eongalo ka li li shi shii kutya ola ninga osho Jehova e li lombwela liha ninge,
14 ndele enyono tali shiivika, eongalo oli na okuyandja ondumetana yetimbayambo noku i twala komesho yetwali lokwoongalela.
15 Ovakulunhu vongudu oyo otava ka tenheka omake avo komutwe womhedi oyo koshipala shaJehova, nomhedi oyo otai ka dipaelwa koshipala shaJehova.
16 “‘Opo nee omupristeri, oo a vaekwa, ota ka eta imwe yomohonde yomhedi oyo metwali lokwoongalela.
17 Omupristeri oku na okuyava omunwe waye mohonde nokushamina imwe yomuyo luheyali komesho yetukulifolapi koshipala shaJehova.
18 Opo nee ohonde imwe, oyo i li metwali lokwoongalela, ote ke i tula keembinga doaltari moipafi yaJehova, nota ka tila ohonde aishe oyo ya xupa po koshitako shoaltari yomaxwikiloyambo, oyo i li poshivelo shetwali lokwoongalela.
19 Ota ka kufa ko oinghene yayo aishe noku i xwikila koaltari.
20 Omhedi oyo oku na oku i ninga ngaashi a ninga omhedi ikwao yetimbayambo. Osho i na okuningwa ngaho, nomupristeri ote ke va koshola komatimba avo, notava ka diminwa po.
21 Ota ka twala omhedi pondje yonhanda, noku i xwika po ngaashi ashike a xwika po omhedi yotete. Oli li etimbayambo leongalo.
22 “‘Ngeenge elenga ola nyono shihe fi oshiningilewina, mokuninga shimwe shomoinima aishe oyo Jehova, Kalunga kalo, a popya iha ningwe, ndele tali kala li na ondjo,
23 ile ngeenge ola shiiva enyono olo la nyona shi na sha noshipango, kungaho oli na okuyandja okakombo kokapedi ka koshoka ke li eyambo lalo.
24 Otali ka tenheka omake alo komutwe wokakombo notali ke ka dipaela ponhele opo hapa dipaelwa omaxwikiloyambo koshipala shaJehova. Oli li etimbayambo.
25 Omupristeri ota ka kufa nomunwe waye ohonde imwe yokakombo oko ketimbayambo, ndele te i tula keembinga doaltari yomaxwikiloyambo, nota ka tila ohonde yako oyo ya xupa po koshitako shoaltari yomaxwikiloyambo.
26 Ota ka xwikila oinghene yako aishe koaltari ngaashi oinghene yeyambo loukumwe; omupristeri ote ke li koshola komatimba alo, notali ka diminwa po.
27 “‘Ngeenge umwe* womovanhu vomoshitukulwa okwa nyono shihe fi oshiningilewina, ndele ta kala e na etimba mokuninga sha shimwe shomoinima oyo Jehova a popya iha ningwe,
28 ile ngeenge okwa shiiva enyono olo a nyona, oku na okweeta okakombo kokandema ka koshoka ke li eyambo laye omolwenyono olo a nyona.
29 Ota ka tenheka omake aye komutwe wokakombo oko ketimbayambo nota ka dipaela okakombo oko ketimbayambo monhele ya faafana naamo mwa dipaelwa okakombo kexwikiloyambo.
30 Omupristeri ota ka kufa ohonde yako imwe nomunwe waye noku i tula keembinga doaltari yomaxwikiloyambo, nohonde yako aishe oyo ya xupa mo ote ke i tila koshitako shoaltari.
31 Omupristeri ota ka kufa ko oinghene yako aishe, ngaashi ashike oinghene oyo ya kufwa koshinamwenyo sheyambo loukumwe, note ke i xwikila koaltari i li edimba liwa* kuJehova, nomupristeri ote ke mu koshola komatimba aye, note ke a diminwa po.
32 “‘Ashike ngeenge ota yambe odjona i li etimbayambo laye, oku na okweeta odjona yonghadi ya koshoka.
33 Ota ka tenheka omake aye komutwe wodjona oyo yetimbayambo nota ka dipaela odjona oyo yetimbayambo monhele omo mwa dipaelwa oshinamwenyo shexwikiloyambo.
34 Omupristeri ota ka kufa imwe yomohonde yodjona yetimbayambo nomunwe waye noku i tula keembinga doaltari yomaxwikiloyambo, nohonde yayo aishe oyo ya xupa mo ote ke i tila koshitako shoaltari.
35 Omupristeri ota ka kufa ko oinghene yayo aishe ngaashi ashike oinghene oyo ya kufwa kodjona yondume yeyambo loukumwe, note ke i xwikila koaltari kombada yomaxwikiloyambo aJehova, oo a yambwa okupitila momundilo, nomupristeri ote ke mu koshola komatimba aye omolwenyono laye olo a nyona, note ke li diminwa po.
Eshangelo lopedu
^ Ile “omwenyo.”
^ Ile “omute womaadi,” sha hala okutya, omute oo wa ndodelwa komaadi omaxwikiloyambo.
^ Ile “omwenyo.”
^ Ile “tali udifa nawa, tali tulumukifa.” Eln., “tali fuwifa.”
