Exodus 19:1-25
19 Momwedi omutitatu, konima eshi Ovaisrael va dja mo medu laEgipiti, mefiku olo tuu olo, ova ya kombuwa yaSinai.
2 Ova dja mo muRefidim, ndele tava i kombuwa yaSinai nova onga onhanda mombuwa. Ovaisrael ova li va onga onhanda popepi nomhunda.
3 Opo nee Moses okwa ya kuKalunga kashili, na Jehova Kalunga okwe mu lombwela okudja komhunda, ta ti: “Eshi osho u na okulombwela eumbo laJakob nosho yo Ovaisrael,
4 ‘Omwa mona osho nda ningila Ovaegipiti, opo ndi mu ete kwaame nde mu humbata ngaashi onhwa ya humbata oudilona momavava ayo.
5 Ngeenge omwa dulika filufilu kondaka yange nokudiinina ehangano lange, otamu ka kala ovanhu vange ve likalekelwa* mokati kovanhu aveshe, molwaashi edu alishe olange.
6 Otamu ka ninga ouhamba wovapristeri noshiwana shange shiyapuki.’ Eendjovo edi odo u na okulombwela Ovaisrael.”
7 Moses okwa ya, nokwa ongela ovakulunhu voshiwana, ndele aveshe te va lombwele eendjovo odo Jehova e mu lombwela.
8 Okudja opo, ovanhu aveshe ova nyamukula oshita va ti: “Ashishe osho Jehova a popya otwa hala oku shi ninga.” Diva Moses okwa ka shiivifila Jehova osho ovanhu va nyamukula.
9 Jehova okwa tya kuMoses: “Tala, ohandi uya kwoove moshilemo shilaula, opo ovanhu va ude eshi handi popi naave nopo yo va kale alushe ve ku lineekela.” Opo nee Moses okwa lombwela Jehova osho ovanhu va popya.
10 Jehova okwa lombwela Moses, a ti: “Inda kovanhu, ndele to va yapula nena nomongula, nove na okukosha oikutu yavo.
11 Ove na okulilongekidila efiku etitatu, molwaashi mefiku etitatu Jehova ote ke uya pedu komhunda yaSinai moipafi yovanhu aveshe.
12 Ou na okutulila po ovanhu omadidiliko a dingilila omhunda aishe noku va lombwela kutya, ‘Lungameni muha londe komhunda, ile muha kume omadidiliko oo. Keshe ou ta ka kuma omhunda ota ka dipawa shili.
13 Ke na okukumwa neke, ndele oku na okudipawa nomamanya, ile a yashwe.* Kutya nee oshinamwenyo, ile omunhu, ita kala nomwenyo.’ Ndele ngeenge ova udu ewi tali di menghuma loluvinga lodi, otava dulu okuuya komhunda.”
14 Opo nee Moses okwa dja ko komhunda, ndele te uya kovanhu, nokwa hovela okuyapula ovanhu, nova kosha oikutu yavo.
15 Okwa tya kovanhu: “Lilongekidileni efiku etitatu. Lidilikeni omilele.”*
16 Ongula yefiku etitatu, komhunda okwa li omingungumo noushelu, nokwa li yo oshilemo shilaula nosho yo ewi lenghuma li li mokule neenghono, novanhu aveshe ovo va li monhanda ova li va hovela okukakama.
17 Moses okwa kufa mo ovanhu monhanda, opo va ka shakene naKalunga kashili, nova kala pefina lomhunda.
18 Omhunda yaSinai oya li tai di omwifi keshe pamwe, molwaashi Jehova okwa li e uya kuyo e li momundilo; omwifi wayo owa li tau lundumuka ngaashi omwifi tau di moshiyofelo, nomhunda aishe oya li tai kakama neenghono.
19 Eshi ewi lenghuma la kala tali yeluka mokulekule, Moses okwa popya, nondaka yaKalunga kashili oye mu nyamukula.
20 Opo nee Jehova okwe uya komhunda yaSinai, koxulo yomhunda. Ndele Jehova okwa ifana Moses koxulo yomhunda, na Moses okwa ya ko.
21 Jehova okwa lombwela Moses, ta ti: “Londoloka, ndele to londwele ovanhu vaha hetekele okweehena popepi va tale Jehova, ngeenge hasho, vahapu otava fi.
22 Lombwela ovapristeri ovo have uya pandjikilile popepi naJehova ve liyapule, opo Jehova ehe va handukile.”*
23 Moses okwa tya kuJehova: “Ovanhu itava dulu okuuya komhunda yaSinai, molwaashi owe va londwela nale wa ti, ‘Tulei po omadidiliko a dingilila omhunda noku i kaleka iyapuki.’”
24 Ashike Jehova okwa tya kuye: “Inda, londoloka, ndele to aluka naAron, ashike ino efa ovapristeri novanhu va hetekele okweehena popepi naJehova, opo ehe va handukile.”
25 Opo nee Moses okwa londoloka e uya kovanhu, ndele te va lombwele.
Eshangelo lopedu
^ Ile “emona li na ondilo.”
^ Tashi dulika ta yashwa noshikuti.
^ Eln., “Inamu kwatafana nomukainhu.”
^ Eln., “ehe va denge.”
