Genesis 6:1-22
6 Eshi ovanhu va hovela okuhapupala kombada yedu nova dala ovana oukadona,
2 ovaengeli* ova li va mona kutya oukadona ovo ovawa. Onghee ova li va hovela okulikufila ovakulukadi ovo va hala.
3 Opo nee Jehova okwa ti: “Itandi* ke lididimikila omunhu fiyo alushe, molwaashi ye oku li pambelela.* Ndele ye ota kala nomwenyo oule womido 120.”
4 Okudja opo, kombada yedu okwa kala ovatongolume.* Pefimbo olo, ovaengeli* ovo ova kala hava nangala novanakadona vovanhu, ndele tava dala ounona. Ounona ovo ova li ve na eenghono nova li va shiivika nawa apeshe.
5 Lwanima, Jehova okwa li a mona kutya oukolokoshi wovanhu owa hapupala kombada yedu; omadiladilo nomahalo omitima davo okwa li mai efimbo alishe.
6 Jehova okwa li a nyemata* eshi a shitila ovanhu kombada yedu, nokwa li a uda nai* momutima.
7 Onghee Jehova okwa ti: “Ohandi ka hanauna po ovanhu ovo nda shitila kombada yedu, oinamwenyo yopovanhu, oipuka noikwamavava, oyo tai tuka mewangadjo, molwaashi onde livela ombedi, eshi nde va shita.”
8 Ashike Noa okwa filwa onghenda koshipala shaJehova.
9 Ondjokonona i na sha naNoa.
Noa okwa li omulumenhu omuyuki.* Okwa ulika kutya ye omuyuki mokati kaavo va li ko pefimbo limwe naye.* Noa okwa enda pamwe naKalunga* kashili.
10 Mokweendela ko kwefimbo, Noa okwa ka dala ovanamati vatatu, Sem, Ham naJafet.
11 Edu ola li la nyonaunwa momesho aKalunga, nokwa li ku yadi elongifo leenghono.
12 Kalunga okwa tala kedu, nokwa mona kutya ola li la nyonaunwa. Eenghedi dovanhu aveshe* kombada yedu oda li da xutuka.
13 Konima yaasho, Kalunga okwa lombwela Noa, a ti: “Onda tokola okuhanauna po ovanhu aveshe kombada yedu, molwaashi edu oli yadi oukolokoshi omolwavo. Onghee ohandi ke va hanauna po nosho yo ashishe osho shi li kombada yedu.
14 Tunga onguluwato* nomiti da kola.* Ou na yo oku i tukula momadimo, ndele to i vaeke eka meni nokombada.
15 Onguluwato ou na oku i tunga ngaha: Oule womukokomoko wayo omaludimbo 300, ounene wayo omaludimbo 50, noule wopombada omaludimbo 30.
16 Ou na oku i tula ekende li na oule woludimbo limwe okudja pombada, opo li ete ouyelele* monguluwato. Ou na yo oku i tula oshivelo momunghulo, noku i tunga i na omadimo a londafana, edimo lotete, edimo etivali nosho yo edimo etitatu.
17 “Osheshi ame ohandi ka eta eyelu kombada yedu, opo li hanaune po ovanhu noinamwenyo* aishe. Oinima aishe kombada yedu otai ka xula po.
18 Ohandi ka ninga ehangano naave; ove ou na okuya monguluwato pamwe novanamati voye, omukulukadi woye novakulukadi vovanamati voye.
19 Monguluwato ou na okutula mo oinamwenyo yoludi keshe kooivali, oshindume noshikadi, opo i kale nomwenyo pamwe naave.
20 Tula mo yo oikwamavava pamaludi ayo, oinamwenyo yopovanhu pamaludi ayo noipuka aishe oyo i li kombada yedu pamaludi ayo; oi na okuya mo kooivali, opo oludi layo liha xule po.
21 Ove ou na okwoongela oikulya yoludi keshe monguluwato, opo i ninge eendja deni nodoinamwenyo.”
22 Noa okwa ninga ashishe osho Kalunga e mu lombwela. Osho naanaa a ninga.
Eshangelo lopedu
^ Eln., “ovanamati vaKalunga.”
^ Eln., “Omhepo yange itai.”
^ Ile tashi dulika, “oha longo oilonga yombelela.”
^ Tashi dulika, “Ovawifi,” sha hala okutya, ovanhu ovo hava wifa po vakwao. Tala Omafatululo oitya.
^ Eln., “ovanamati vaKalunga.”
^ Ile “nyika oluhodi.”
^ Ile “ehama.”
^ Ile “ehe na etimba.”
^ Eln., “epupi laye.”
^ Ile “okwa longela Kalunga.”
^ Ile “dombelela aishe.”
^ Eln., “oshikefa.”
^ Omiti odo otashi dulika da yukila komingaalipi.
^ MOshiheberi, tsohar. Efimbo limwe tsohar ohashi yukifwa koshookooko shi na oule woludimbo, ponhele yombululu yokweeta mo ouyelele, ile ekende.
^ Ile “nombelela.”
