Job 9:1-35
9 Job okwa nyamukula, a ti:
2 “Ondi shi shii kutya osho shi li ngaho.
Ndele ongahelipi omunhu wongaho ta dulu okukala e li mondjila, ngeenge ta hokololifa Kalunga?
3 Ngeenge umwe okwa hala oku mu hokololifa,*Omunhu oo ita dulu nokuli okunyamukula limwe lomomapulo Aye eyovi.
4 Ye omunongo momutima, nomunene meenghono.
Olyelye ta dulu oku mu kondjifa, ndele ta kala ina ehamekwa?
5 Ohe linyengifa* eemhunda nopehe na oo e shi shii;Ohe di alangatifa mehandu laye.
6 Oha kakamifa edu li dje po ponhele yalo,Opo eengudi dalo di kakame.
7 Oha lombwele etango liha minikile,Noha uvike ouyelele weenyofi;
8 Oha nyanununa mo eulu kuye mwene,Noha lyataula omakufikufi manene efuta.
9 Okwa ninga eengudu deenyofi da-Ash,* da-Kesil* noda-Kimah*Nosho yo eengudu deenyofi dokolukadi.*
10 Oha longo oinenelonga noinyengandunge,Oinima ihapu iwa oyo itai dulu okuvalulwa.
11 Oha ende pwaame, ashike ihandi mu mono;Oha piti pwaame, ashike ihandi mu didilike.
12 Ngeenge ta vakula po oshinima, olyelye ta dulu oku mu kelela?
Olyelye ta dulu okutya kuye, ‘Oto ningi shike?’
13 Kalunga ita kelele ehandu laye;Nokuli novakwafi vaRahab* otave mu linyongamene.
14 Ongahelipi ngeenge onde mu nyamukula;Mbela ondi na okuhoolola eendjovo dange noukeka, opo ndi mu hokololife!
15 Nonande ngeno onda li ndi li mondjila, itandi mu nyamukula.
Ohandi dulu ashike okwiindila efilonghenda komutokoli wange.*
16 Ngeenge onde mu pula ekwafo, mbela ota ka nyamukula nge?
Nghi wete ngeenge ota ka pwilikina kondaka yange,
17 Osheshi oha nyanyaula nge noshikungulu,Noha hapupalifa oipute yange nopehe na etomheno.
18 Iha efa nge nande ndi fude;Ota twikile okweetela nge omaupyakadi.
19 Ngeenge tashi uya peenghono, oye omunaenghono.
Ngeenge tashi uya pouyuki, ota ti: ‘Olyelye ta dulu okuhokololifa nge?’*
20 Nonande ngeno onda li ndi li mondjila, okanya kange mwene otaka tokola nge;Nonande ondi kanyatele oudiinini wange,* ota mono nge ondjo.*
21 Nonande ondi kanyatele oudiinini wange,* kandi na elineekelo mwaame mwene;*Onda nyanyala* onghalamwenyo yange.
22 Aishe oya faafana. Nomolwaasho handi ti,‘Oha hanauna po ovo vehe na ondjo* nosho yo ovakolokoshi.’
23 Ngeenge efundja lohangelela ola eta efyo lombadilila,Ye ota sheke ovo vehe na ondjo omolwoixuna omo ve li.
24 Edu ola yandjwa kovakolokoshi;Oha uvike omesho* ovatokoli valo.
Ngeenge haye, mbela olyelye vali?
25 Paife omafiku ange otaa vilola po e dule omutondoki;Otaa tuka po inandi mona ouwa.
26 Otaa vilola po, ngaashi owato ya longwa meembungu,Ngaashi eenhwa tadi vakula po oshihakanwa shado.
27 Ngeenge onda ti, ‘Ohandi dimbwa ekemo lange,Ohandi ka lundulula eholokepo lange lokoshipala, ndele handi kala nda hafa.’
28 Ohandi ka kala natango nda tila omolwouyehame wange aushe,Nondi shi shii kutya oto ka mona nge ondjo.
29 Ohandi ka monika ondjo.*
Onghee omolwashike ndi na okukendabala oshimha?
30 Ngeenge onde likosho momeva a dja molumi* tali hengumuka,Nokukosha omake ange momeva e na omute,*
31 Opo nee oto ka ekela nge melambo,Opo oikutu yange otai nyanyala nge nokuli.
32 Osheshi ye ke fi omunhu ngaashi ame, opo ndi mu nyamukule,opo tu ye naye komhangu.
33 Kape na omunhu ta dulu okutokola* pokati ketu;Olyelye ta dulu okukala omutokoli wetu.*
34 Ngeno okwa li ta efa okudenga nge,*Nokuhaefa omatilifo aye a tilife nge,
35 Ngeno ohandi ka popya naye ndihe na oumbada,Osheshi inashi yuka kwaame okupopya ndi na oumbada.
Eshangelo lopedu
^ Ile “oku mu twala komhangu.”
^ Ile “kufa po.”
^ Tashi dulika Ombwa ya kula (Ombwa inene).
^ Tashi dulika Omukongo.
^ Tashi dulika Ongudu yeenyofi heyali.
^ Eln., “eenduda domeni dokolukadi.”
^ Tashi dulika oshinamwenyo shinenenene shomefuta.
^ Ile tashi dulika, “komuhokololifi wange momhangu.”
^ Eln., “okwiifana nge?”
^ Eln., “oukengeleledi.”
^ Ile “Nonande kandi na ondjo.”
^ Ile “Nonande kandi na ondjo.”
^ Ile “kandi shii omwenyo wange.”
^ Ile “tonda; anya.”
^ Ile “ovo hava kanyatele oudiinini.”
^ Eln., “oipala.”
^ Eln., “omukolokoshi.”
^ Ile “mo-snow.”
^ Ile “ofewa.”
^ Ile “Kape na omupokati.”
^ Eln., “ta tula eke laye kombada yetu.”
^ Eln., “kufa ko ongola yaye kombada yange.”
