Genesis 34:1-31
34 Dina, omonakadona waJakob, oo a dalwa kuLea, okwa li ha endafana* noukadona vomuKanaan.
2 Eshi Sekem, omonamati waHamor, Omuhevi, elenga lomedu olo, a mona Dina, okwe mu kufa, ndele te mu fininike a nangale naye.
3 Opo nee Sekem* okwa kala a hokwa Dina, omonakadona waJakob, nokwa kala e hole unene okakadona oko, ndele te ka lombwele eendjovo odo da kuma omutima wako.
4 Xuuninwa, Sekem okwa tya kuxe, Hamor: “Kongele nge okakadona oko ka ninge omukulukadi wange.”
5 Ovanamati vaJakob ova li noimuna mofuka pefimbo opo Jakob a uda kutya omonakadona waye, Dina, okwa longelwa omunyonena kuSekem. Jakob okwa kala e shi mwenena fiyo osheshi va aluka.
6 Lwanima, xe yaSekem, Hamor, okwa ya a ka popye naJakob.
7 Eshi ovanamati vaJakob ve shi uda, ova aluka mo diva mofuka. Ova li va uda nai nova handuka neenghono, molwaashi Sekem okwa fifa ohoni Israel, eshi a nangala nomonakadona waJakob; oshinima osho shihe na okuningwa nandenande.
8 Hamor okwa popya navo, a ti: “Omonamati wange, Sekem, okwa hala* omonakadona woye. Alikana, mu pa omonakadona woye a ninge omukulukadi waye.
9 Tu ningeni eudafano ovanhu veni novanhu vetu va kale hava hombolafana. Tu peni ovanakadona veni, nye mu kufe ovanakadona vetu.
10 Otamu dulu okukala pamwe nafye, notamu kala mwa manguluka medu eli. Kaleni omu nye mu twikile okulandifa oinima yeni.”
11 Opo nee Sekem okwa lombwela Jakob novamwaina vaDina, a ti: “Filei nge onghenda, nohandi ke mu pa keshe osho tamu pula nge.
12 Otamu dulu okupula nge oyoonda ihapu yomufuko nosho yo eeshali. Ohandi ke mu pa keshe osho tamu pula nge. Pei nge ashike okakadona oko ka ninge omukulukadi wange.”
13 Ovanamati vaJakob ova nyamukula Sekem nosho yo xe, Hamor, noukengeleledi, molwaashi Sekem okwa longela omumwaina wavo, Dina, omunyonena.
14 Ova nyamukula va ti: “Itatu dulu nande okuninga oshinima sha tya ngaho, tu yandje ngeno omumwamemekadona komulumenhu ina kenghwa,* osheshi osho oshi fifa ohoni kufye.
15 Osho ohatu ke shi ninga ashike ngeenge amushe omwe tu fe, nongeenge ovalumenhu aveshe vomoshilando sheni ova kenghwa.
16 Opo nee ohatu ke mu pa ovanakadona vetu, nohatu ka hombola ovanakadona veni, nokungaho, ohatu ka kala punye nohatu ka ninga oshiwana shimwe.
17 Ashike ngeenge inamu pwilikina kufye noinamu kenghwa, ohatu ka kufa po okakadona ketu, ndele hatu i.”
18 Eendjovo davo oda li da hafifa Hamor nomonamati waye, Sekem.
19 Sekem ina ongaonga okuninga osho ve mu pula, molwaashi okwa li e hole unene okamonakadona kaJakob, noye a li a fimanekwa unene meumbo laxe.
20 Onghee Hamor nomonamati waye, Sekem, ova ya koshivelo shoshilando, ndele tava popi novalumenhu vomoshilando shavo, tava ti:
21 “Ovalumenhu ava ova hala okupanga ombili nafye. Va efeni va kale medu eli nova twikile okulandifa oinima yavo, molwaashi edu eli ola kula nova wana okukala mo. Ohatu dulu okukonga ovanakadona vavo va ninge ovakulukadi vetu, nohatu dulu oku va pa ovanakadona vetu.
22 Ngeenge ovalumenhu vetu aveshe ova kenghwa ngaashi vo, opo ashike ovalumenhu ovo tava dulu okukala pamwe nafye, opo tu ninge oshiwana shimwe.
23 Ngeenge otwa ningi ngaho, oupuna wavo noimuna yavo aishe otai ka ninga yetu. Onghee natu va lombweleni va kale pamwe nafye.”
24 Aveshe ovo va li va ongala poshivelo shoshilando ova pwilikina kuHamor nokomonamati waye, Sekem, novalumenhu aveshe ova li va kenghwa, aveshe ovo va li poshivelo shoshilando.
25 Mefiku etitatu, eshi va li natango mouyahame, ovanamati vavali vaJakob, Simeon naLevi, ovamwaina vaDina, ova kufa keshe umwe eongamukonda laye nokuponokela oshilando osho ombadilila, ndele tava dipaa ovalumenhu aveshe.
26 Ova dipaa Hamor nomonamati waye, Sekem, neongamukonda, nova kufa mo Dina meumbo looSekem, ndele tava i.
27 Ovana vaJakob vakwao ove uya povalumenhu ovo va dipawa, ndele tava kufa mo oinima moshilando, omolwomumwaina wavo, Dina, oo a longelwa omunyonena.
28 Ova kufa mo eedi noikombo, eengobe neengamelo, eendongi nakeshe osho sha li moshilando nomomudingonoko washo.
29 Ova kufa ko yo omaliko aeshe, ovakulukadi nounona aveshe, nakeshe osho sha li momaumbo.
30 Opo nee Jakob okwa tya kuSimeon naLevi: “Nye omwa etela nge oupyakadi, eshi mwa tondifa* nge kovanhu vomedu eli, kOvakanaan nokOvaperesi. Ame ondi li nongudu inini, notave ke limanga kumwe va ponokele nge notava ka hanauna nge po neumbo lange.”
31 Ashike ova nyamukula va ti: “Tashi ti keshe umwe oku na ashike okuungaunga nomumwameme ngaho a fa ombwada?”
Eshangelo lopedu
^ Ile “kala.”
^ Ile “omwenyo waye.”
^ Ile “Omwenyo womonamati wange Sekem owa hokwa.”
^ Eln., “oo e na oshipa shokoxulo youlumenhu.”
^ Ile “yalifa.”
