Deuteronomion 26:1-19
26 “Ngeenge omwa i medu olo Jehova, Kalunga keni, te mu pe li li efyuululo, ndele tamu li kwata ko nokukala mulo,
2 omu na okukufa imwe yomoilikolomwa* aishe yomomapya eni, oyo ya pya tete, oyo tamu ka kufa medu olo Jehova, Kalunga keni, te mu pe noku i tula moshimbale, ndele tamu i konhele oyo Jehova, Kalunga keni, a hoolola ku fimanekelwe edina laye.
3 Ou na okuya komupristeri, oo ta ka kala ta longo pefimbo opo, noku mu lombwela kutya: ‘Nena ohandi lombwele Jehova, Kalunga koye, kutya onde uya medu olo Jehova a anena ootatekulululwa kutya ote li tu pe.’
4 “Omupristeri ota ka kufa oshimbale momake oye noku shi tula popepi noaltari yaJehova, Kalunga koye.
5 Opo nee ou na okupopya moipafi yaJehova, Kalunga koye, kutya: ‘Tate okwa li omweendaendi* Omuaram, nokwa ya kuEgipiti pamwe novaneumbo laye vanini, naako oko a kala ha di e li omunailongo, ashike oko okwa ningila ko oshiwana shinene, oshinaenghono noshihapu unene.
6 Ovaegipiti ova ungaunga nafye nai, ve tu fininika, nove tu hepeka nonyanya, eshi twa li ovapika.
7 Onghee otwa hovela okukonga ekwafo kuJehova, Kalunga kootatekulululwa, na Jehova okwe tu uda nokwa mona okuhepekwa, omaudjuu etu nokufininikwa kwetu.
8 Xuuninwa, Jehova okwe tu kufa mo muEgipiti neke li na eenghono, nokwooko kwa yeluka, noilonga itilifa, nomadidiliko nosho yo noikumwifilonga.
9 Onghee okwe tu eta konhele ei nokwe tu pa onhele ei, edu tali kunguluka omashini nomaadi eenyiki.
10 Paife onda eta oilikolomwa, oyo ya pya tete, yomedu olo Jehova a pa nge.’
“Oshimbale osho ou na oku shi tula komesho yaJehova, Kalunga koye, nokutwa eengolo moipafi yaJehova, Kalunga koye.
11 Opo nee ove noukwaneumbo woye otamu ka hafela ashishe osho Jehova, Kalunga keni, e mu pa, ove nOvalevi nosho yo ovanailongo ovo ve li mokati keni.
12 “Ngeenge omwa mane okwoongela oshitimulongo ashishe shoilikolomwa yeni momudo omutitatu, omudo woshitimulongo, omu na oku shi pa Ovalevi, ovanailongo, ounona ovo vehe na ooxe* novafiyekadi, notava ka lya tava kuta moilando* yeni.
13 Opo nee oto ka popya moipafi yaJehova, Kalunga koye, kutya: ‘Onda kufa mo oshitukulwa shiyapuki meumbo lange, nonde shi yandja kOvalevi, kovanailongo, kounona ovo vehe na ooxe nokovafiyekadi, ngaashi ashike wa lombwela nge. Inandi nyona, ile ndi lipwililikile oipango yoye.
14 Inandi shi lya ofimbo nda nyika oluhodi, ile ndi kufe mo sha, eshi nda li inandi koshoka, ile ndi yandje mo sha omolwoonakufya. Onda dulika kondaka yaJehova, Kalunga kange, nonda ninga ashishe osho wa lombwela nge.
15 Onghee tala pedu okudja monhele yoye iyapuki, eulu, nokunangeka noupuna oshiwana shoye shaIsrael nosho yo edu olo we tu pa, ngaashi ashike wa anena ootatekulululwa, edu tali kunguluka omashini nomaadi eenyiki.’
16 “Nena eli Jehova, Kalunga koye, ote ku lombwele u diinine omaufomhango nomatokolo aa. Ou na oku a diinina noku a tula moilonga, to shi ningi nomutima woye aushe nosho yo nomwenyo* woye aushe.
17 Nena omwa uda eendjovo odo Jehova a popya kutya ota ningi Kalunga keni, ngeenge omwa kala tamu ende meendjila daye nokudiinina omaufomhango aye, oipango yaye nosho yo omatokolo aye, nongeenge omwa kala tamu pwilikine kondaka yaye.
18 Nena Jehova okwa uda yo eendjovo odo mwa popya kutya otamu ningi oshiwana shaye, ovanhu vaye ve likalekelwa,* ngaashi e mu udanekela, nonokutya otamu ka diinina oipango yaye aishe.
19 Okwa ti yo ote ke mu ningifa mu kale mu dule oiwana ikwao aishe oyo a shita, te mu tange, te mu fimaneke noku mu pa oshinge, eshi tamu ulike kutya omu li ovanhu vayapuki kuJehova, Kalunga keni, ngaashi ashike a udaneka.”
Eshangelo lopedu
^ Eln., “oiimati.”
^ Ile tashi dulika, “a mona oixuna.”
^ Ile “eefiye.”
^ Eln., “moivelo.”
^ Tala Omafatululo oitya.
^ Ile “emona li na ondilo.”
