Omafimbo omativali 24:1-27
24 Joas okwa li e na eedula heyali, eshi a ninga ohamba, nokwa pangela muJerusalem oule weedula 40. Edina laina oSibia, a dja kuBer-seba.
2 Joas okwa twikila okulonga osho sha yuka momesho aJehova efimbo alishe olo omupristeri Jehoiada a kala nomwenyo.
3 Jehoiada okwe mu kongela ovakulukadi vavali, nokwa dala ovanamati novanakadona.
4 Okudja opo, Joas okwa li a halelela momutima waye okuwapekulula eumbo laJehova.
5 Onghee okwa ongela ovapristeri nOvalevi, ndele ta ti kuvo: “Indeni moilando yaJuda, ndele tamu ongele oimaliwa okudja kOvaisrael aveshe, opo eumbo laKalunga keni li wapekululwe odula keshe; omu na okukatuka onghatu diva moshinima eshi.” Ashike Ovalevi kava li va katuka onghatu diva.
6 Onghee ohamba oya ifana Jehoiada, omupristeri omukulunhu, ndele tai ti kuye: “Omolwashike ino lombwela Ovalevi va ete oifendela iyapuki okudja muJuda nomuJerusalem, oyo ya popiwa kuMoses, omupiya waJehova, oifendela iyapuki yeongalo laIsrael, yokulongifwa metwali, omo mu na oshikefa shOipelende yOumbangi?
7 Ovanamati vaAtalia, omukainhu oo omukolokoshi, ove livakela meumbo laKalunga kashili, ndele tava longifa oinima aishe iyapuki yomeumbo laJehova, eshi tava longele ooBaal.”
8 Opo nee palombwelo lohamba, opa li pa ningwa okakefa, ndele taka tulwa pondje poshivelo sheumbo laJehova.
9 Ovakalimo vomuJuda novomuJerusalem ova li va shiivifilwa va etele Jehova oifendela iyapuki oyo Moses, omupiya waKalunga kashili, a li a lombwela Ovaisrael mombuwa.
10 Omalenga aeshe novanhu aveshe ova li va hafa nova twikila okutwala omayambidido noku a tula mokakefa fiyo osheshi ka yada.*
11 Ngeenge Ovalevi va twala okakefa ka ka ye kohamba, ndele tava mono kutya omu na oimaliwa ihapu, hamushanga wohamba nomuwiliki womupristeri omukulunhu ohave uya, ndele tave i kufa mo, opo nee ohave ka shunifa ponhele yako. Osho osho va li hava ningi efiku nefiku, nova li va ongela oimaliwa ihapu.
12 Opo nee ohamba naJehoiada ohave i yandje kwaavo tava pashukile oilonga yomeumbo laJehova, nohava kutu ovahongi vomamanya novahambwidi va wapekulule eumbo laJehova nosho yo ovalongi voshivela shilaula nongopolo, va wapekulule eumbo laJehova.
13 Ovo va li tava pashukile oilonga ova hovela, noilonga yokuwapekulula oya xuma komesho koshi yepashukilo lavo, nova tungulula eumbo laKalunga kashili, ngaashi la li nale, nove li pameka.
14 Diva eshi va mana, ova twala oimaliwa, oyo ya xupa po, kohamba nokuJehoiada, nove i longifa okuninga oilongifo yeumbo laJehova, oilongifo oyo hai longifwa mokuyakula, mokuyamba omayambo, omakopi nosho yo oilongifo yoshingoli noyoshisilveri. Ova kala hava yambe omaxwikiloyambo pandjikilile keumbo laJehova omafiku aeshe okukalamwenyo kwaJehoiada.
15 Jehoiada okwa fya, eshi a kulupa nokwa li e na eedula dihapu; okwa fya, eshi a li e na eedula 130.
16 Onghee ove mu paka mOshilando shaDavid pamwe neehamba, omolwouwa aushe oo a longela Ovaisrael, Kalunga kashili nosho yo eumbo laye.
17 Konima eshi Jehoiada a fya, omalenga aJuda okwe uya, ndele tae linyongamene ohamba, nohamba oya li ya pwilikina kuo.
18 Ova fiya po eumbo laJehova, Kalunga kooxekulululwa, ndele tava hovele okulongela eepala diyapuki* nosho yo oikalunga. Onghee Kalunga okwa li a handukila* Juda naJerusalem omolwomanyono avo.
19 Jehova okwa twikila oku va tumina ovaprofeti ve va alulile kuye, nokwa twikila oku va londwela,* ashike ova anya okupwilikina.
20 Omhepo yaKalunga oye uya* kuSakaria, omonamati womupristeri Jehoiada, nokwa fikama komesho yovanhu, ndele ta ti kuvo: “Eshi osho Kalunga kashili a ti, ‘Omolwashike tamu nyono oipango yaJehova? Itamu ka pondola! Molwaashi omwa efa po Jehova, naye ote ke mu efa po.’”
21 Ashike ova li ve mu pangelela omhangela, ndele tave mu dipaele moshihale sheumbo laJehova nomamanya, palombwelo lohamba.
22 Onghee ohamba Joas kaya li ya dimbuluka ohole i na oudiinini oyo xe,* Jehoiada, e mu ulikila, nokwa dipaa omonamati waye, oo a popya, eshi a li pokufya, ta ti: “Jehova ne ku handukile omolwoilonga yoye.”
23 Pehovelo lomudo,* etangakwaita lOvasiria ole uya okulwifa Joas nola ponokela Juda naJerusalem. Opo nee ola dipaa omalenga aeshe ovanhu, nola tumina oixuulwa* yavo aishe kohamba yaDamaskus.
24 Nonande etangakwaita laSiria, olo la li le va ponokela, ola li li na omuvalu munini wovalumenhu, Jehova okwa yandja etangakwaita la kula neenghono momake avo, molwaashi ova li va efa po Jehova, Kalunga kooxekulululwa. Onghee ova* wanifa po etokolo li na sha nokuhandukila Joas.
25 Eshi ve mu efa (molwaashi ova li ve mu fiya ve mu yahameka neenghono*), ovapiya vaye ove mu pangelela omhangela, molwaashi okwa li a tilashi ohonde yovanamati* vomupristeri Jehoiada. Ove mu dipaela pombete yaye. Onghee okwa fya, ndele tave mu pake mOshilando shaDavid, ashike inave mu paka meenhele dokupaka eehamba.
26 Ava ve mu pangelela omhangela ovo: Sabad, omonamati waSimeat, Omuammoni, naJosabad, omonamati waSimrit, Omumoab.
27 Shi na sha novanamati vaye, omalondwelo mahapu, oo a pewa, nosho yo okuwapekulula eumbo laKalunga kashili, oinima aishe oyo oya shangwa momambo* eehamba. Omonamati waye, Amasia, okwa ninga ohamba ponhele yaye.
Eshangelo lopedu
^ Ile tashi dulika, “fiyo osheshi aveshe va yandja.”
^ Tala Omafatululo oitya.
^ Eln., “opa li ehandu.”
^ Ile “oku va pa oundombwedi u li omhinge navo.”
^ Eln., “oya uvika.”
^ Sha hala okutya, xe yaSakaria.
^ Eln., “eshi omudo we uya ko.”
^ Ile “omaliko oo a xupa po konima yolwoodi.”
^ Sha hala okutya, Ovasiria.
^ Ile “nomikifi dihapu.”
^ Ile “yomonamati.” Tashi dulika pauhapu tashi ulike ketumbalo.
^ Ile “momashangelo; momahokololo.”
