Jeremia 1:1-19
1 Edi eendjovo daJeremia,* omonamati waHilkia, umwe womovapristeri vomuAnatot, medu laBenjamin.
2 Ondjovo yaJehova oye uya kuye pefimbo laJosia, omonamati waAmon, ohamba yaJuda, momudo omuti-13 wepangelo laye.
3 Oye uya yo pefimbo laJehoiakim, omonamati waJosia, ohamba yaJuda, fiyo opexulilo lomudo omuti-11 waSedekia, omonamati waJosia, ohamba yaJuda, fiyo osheshi Jerusalem a ya moukwatwa momwedi omutitano.
4 Ondjovo yaJehova oye uya kwaame tai ti:
5 “Ofimbo inandi ku shitila moshidalelo, onda kala ndi ku shii,*Nofimbo ino dalwa,* onda kala nde ku yapula.*
Onde ku ninga omuprofeti koiwana.”
6 Ashike onda ti: “Woo ame, akutu! Omwene Omunamapangelo aeshe, Jehova!
Kandi shii okupopya, osheshi ame okamatyona* ashike.”
7 Opo nee Jehova okwa lombwela nge ta ti:
“Ino tya, ‘Ame okamatyona ashike.’
Osheshi ou na okuya kwaaveshe ovo handi ku tumu kuvo,Nou na okupopya keshe shimwe osho handi ku lombwele.
8 Ino kala wa tila omolweholokepo lavo,Osheshi ‘Ame ondi li pamwe naave ndi ku xupife,’ Jehova osho ta ti.”
9 Opo nee Jehova okwa nana eke laye nokwa kuma okanya kange. Na Jehova okwa lombwela nge ta ti: “Onda tula eendjovo dange mokanya koye.
10 Tala, onde ku tula po nena eli kombada yoiwana nokombada yomauhamba, u dude nou dikulule, u hanaune nou teyaule, u tunge nou twike.”
11 Ondjovo yaJehova oye uya natango kwaame tai ti: “Jeremia, ou wete shike?” Opo nee onda ti: “Ondi wete oshitai shomuti wo-almond.”*
12 Jehova okwa lombwela nge a ti: “Owe shi mona shili, osheshi ame ohandi kala oupafi filufilu shi na sha nondjovo yange, opo i wanifwe po.”
13 Ondjovo yaJehova oye uya kwaame oshikando oshitivali tai ti: “Ou wete shike?” Opo nee onda ti: “Ondi wete ombiya* tai fuluka,* nokanya kayo oka pungululwa ko kolundume.”
14 Opo nee Jehova okwa lombwela nge ta ti:
“Kolundume otaku ka dja oupyakadiTau hange ovakalimo aveshe vomedu olo.
15 Osheshi ‘Ame ohandi ongele omapata aeshe omauhamba okolundume,’ Jehova osho ta ti,‘Notae ke uya; keshe umwe ota ka dika olukalwapangelo layePoivelo yaJerusalem,Otava ka ponokela omakuma asho aeshe, oo e shi dingilila,Notava ka ponokela oilando aishe yaJuda.
16 Nohandi ke va shiivifila omatokolo ange omolwoukolokoshi wavo aushe,Molwaashi ova efa nge po,Notava yambele omatwiminoyambo ookalunga vamwe,Nokulinyongamena oilonga yomake avo vene.’
17 Ashike ou na okulilongekida, u katuke onghatu,*Nou na okufikama noku va lombwela ashishe osho nde ku lombwela.
Ino kala we va tila,Opo ndihe ke ku tilife moipafi yavo.
18 Osheshi nena onde ku ninga oshilando shomakuma a pama,Ongudi yoshivela shilaula nomakuma ongopolo, u kondjife oilongo aishe,Eehamba daJuda nomalenga asho,Ovapristeri vasho novanhu vomedu olo.
19 Notave ke ku lwifa shili,Ashike itave ke ku dula,*Osheshi ‘Ame ondi li pamwe naave,’ Jehova osho ta ti, ‘ndi ku xupife.’”
Eshangelo lopedu
^ Tashi dulika tali ti “Jehova oha tumbaleke.”
^ Ile “nde ku hoolola.”
^ Eln., “Nofimbo ino dja mo moshidalelo.”
^ Ile “likalekela.”
^ Ile “omunyasha.”
^ Eln., “womupenduli.”
^ Ile “ombiya yokutelekela i na okanya ka kula.”
^ Eln., “pepelwa,” tashi ulike komundilo wa temwa koshi.
^ Eln., “mange oshiya shoye.”
^ Ile “finda.”
