Deuteronomion 17:1-20
17 “Ino yambela Jehova, Kalunga koye, ongobe yomhedi, ile odi i na oulema, ile i na oupyakadi washa, osheshi otai ka kala oshinima shitondifa kuJehova, Kalunga koye.
2 “Ngeenge omulumenhu, ile omukainhu, oo ha di mushimwe shomoilando, oyo Jehova, Kalunga keni, te mu pe, okwa ningi osho shii momesho aJehova, Kalunga keni, nokwa nyono ehangano laye,
3 nongeenge okwa efa po okulongela Kalunga, ndele ta longele ookalunga vamwe, noku ve linyongamena, ile etango, ile omwedi, ile omatangakwaita aeshe okeulu, oshinima osho inandi shi mu lombwela;
4 ngeenge omwe shi lombwelwa, ile omwe shi uda, omu na okukonakona oshinima osho nawanawa. Ngeenge omwa shilipaleke kutya oshinima osho shitondifa osha ningwa shili muIsrael,
5 omu na okutwala omulumenhu, ile omukainhu oo a longa oilonga oyo ii koivelo yoshilando, nomulumenhu, ile omukainhu oo oku na okudipawa nomamanya.
6 Omunhu oku na okudipawa paendjovo* deendombwedi mbali, ile nhatu. Ke na okudipawa paendjovo dondombwedi imwe aike.
7 Eendombwedi odo odo di na oku mu denga tete nomamanya di mu dipae, opo nee ovanhu aveshe otave ke mu denga. Omu na okukufa mo osho shii mokati keni.
8 “Ngeenge mushimwe shomoilando yeni omwa holoka oupyakadi oo mudjuu kunye okutokola, kutya nee owa kwatela mo etiko lohonde, ile oinima yopamhangu, ile pa longwa oilonga youkolokoshi, ile oinima imwe ya kwatela mo eenhamanana, omu na okufikama nokuya konhele oyo Jehova, Kalunga keni, a hoolola.
9 Indeni kovapristeri Ovalevi nokomutokoli, oo e li ko pefimbo opo, noku va pula, notave ke mu shiivifila osho va tokola.
10 Omu na okukatuka metwokumwe netokolo olo ve mu shiivifila monhele oyo Jehova a hoolola. Ningeni filufilu ashishe osho ve mu lombwela.
11 Omu na okukatuka metwokumwe nomhango oyo tave mu lombwele, nometwokumwe netokolo olo tave mu lombwele. Inamu dina etokolo olo tave mu lombwele. Inamu kandukila kolulyo, ile kolumosho.
12 Omulumenhu oo te lihumbata nai mokuhapwilikina komupristeri oo ta yakula Jehova, Kalunga keni, ile komutokoli, oku na okufya. Omu na okukufa mo osho shii muIsrael.
13 Ovanhu aveshe otave ke shi uda notava ka kala va tila, noitave ke lihumbata vali nai.
14 “Ngeenge omwa i medu olo Jehova, Kalunga keni, te mu pe mu kale mo, ndele eshi mu li mo, tamu ti: ‘Natu lihoololeleni ohamba ngaashi oiwana aishe oyo ye tu dingilila,’
15 moshinima osho, omu na okuhoolola filufilu ohamba oyo Jehova, Kalunga keni, a hoolola. Omu na okuhoolola ohamba mokati kovamwaxo. Inamu pitikwa mu lihoololele omunailongo oo ehe fi omumwaxo.
16 Ke na okulikongela eenghambe dihapu, ile a shunife ovanhu kuEgipiti, opo ve ke likongele eenghambe dihapu, molwaashi Jehova okwe mu lombwela, a ti: ‘Inamu shuna ko vali kuEgipiti nelalakano olo.’
17 Ke na yo okulikongela ovakulukadi vahapu, opo omutima waye uhe mu hongaule; noke na okulikongela oisilveri noingoli ihapu.
18 Ngeenge okwa kala omutumba kolukalwapangelo louhamba waye, oku na okulishangela embo,* ta tape mOmhango oyo ya li ya tuvikilwa kovapristeri Ovalevi.
19 “Oku na oku i diinina, noku i lesha onghalamwenyo yaye aishe, opo e lihonge okutila Jehova, Kalunga kaye, a diinine eendjovo adishe odo di li mOmhango nokudulika komaufomhango oo.
20 Kungaho, omutima waye itau ke linenepekela ovamwaxe, noita ka yapuka mo momalombwelo, a ye kolulyo, ile kolumosho, opo a kale efimbo lile mouhamba waye, ye novanamati vaye mokati kOvaisrael.
