Job 3:1-26
3 Konima yoinima oyo, Job okwa hovela okupopya, ndele ta fingi efiku omo a dalwa.*
2 Job okwa ti:
3 “Efiku, omo nda dalwa, nali xule po,Nosho yo oufiku omo umwe a ti: ‘Omulumenhu oku li moshidalelo!’
4 Efiku olo nali ninge omilaulu.
Kalunga na dimbwe efiku olo;Ouyelele inau li minikila.
5 Nali hangwe komilaulu fokofoko.*
Oshilemo shodula nashi li uvike.
Omulaulu keshe wefiku nau li tilife.
6 Oufiku oo nau hangwe komilaulu;Inau hafela pamwe nomafiku omudo,Noinau valulilwa momuvalu weemwedi.
7 Oshilishili, oufiku oo nau kale ongadji;Muo inamu udika ondaka yeenghuwilili.
8 Ovo tava fingi efiku olo nave li finge,Ovo tava dulu okupendula Leviatan.*
9 Eenyofi dokuwiwila kwalo nadi laule;Nali teelele epwanga ouyelele wefiku,Noinali mona okutenda kweluwa.
10 Molwaashi lo inali idila omivelo doshidalelo shameme;Noinali holeka omesho ange oupyakadi.
11 Omolwashike inandi fya, eshi opo nda dalwa?
Omolwashike inandi kana po, eshi nda dja moshidalelo?
12 Omolwashike pa li eengolo di yakele nge,Nomavele a nyamife nge?
13 Ngeno osho onda nangala inandi piyaanekwa;Nda kofa nonda fuwa po
14 Pamwe neehamba dokombada yedu novayandjimayele vado,Odo da li de litungila eenhele, odo paife di li mehalakano,*
15 Ile pamwe nomalenga, oo a li e likongela oshingoli,Oo omaumbo ao a li e yadi oshisilveri.
16 Ile omolwashike inandi fila medimo,Ngaashi ounona, ovo inava mona nande onale ouyelele?
17 Omo nokuli ovakolokoshi itava longo vali owii;Omo ovo va loloka tava fuwa po.
18 Omo ovanadolongo tava tulumukwa;Ihava udu ondaka yaao te va fininike va longe.
19 Omo ovanhu vongaho novanenenhu va faafana,Nomupika okwa manguluka ko komwene waye.
20 Omolwashike ha yandje ouyelele kwaao ta mono oixunaNosho yo omwenyo kwaavo va nyika oluhodi neenghono?*
21 Omolwashike hava djuulukwa efyo, ndele lo itali uya?
Ohave li kongo, ngaashi omamona a holekwa,
22 Ovo hava hafe unene,Naavo hava nyakukwa, ngeenge ova mono ombila.
23 Omolwashike ha yandje ouyelele komunhu, oo a kana mo mondjila yaye,Oo Kalunga e mu kondeka keembinga adishe?
24 Okutwa omadima okwa fa oikulya yange,Nokukema kwange okwa fa omeva taa kunguluka.
25 Osheshi osho hashi halukifa nge osha hanga nge,Naasho nda li nda tila osha hanga nge.
26 Inandi kala ndi na ombili, engungumano, ile etulumuko,Ashike oupyakadi onghee ngoo wa lambalala nge.”
Eshangelo lopedu
^ Eln., “ta fingi efiku laye.”
^ Ile “komilaulu nosho yo komudidimbe wefyo.”
^ Osha udiwa ko tashi ulike kongadu, ile koshinamwenyo shimwe vali shakula, oshinamwenyo shomomeva shi na eenghono.
^ Ile tashi dulika, “Odo de litungila eenhele, odo da ninga oikulukuma.”
^ Ile “ovo omwenyo wavo wa nyika oluhodi?”
