Samuel omutivali 22:1-51
22 David okwa imbila Jehova eimbilo eli mefiku olo Jehova e mu xupifa momake ovatondi vaye aveshe nomomake aSaul.
2 Okwa ti:
“Jehova oye oshikulundudu shange nouhondameno wange wa pama, noye ta xupifa nge.
3 Kalunga kange oye emanya lange, omo handi ka konga eameno,Oye oshikelelifo shange noluvinga* lange lexupifo,* eameno lange, omo handi ka hondama,*Konhele oko handi tondokele, omuxupifi wange, oo a xupifa nge koukolokoshi.
4 Ohandi kongo ekwafo kuJehova, oo a wana okutangwa,Nota ka xupifa nge kovatondi vange.
5 Omakufikufi efyo okwa li a dingilila nge.
Ouhapu wovakolokoshi owa tilifa nge, ngaashi omeva efundja.
6 Eengodi dOmbila* oda li da dingilila nge.
Onda li nda taalela eemwiyo defyo.
7 Moudjuu wange, onda ifana Jehova,Onda kala nokwiifana Kalunga kange.
Okwa uda ondaka yange okudja motembeli yaye,Naashi nde mu pula ekwafo, okwa* pwilikina.
8 Edu nomamanya oya hovela okukakama ya yuka kombinga imwe nokombinga ikwao,Omakanghameno okeulu okwa kakama,Nokwa twikila okukakama, molwaashi okwa li a handukifwa.
9 Omwifi owa dja momayulu aye,Nomokanya kaye omwa dja omundilo wa hanya,Muye omwa dja omakala a xwama omundilo.
10 Eshi a li ta londoloka, okwa lemena eulu pedu,Nokoshi yeemhadi daye okwa li oilemo ilaula.
11 Okwe uya ta tuka, a londa komukerubi.
Omweengeli okwa li a fa e mu humbata komavava aye.
12 Okwa li a dingililwa komilaulu di li onga onhele yayeKoilemo ilaula i yadi omeva.
13 Mouyelele oo wa li puye omwa dja omakala omundilo a tema.
14 Opo nee Jehova okwa hovela okungungumifa omungungumo wa dja meulu;Ondaka yOmukombadambada oya udika.
15 Okwa umba oikuti yaye, ndele te va halakanifa;Okwe va ngwangwaneka noluvadi.
16 Oukukutu wefuta owe uya kombada,Nomakanghameno edu okwa hololwa kehandu laJehova,Omolwomufudo u na eenghono, oo wa dja momayulu aye.
17 Okwa lovelela nge okudja pombada,Ndele ta kwata nge, nokwa nana nge momeva male.
18 Okwa xupifa nge kovatondi vange ovanaenghono,Kwaavo ve tonde nge, ovo va li ovanaenghono ve dule nge.
19 Ova ponokela nge mefiku loudjuu wange,Ndele Jehova okwa li ta yambidida nge.
20 Okwa twala nge konhele ya amenwa;Okwa amena nge, molwaashi okwa li a hokwa nge.
21 Jehova okwa pa nge ondjabi omolwouyuki wange.
Okwa pa nge ondjabi omolwomake ange ehe na etimba.*
22 Onda diinina eendjila daJehova,Noinandi fiya po Kalunga, molwaashi oshi li oshinima shii.
23 Ohandi dimbuluka omalombwelo aye aeshe,Noitandi yapuka mo meenghedimhango daye.
24 Onda tokola okukala ndihe na etimba koshipala shaye,Nohandi likelele ndiha nyone.
25 Jehova na pe nge ondjabi omolwouyuki wange,Nomolwokuhe na etimba kwange koshipala shaye.
26 Oho kala omudiinini kwaao e li omudiinini kwoove;Omulumenhu,* oo omuyuki,* oto ungaunga naye pauyuki;
27 Kovanashili elela, oto kala omunashili,Ashike omukengeleledi oto ke mu enda medu.
28 Oto xupifa ovalininipiki,Ashike ou wete nou tonde ovalinenepeki, noto ke va katukila onghatu.
29 Jehova, oove olamba yange;Jehova oye ha minikile nge, ngeenge ndi li momilaulu.
30 Kekwafo loye, ohandi dulu okulwifa etangakwaita;Ohandi dulu okunhuka ekuma keenghono daKalunga.
31 Eendjila daKalunga kashili oda wanenena;Omalombwelo aJehova okwa yela.
Oye oshikelelifo kwaaveshe ovo tava kongo eameno muye.
32 Olyelye vali Kalunga ehe fi ashike Jehova?
Olyelye emanya ehe fi Kalunga ketu?
33 Kalunga kashili oye ongulu yange yehondameno ya pama,Nota ka lalakanifa omalila ange.
34 Ota ningifa eemhadi dange di kale hadi endelele, ngaashi omakondo oholongo;Ota fikameke nge koikulundudu iyapuki.
35 Omake ange ote a deulile olwoodi;Omaoko ange otaa dulu okulema outa wongopolo.
36 Owa pa nge oshikelelifo shoye shexupifo,Elininipiko loye ola tumbalekifa nge.
37 Owa mbwalangadjeka* ondjila yeemhadi dange,Eemhadi dange itadi fenunguta.
38 Ohandi ka taataa ovatondi vange, noku va hanauna po;Itandi aluka, fiyo osheshi va kombwa po sheke.
39 Ohandi ke va komba po noku va nyanyaula, opo vaha penduke po vali;Ohandi ke va lyataula neemhadi dange.
40 Oto ka longekidila nge olwoodi mokupa nge eenghono;Oto ka kwafela nge ndi finde ovatondi vange.
41 Oto ka ningifa ovatondi vange va faduke nge po;*Ohandi ka xulifa po* ovo ve tonde nge.
42 Otava kongo ekwafo, ashike kape na ou te va xupifa;Otava lilile Jehova ekwafo, ndele ite va nyamukula.
43 Ohandi ke va nyanyaula filufilu, ndele tava kala ngaashi ondwi yedu;Ohandi ke va denga noku va tyanghaula ngaashi onhata momapandavanda.
44 Oto ka xupifa nge komatimba oo ovanhu tava valulile nge.
Oto ka amena nge ndi ninge omuwiliki* woiwana;Nokuli novanhu ovo ndihe shii otava ka longela nge.
45 Ovanailongo otava ka twila nge eengolo va tila;Osho va uda kombinga yange otashi ke va ningifa va dulike kwaame.*
46 Ovanailongo otava ka kanifa ouladi;*Otave ke uya tava kakama okudja keenhele davo deameno.
47 Jehova omunamwenyo! Tangeni Emanya lange!
Kalunga, emanya lexupifo lange, na tumbalekwe.
48 Kalunga kashili ote va handukile ponhele yange;Ovanhu ote va tula koshi yewiliko lange;
49 Oha amene nge kovatondi vange.
Oho yelula nge pombada, opo ovatondi vange vaha ponokele nge;Owa xupifa nge komulumenhu omukolokoshi.
50 Onghee ohandi ku pandula, Jehova, mokati koiwana,Ohandi ku imbile* handi tange edina loye:
51 Oha xupifa* ohamba yaye meenghedi dikumwifi;Okwa ulikila omuvaekwa waye ohole i na oudiinini,David noludalo laye fiyo alushe.”
Eshangelo lopedu
^ Tala Omafatululo oitya.
^ Ile “omuxupifi wange omunaenghono.”
^ Ile “onhele ya amenwa.”
^ Sha hala okutya, koufi. Tala Omafatululo oitya.
^ Eln., “omatwi aye.”
^ Eln., “oukoshoki.”
^ Ile “a koshoka.”
^ Eln., “Omunaenghono.”
^ Ile “nenepeka.”
^ Ile “va pilamene nge.”
^ Eln., “mweneka.”
^ Ile “omutwe.”
^ Eln., “moku shi uda nomatwi avo, otava ka dulika kwaame.”
^ Ile “Ouladi otau kana po.”
^ Ile “Ohandi imbi nomusika.”
^ Ile “etele efindano linene.”
