Samuel omutivali 7:1-29
7 Eshi ohamba ya li meumbo* layo, Jehova okwe i amena kovatondi vayo aveshe,
2 noya tya komuprofeti Natan: “Ondi li meumbo la tungifwa omiti domisederi, ofimbo Oshikefa shaKalunga kashili shi li metwali.”
3 Natan okwa nyamukula ohamba ta ti: “Inda, ndele to ningi keshe osho omutima woye wa hala, molwaashi Jehova oku li pamwe naave.”
4 Oufiku oo tuu oo, ondjovo yaJehova oye uya kuNatan, tai ti:
5 “Inda, ndele to lombwele omupiya wange David to ti, ‘Jehova ota ti ngaha: “Mbela oto tungile nge eumbo ndi kale mo?
6 Okudja efiku olo nda mangulula Ovaisrael muEgipiti fiyo okunena, inandi kala nande meumbo, ashike onda kala handi endaenda momatwali nosho yo momatwalihangano.
7 Efimbo alishe olo nda enda pamwe nOvaisrael aveshe* inandi pula nande ovawiliki vomapata aIsrael, ovo nda hoolola va wilike Ovaisrael vange, nda ti: ‘Omolwashike inamu tungila nge eumbo la tungwa nomiti domisederi?’”’
8 Lombwela omupiya wange David to ti, ‘Jehova womatangakwaita ota ti, “Onde ku kufa koufita, oko wa li to lifa oimuna, ndele handi ku ningi omuwiliki woshiwana shange Israel.
9 Ohandi ka kala pamwe naave keshe apa to i, nohandi ka dima* po ovatondi voye aveshe moipafi yoye, nohandi ka tumbalekifa edina loye, notali ka kala ngaashi edina lomunhu a fimana kombada yedu.
10 Ohandi ka hoololela oshiwana shange Israel onhele, ndele handi shi tula mo notashi ka kala mo, noitapa ka kala vali ou te shi piyaaneke. Ovakolokoshi itave ke shi fininika vali ngaashi va ningile nale,
11 okudja efiku olo nda hoolola ovatokoli voshiwana shange Israel. Otashi ka fuda po kovatondi vasho aveshe.
“‘“Natango, Jehova okwe ku lombwela kutya, Jehova ote ke ku tungila eumbo.*
12 Ngeenge owa fi, ndele to pakwa pooxokulululwa, ohandi ka nangeka po oludalo loye, olo tali ku shikula, omonamati woye,* nohandi ka pameka ouhamba waye.
13 Oye ta ka tunga eumbo omolwedina lange, nohandi ka pameka olukalwapangelo louhamba waye fiyo alushe.
14 Ohandi ka ninga xe, nota ka ninga omonamati wange. Ngeenge a ningi epuko, ohandi ke mu pukulula nodibo nosho yo nongola oyo hai longifwa kovana vovanhu.*
15 Ohandi ke mu ulikila alushe ohole i na oudiinini, itandi ke mu efa, ngaashi nda ningila Saul.
16 Eumbo loye nouhamba woye otai ka amenwa fiyo alushe; olukalwapangelo loye otali ka pamekwa fiyo alushe.”’”
17 Natan okwa lombwela David eendjovo adishe odo nemoniko alishe olo.
18 Opo nee David okwe uya, nokwa kala omutumba koshipala shaJehova, ndele ta ti: “Omwene Jehova Omunamapangelo aeshe, aame lyelye, nepata lange olo shike, eshi wa ningila nge oinima aishe oyo?
19 Natango, Omwene Jehova Omunamapangelo aeshe, owa popya yo kombinga yeumbo lomupiya woye fiyo okefimbo lokomesho, nowa yandja elombwelo* kovanhu aveshe, Omwene Jehova Omunamapangelo aeshe.
20 Omwene Jehova Omunamapangelo aeshe, omupiya woye David na tye vali shike, ngeenge ou mu shii nawanawa?
21 Omolweendjovo doye nometwokumwe nomutima woye,* owa ninga oinima aishe oyo nowe i hololela omupiya woye.
22 Omwene Jehova Omunamapangelo aeshe, osho osho she ku ningifa u kale wa tumbala. Kape na umwe e ku fa, oove auke Kalunga kashili; oinima aishe twa uda nomatwi etu oye shi koleka.
23 Oshiwana shilipi kombada yedu sha fa oshiwana shoye Israel? Kalunga okwa xupifa Ovaisrael ve li oshiwana shaye, nokwe liningila edina moku va longela oilonga inene noku va ningila oinima ikumwifi. Owa ta mo oiwana noikalunga yayo moipafi yoshiwana shoye osho we lixupifila muEgipiti.
24 Owa hoolola oshiwana shaIsrael shi ninge oshiwana shoye fiyo alushe; naave Jehova owa ninga Kalunga kasho.
25 “Jehova Kalunga, wanifa po eudaneko olo wa ninga li na sha nomupiya woye neumbo laye fiyo alushe, nou ninge naanaa ngaashi wa udaneka.
26 Edina loye nali tumbalekwe fiyo alushe, opo ovanhu va tye, ‘Jehova womatangakwaita oye Kalunga kaIsrael,’ neumbo lomupiya woye David nali pamenene moipafi yoye.
27 Jehova womatangakwaita, Kalunga kaIsrael, owe shi hololela omupiya woye, eshi wa ti, ‘Ohandi ke ku tungila eumbo.’* Nomolwaasho omupiya woye e na ouladi wokwiilikana kwoove.
28 Omwene Jehova Omunamapangelo aeshe, oove Kalunga kashili, eendjovo doye odo oshili, nowa udanekela omupiya woye oinima oyo iwa.
29 Twikila okunangeka noupuna eumbo lomupiya woye fiyo alushe, molwaashi ove, Omwene Jehova Omunamapangelo aeshe, osho wa udaneka, neumbo lomupiya woye nali nangekwe noupuna fiyo alushe.”
Eshangelo lopedu
^ Ile “mombala.”
^ Eln., “ovanamati vaIsrael.”
^ Eln., “komba.”
^ Ile “ouhamba.”
^ Eln., “oo a dja mwoove.”
^ Ile tashi dulika, “Adam.”
^ Ile “omhango.”
^ Ile “nometwokumwe nehalo loye.”
^ Ile “ouhamba.”
