Samuel omutivali 15:1-37
15 Konima yoinima aishe oyo, Absalom okwe likongela etemba, eenghambe novalumenhu 50 ve mu pitile komesho.
2 Absalom okwa kala ha penduka ongula inene, ndele ta kala ofika popepi nondjila oyo ya finda koshivelo shoshilando. Ngeenge okwa di omunhu e na oshikoya shopamhangu shi ka tokolwe kohamba, Absalom okwa li he mu ifana, ndele ta ti: “Owa dja koshilando shilipi?” nomunhu oo oha ti: “Omupiya woye okwa dja mulimwe lomomapata aIsrael.”
3 Absalom ohe mu lombwele kutya: “Tala, oshikoya shoye oshi li mondjila noshi li pauyuki, ndele kohamba kaku na nande oumwe te ke shi pwilikina.”
4 Natango Absalom oha ti: “Ngeno aame nda hoololelwe ndi kale handi tokola moshilongo omu, ngeno keshe umwe oo e na oshikoya shopamhangu ote ke uya kwaame, ndele handi shilipaleke kutya oshikoya shaye osha ungaungiwa nasho pauyuki.”
5 Ndele ngeenge omunhu a ehene popepi naye e mu twile eengolo, Absalom ohe mu lovelele neke, nohe mu kwata, ndele te mu xupita.
6 Osho osho Absalom a li ha ningile Ovaisrael aveshe ovo tave uya kohamba va tokolwe. Onghee Absalom okwa kala ta heke Ovaisrael va amuke ko kohamba.*
7 Pexulilo lomido nhee,* Absalom okwa lombwela ohamba a ti: “Alikana, pitike nge ndi ye kuHebron ndi ka wanife po eudaneko olo nda udanekela Jehova.
8 Osheshi omupiya woye eshi a li ha di muGesur, muSiria, okwa ninga eano a ti: ‘Ngeenge Jehova a shunifa nge kuJerusalem, ohandi ka yambela* Jehova.’”
9 Opo nee ohamba oya tya: “Inda nombili.” Onghee Absalom okwa fikama, ndele ta i kuHebron.
10 Absalom okwa tuma eendaadi momapata aeshe aIsrael, a ti: “Diva ashike ngeenge mwa udu ewi lenghuma, ‘Ingideni tamu ti, Absalom okwa ninga ohamba muHebron!’”
11 Opo nee Absalom okwa ya ko pamwe novalumenhu 200 va dja muJerusalem; ovalumenhu ovo ova li va ifanwa nova ya ombadilila, nokava li ve shii osho tashi ningwa po.
12 Konima eshi Absalom a yamba omayambo, okwa tuma a ifanenwe Ahitofel, Omugilo, omuyandjimayele* waDavid, a dja koshilando shavo Gilo. Omhangela yaAbsalom oya kala tai pondola, nomuvalu wovanhu ovo tave mu yambidida owa enda tau hapupala.
13 Lwanima, puDavid ope uya omunhu te mu lombwele kutya: “Ovalumenhu Ovaisrael paife otava yambidida Absalom.”
14 Opo nee David okwa lombwela diva ovapiya vaye aveshe ovo a li navo muJerusalem, a ti: “Fikameni, tu fadukei po, osheshi kape na nande oumwe womufye ta ka dula okufaduka po Absalom! Endeleleni, molwaashi pamwe ote tu hange diva, ndele te tu etele oshiponga, nokuhanauna po oshilando neongamukonda!”
15 Ovapiya vohamba ove i nyamukula va ti: “Keshe osho omwene wetu ohamba ta tokola, ovapiya voye ove lilongekida oku shi ninga.”
16 Onghee ohamba oya ya pamwe noukwaneumbo wayo aushe we i shikula, ashike oya fiya po ovakulukadi vopomunghulo ve li omulongo va pashukile eumbo.*
17 Ohamba oya twikila nondjila yayo pamwe novanhu aveshe ovo ve i shikula, nova tula puBet-merhak.
18 Ovapiya vayo aveshe ovo va li nayo* nOvakereti aveshe, Ovapleti nOvagat, ovalumenhu 600 ovo va li ve i shikula okudja kuGat, ova pita po ofimbo ohamba ya li tai va konenene.*
19 Ohamba oya tya kuIttai, Omugat: “Omolwashike naave u na okuya nafye? Shuna u ka kale nohamba ipe, molwaashi ove omunailongo nowa tauka ko koshilongo sheni.
20 Owe uyile onghela, ndele ongahelipi u na okuya naame nena keshe apa handi i? Shuna pamwe novamwaxo, na Jehova ne ku ulikile kutya oku ku hole nohole i na oudiinini nonokutya omulineekelwa.”
21 Ashike Ittai okwa nyamukula ohamba, a ti: “Ohandi ane medina laJehova Kalunga omunamwenyo, kutya ofimbo u na omwenyo omwene wange ohamba, keshe apa omwene wange ohamba to kala, kutya nee otashi pula omwenyo, ile efyo, omupiya woye naye opo ta kala!”
22 David okwa tya kuIttai: “Inda, ndele to tauluka efilu.” Onghee Ittai, Omugat, okwa tauluka efilu pamwe novakwaita vaye aveshe nosho yo ounona.
23 Keshe umwe moshilando okwa li ta lili mokule, eshi ovanhu aveshe tava tauluka, nohamba oya li ya fikama pefilu laKidron; ovanhu aveshe ova li tava taulukile kondjila oyo ya finda mombuwa.
24 Sadok naye opo a li pamwe nOvalevi aveshe ovo va humbata oshikefa shehangano laKalunga kashili, nova tula Oshikefa shaKalunga kashili pedu; Abjatar naye opo a li fiyo osheshi ovanhu aveshe ovo tava di moshilando va mana okutauluka.
25 Ashike ohamba oya tya kuSadok: “Shunifa Oshikefa shaKalunga kashili moshilando. Ngeenge Jehova okwa fila nge onghenda, ota ka alula nge nohandi ka mona oshikefa osho nosho yo onhele apa tashi ka kala.
26 Ndele ngeenge okwa ti, ‘Ame inandi ku hokwa,’ na ningile nge keshe osho tashi mu wapalele.”
27 Ohamba oya tya komupristeri Sadok: “Hano ove ku fi omulumenhu oo e shii nawa ehalo laKalunga? Shuna nombili koshilando, to i nomonamati woye Ahimas nosho yo Jonatan, omonamati waAbjatar.
28 Tala, ohandi ka kala kominghulo dombuwa fiyo osheshi wa tumina nge etumwalaka u shiivifile nge shi na sha nonghalo yomoshilando.”
29 Onghee Sadok naAbjatar ova shunifa Oshikefa shaKalunga kashili kuJerusalem, nova kala oko.
30 Eshi David a li ta i kOmhunda* yEemono, okwa enda ta lili; okwa li ta ende eemhadi kombada, nokwe liuvika komutwe. Ovanhu aveshe ovo a li pamwe navo, navo ova li ve liuvika komitwe nova enda tava lili.
31 David okwa lombwelwa taku ti: “Ahitofel naye oumwe womwaavo va ama kombinga yaAbsalom.” Opo nee David okwa ti: “Alikana, Jehova, omayele* aAhitofel naa talike ko a nyika oulai!”
32 Eshi David a ya koxulo yomhunda, oko ovanhu va li have linyongamene Kalunga, Husai, Omuarki, oko a li e uya oku mu shakeneka a djala oshikutu sha pombauka noku na edu momutwe waye.
33 Ashike David okwa tya kuye: “Ngeenge owa tauluka u ye pamwe naame, oto ka kala omutengi kwaame.
34 Ndele ngeenge owa shuna koshilando, ndele to lombwele Absalom to ti, ‘Ame omupiya woye ohamba; nale onda li omupiya waxo, ashike paife ame omupiya woye,’ ngaho opo ashike to ka kwafela nge nokuponyifa eemhangela daAhitofel.
35 Hano kamu li pamwe nomupristeri Sadok nosho yo Abjatar? Lombwela omupristeri Sadok nosho yo Abjatar oinima aishe oyo wa uda meumbo lohamba.
36 Tala, puvo ope na ovanamati vavo vavali, Ahimas, omonamati waSadok, naJonatan, omonamati waAbjatar, onghee ashishe osho wa uda shi tumine nge okupitila muvo.”
37 Eshi Absalom a li ta i muJerusalem, Husai, kaume* kaDavid, okwa ya moshilando.
Eshangelo lopedu
^ Eln., “okwa kala ta yulu omitima dOvaisrael.”
^ Ile tashi dulika, “lomido 40.”
^ Ile “longela.”
^ Ile “omupukululi.”
^ Ile “ombala.”
^ Ile “va taulukila kombinga yayo.”
^ Ile “ova tauluka koshipala shohamba.”
^ Ile “ta londo.”
^ Ile “omapukululo.”
^ Ile “omulineekelwa.”
