Samuel omutivali 3:1-39
3 Oita oyo ya li pokati kepata laSaul nepata laDavid oya li ya kwata efimbo lile. David okwa enda ta nghonopala, ashike epata laSaul ola enda tali nghundipala.
2 Lwanima, ovakulukadi vaDavid ove mu dalela ovanamati muHebron. Oshiveli shaye osha li Amnon, a dalwa kuAhinoam, wokuJisreel.
3 Omutivali okwa li Kileab, a dalwa kuAbigail, omufiyekadi waNabal, Omukarmel, nomutitatu okwa li Absalom, omonamati waMaaka, omonakadona waTalmai, ohamba yaGesur.
4 Omutine okwa li Adonia, a dalwa kuHaggit, nomutitano okwa li Sefatia, a dalwa kuAbital.
5 Omutihamano okwa li Itream, a dalwa komukulukadi waDavid, Egla. Ovo ovanamati vaDavid va dalelwa muHebron.
6 Eshi olwoodi olo la li pokati kepata laSaul nepata laDavid la li tali twikile, Abner okwa enda ta nghonopala mepata laSaul.
7 Saul okwa li e na omukulukadi wopomunghulo wedina Rispa, omonakadona waAia. Lwanima, Isboset okwa pula Abner a ti: “Omolwashike wa nangala nomukulukadi watate wopomunghulo?”
8 Abner okwa li a handuka unene omolweendjovo daIsboset, ndele ta ti: “Mbela ame ombwa* yokuJuda? Fiyo onena eli, onda kala handi ulikile epata laxo, Saul, novamwaxe nosho yo ookaume kaye ohole i na oudiinini, noinandi ku kengelela ndi ku yandje momake aDavid, ashike owa ifana nge nena u pe nge oushima omolwenyono li na sha nomukainhu.
9 Kalunga na handukile unene Abner, ngeenge inandi ningila David osho Jehova e mu anena.
10 Okwe mu anena a ti, ota ka kufa ouhamba mepata laSaul, ndele ta diki olukalwapangelo laDavid, a pangele Israel naJuda, okudja kuDan fiyo okuBer-seba.”
11 Isboset ka li ta dulu nande okunyamukula sha Abner, molwaashi okwa li e mu tila.
12 Abner okwa tuma diva ovatumwa kuDavid, ta ti: “Edu eli olalyelye?” Okwa weda ko a ti: “Ninga ehangano naame, nohandi ka ninga ngaashi handi dulu,* opo ndi ningife Ovaisrael aveshe va ame kombinga yoye.”
13 Okwa nyamukula a ti: “Oshi li nawa! Ohandi ningi ehangano naave. Ohandi ku pula ashike u ninge oshinima shimwe; ino uya ko nande kwaame, shapo ongeenge to etelele Mikal, omonakadona waSaul.”
14 Onghee David okwa tuma ovatumwa kuIsboset, omonamati waSaul, ta ti: “Pe nge omukulukadi wange, Mikal, oo nda valeka noipa 100 yOvafilisti yokeexulo doulumenhu.”
15 Opo nee Isboset okwa tuma Mikal a ka talwe ko komushamane waye, Paltiel, omonamati waLais.
16 Ashike omushamane waye okwa ya pamwe naye, e mu shikula ta lili fiyo okuBahurim. Abner okwa tya kuye: “Shuna!” Opo nee okwa shuna.
17 Lwanima, Abner okwa tuma etumwalaka kovakulunhu vaIsrael, ta ti: “Omwa kala oule wefimbo mwa hala David a ninge ohamba yeni.
18 Katukeni onghatu paife, osheshi Jehova okwa lombwela David a ti: ‘Ohandi ka xupifa oshiwana shange Israel momake Ovafilisti nomomake ovatondi vavo aveshe, okupitila momupiya wange David.’”
19 Opo nee Abner okwa popya novanhu vomuBenjamin. Natango Abner okwa popya meholeko naDavid, puHebron, e mu lombwele osho Ovaisrael nepata alishe laBenjamin va udafana.
20 Eshi Abner e uya kuDavid muHebron pamwe novalumenhu 20, David okwe mu longekidila eendja, pamwe novalumenhu ovo a li navo.
21 Opo nee Abner okwa tya kuDavid: “Ohandi i ndi ka ifane Ovaisrael aveshe ndi va ete komwene wange ohamba, opo va ninge ehangano naave, noto ka ninga ohamba yoitukulwa aishe oyo wa hala.”* Onghee David okwa lekela Abner, ndele ta i nombili.
22 Diva konima yaasho, ovapiya vaDavid nosho yo Joab, ova aluka kolwoodi va etelela oixuulwa* ihapu. Pefimbo opo, Abner ka li vali naDavid muHebron, molwaashi okwa hangwa e mu lekela, ndele ta i nombili.
23 Eshi Joab netangakwaita alishe, olo a li pamwe nalo, va fika, Joab okwa lombwelwa taku ti: “Abner, omonamati waNer, okwe uyile kohamba, noye mu lekela, ndele ta i nombili.”
24 Opo nee Joab okwa ya kohamba, ndele ta ti: “Owa ninga ngahelipi ngaho? Onda uda kutya Abner okwe uyile kwoove. Omolwashike we mu lekela a dule okufaduka po?
25 Ou shii kutya Abner, omonamati waNer, okwe uyile oku e ku ende medu, e ku shiive nawa noku shiive keshe osho to ningi.”
26 Onghee Joab okwa dja po puDavid, ndele ta tumu ovatumwa va shikule Abner, nove mu kufa ko kondungu yomuSira, ashike David ka li e shii osho tashi ningwa po.
27 Eshi Abner a alukila kuHebron, Joab okwa ya naye meni, pomunghulo womuvelo woshilando, a ka popye naye ve li ovo aveke. Opo nee okwe mu twa medimo, ndele ta fi; osho okwe shi ninga, molwaashi okwa dipaa* omumwainamati, Asahel.
28 Eshi David e shi uda, okwa ti: “Ame nouhamba wange katu na etimba fiyo alushe koshipala shaJehova omolwohonde yaAbner, omonamati waNer.
29 Joab noukwaneumbo aushe waxe nau hangike koilanduliko omolwoshinima osho. Ovalumenhu aveshe vomeumbo laJoab nava kale tava di omahiyoyo, ile ve na oshilundu, ile tava longifa oshiti shokuhodilifa,* ile tava dipawa neongamukonda, ile vehe na oikulya!”
30 Onghee Joab nomumwaina, Abisai, ova dipaa Abner, molwaashi okwa dipaa mumwaina, Asahel, molwoodi muGibeon.
31 David okwa tya kuJoab nokovanhu aveshe ovo a li navo: “Pombauleni oikutu yeni, ndele tamu djala eeshako nokulila Abner.” Ohamba David oya li tai ende popepi nolutala.
32 Abner ove mu paka muHebron; ohamba oya lilila Abner pombila yaye, novanhu aveshe ove mu lila.
33 Ohamba oya totela Abner eimbilo ya ti:
“Mbela Abner oku na ashike okufya ngaashi elai?
34 Omake oye kaa li a mangwa,Neemhadi doye kada li momalyenge.*
Owa fya ngaashi omunhu a dipawa keembudi.”*
Opo nee ovanhu aveshe ove mu lila natango.
35 Lwanima, efimbo lomutenya, ovanhu aveshe ove uya okupa David omungome woku mu pameka,* ashike David okwa ana, ta ti: “Kalunga na handukile nge unene, ngeenge onda makele omungome, ile oshikulya keshe, ofimbo etango inali ningina!”
36 Ovanhu aveshe ove shi didilika, nosha li she va hafifa. Keshe osho ohamba ya ninga, osha li sha hafifa ovanhu aveshe.
37 Onghee ovanhu aveshe nOvaisrael aveshe, ova li va shiiva mefiku olo kutya, ohamba hayo ya dipaifa Abner, omonamati waNer.
38 Opo nee ohamba oya tya kovapiya vayo: “Mbela kamu shi shii kutya omuwiliki nomulumenhu a tumbala, okwa fya nena eli muIsrael?
39 Kandi na eenghono nena, nonande onda vaekwa ndi ninge ohamba, novalumenhu ava, ovanamati vaSerua, ovakolokoshi unene. Jehova na handukile omukolokoshi, she likolelela koilonga yaye ii.”
Eshangelo lopedu
^ Eln., “omutwe wombwa.”
^ Eln., “tala, eke lange oli li pamwe naave.”
^ Ile “oyo omwenyo woye wa hala.”
^ Ile “omaliko oo a xupa po konima yolwoodi.”
^ Eln., “omolwohonde.”
^ Tashi dulika tashi ulike komulumenhu woshilema ta longo oilonga oyo i na okulongwa komukainhu.
^ Eln., “ongopolo.”
^ Eln., “kovanamati vovakolokoshi.”
^ Ile “omungome woluhodi.”
