Jesaja 66:1-24
66 Eshi osho Jehova ta ti:
“Eulu olo olukalwapangelo lange, nedu olo oshilyatelo sheemhadi dange.
Eumbo, olo tamu tungile nge, oli li peni,Nonhele yange yokutulumukila oi li peni?”
2 “Eke lange mwene olo la shita oinima aishe ei,Naaishe osho ye uya po ngaha,” Jehova osho ta ti.
“Onghee ohandi ka tala kwaau,Oo omulininipiki noku na omhepo ya nyanyauka, oo ha kakama* kondjovo yange.
3 Ou ta tomo ongobe yomhedi ongaashi ou ta dipaa omunhu.
Ou ta yambe odi ongaashi ou ta teya ofingo yombwa.
Ou ta yandje oshali . . . ongaashi ohonde yoshingulu!
Ou ta yambe edimbulukifoyambo leka ledimba liwa ongaashi ou ta nangeke noupuna neendjovo doumhulile.*
Ohava hoolola eendjila davo vene,Nohava hafele* osho shitondifa.
4 Onghee ohandi ka hoolola eenghedi, omo handi va handukile,Nohandi ke va etela oshinima keshe, osho hava tila.
Molwaashi eshi nda ifana, kape na umwe a nyamukula;Eshi nda popya, kapa li umwe, oo a pwilikina.
Ova twikila okuninga osho shii momesho ange,Nova hoolola okuninga osho itashi wapalele nge.”
5 Pwilikineni ondjovo yaJehova, nye ovo hamu kakama* kondjovo yaye, oyo tai ti:
“Ovamwaxo ovo ve mu tonde nohave mu tongola omolwedina lange, ova ti, ‘Jehova na tumbalekwe!’
Ashike ote ke uya, note ke mu etela ehafo,Ndele vo otava ka fifwa ohoni.”
6 Moshilando omu uditike ondaka yeuyaano, ondaka tai di kotembeli!
Ondaka oyo oyaJehova ta shunifile ovatondi vaye osho ve lilongela.
7 Okwa dala, ofimbo ina fetwa.
Okwa dala okaana okamati, ofimbo ina hangwa kouyehame woshifeta.
8 Olyelye a uda nale oshinima sha tya ngaho?
Olyelye a mona oinima oyo?
Mbela oshilando otashi ka dalwa tuu mefiku limwe?
Ile mbela oshiwana ashishe otashi ka dalwa poshikando?
Diva ashike eshi Sion a hangwa koshifeta, okwa dala ovanamati vaye.
9 “Mbela ohandi etifa okudala popepi, ndele handi ku kelele?” Jehova osho ta ti.
“Ile mbela ohandi etifa okaana poshivelo, ndele handi pate oshidalelo?” Kalunga koye osho a ti.
10 Hafeni pamwe naJerusalem nokunyakukwa pamwe nasho, amushe ovo mu shi hole.
Hafeni unene pamwe nasho, amushe ovo mwa nyika oluhodi omolwasho,
11 Osheshi otamu ka nyama, notamu ka kutifwa filufilu komavele asho ehekeleko,Notamu ka nwa filufilu nokumona ehafo linene mefimano lasho.
12 Osheshi eshi osho Jehova ta ti:
“Ohandi ka hapupalifa ombili yasho ngaashi ashike omulonga,Nefimano loiwana ngaashi efundja tali kunguluka.
Otamu ka nyama, notamu ka humbatelwa monghwapa,Notamu ka tembulilwa komatundji.
13 Ngaashi ashike omudalakadi ta hekeleke omonamati,Osho handi ka kala noku mu hekeleka;Notamu ka hekelekwa omolwaJerusalem.
14 Eshi otamu ke shi mona, nomitima deni otadi ka hafa;Omakipa eni otaa ka hapa, ngaashi ashike omwiidi mutalala.
Neke* laJehova otali ka shiivika kovapiya vaye,Ashike ovatondi vaye ote ke va tokola.”
15 “Osheshi Jehova ote ke uya ngaashi omundilo,Nomatemba aye ongaashi oshikungulu shomhepo,E va shunifile a fula onya,A hanyene nomalaka omundilo.
16 Osheshi Jehova ota ka tokola nomundilo,Heeno, neongamukonda laye, ota ka tokola ombelela aishe;*Noonakudipawa kuJehova otava ka kala vahapu.
17 “Ovo have liyapula vo vene nosho yo have likoshola vo vene, opo va ye moikunino* tava shikula oo e li pokati, ovo hava li ombelela yoingulu nosho yo oinima itondifa neemhuku, aveshe otava ka xula po oshita,” Jehova osho ta ti.
18 “Molwaashi ondi shii oilonga yavo nomadiladilo avo, ohandi uya, ndi ongele ovanhu vomoiwana novomomalaka aeshe, notave ke uya nokumona oshinge shange.”
19 “Ohandi ka tula edidiliko mokati kavo, nohandi ka tuma vamwe ovo va ya onhapo koiwana, kuTarsis, kuPul nokuLud, ovo va lukila outa kuTubal naJavan nosho yo kounhunhu vokokulekule, ovo inava uda onghundana kombinga yange, ile inava mona oshinge shange; notava ka udifila oiwana efimano lange.
20 Otava ka eta ovamwaxo aveshe okudja moiwana aishe onga oshali kuJehova, ve li keenghambe, momatemba, momatemba a uvikwa, komamwili nosho yo keengamelo hadi tondoka onhapo yoshidudu, komhunda yange iyapuki, Jerusalem,” Jehova osho ta ti, “ngaashi ashike ovanhu vomuIsrael va li hava eta oshali i li moshikwatelwa sha yela keumbo laJehova.”
21 “Ohandi ka kufa mo yo vamwe va ninge ovapristeri nosho yo Ovalevi,” Jehova osho a ti.
22 “Ngaashi ashike eulu lipe nedu lipe, olo handi shiti, tali ka kala fiyo alushe koshipala shange,” Jehova osho ta ti, “osho yo oludalo leni nosho yo edina leni tali kala fiyo alushe.”
23 “Nokudja komwedi mupe fiyo okomwedi mupe nosho yo okudja keshabata fiyo okeshabata,Ombelela aishe* otai ke uya mo, i linyongamene* nge,” Jehova osho a ti.
24 “Notava ka ya nokutala omidimba dovalumenhu, ovo va tukululila nge oshibofa;Osheshi omainyo, oo e li kuvo, itaa ka fya,Nomundilo wavo itau ka dimwa,Notava ka kala oshinima shitondifa kovanhu aveshe.”*
Eshangelo lopedu
^ Ile “e na oshisho.”
^ Ile tashi dulika, “umwe oo ta fimaneke oshikalunga.”
^ Ile “Neemwenyo davo ohadi hafele.”
^ Ile “mu na oshisho.”
^ Ile “Neenghono.”
^ Ile “ovanhu aveshe.”
^ Sha hala okutya, oikunino ye likalekelwa hai longifwa mokulongela oikalunga.
^ Ile “ovanhu aveshe.”
^ Ile “va longele.”
^ Eln., “kombelela aishe.”
