Omafimbo omativali 19:1-11
19 Josafat, Ohamba yaJuda okwa alukila keumbo* laye muJerusalem, e li nawa.*
2 Jehu, omonamati waHanani, omumonikokule, okwa ya e ke mu shakeneke, ndele ta ti kohamba Josafat: “Mbela ou na okukwafela ovakolokoshi nokukala u hole ovo ve tonde Jehova? Jehova okwe ku handukila neenghono omolwoshinima osho.
3 Kakele kaasho, Kalunga okwa mona sha shiwa mwoove, molwaashi owa hanauna po eepala diyapuki* moshilongo nowe lilongekida momutima woye* okukonga Kalunga kashili.”
4 Josafat okwa twikila okukala ha di muJerusalem, nokwa ya vali kovanhu, okudja muBer-seba fiyo okoshitukulwa shokeemhunda shaEfraim, te va ladipike va alukile kuJehova, Kalunga kooxekulululwa.
5 Okwa nangeka po yo ovatokoli moshilongo ashishe shaJuda, moilando ya dingililwa komakuma a pama, oshilando noshilando.
6 Okwa lombwela ovatokoli, a ti: “Yandjeni elitulemo kwaasho tamu ningi, molwaashi itamu tokola omolwovanhu, ndele omolwaJehova, noku li pamwe nanye, eshi tamu tokola.
7 Kaleni hamu tila Jehova. Lungameneni osho tamu ningi, molwaashi Jehova, Kalunga ketu, ke hole osho inashi yuka, ke na okatongo noiha tambula ombubo.”
8 Natango, Josafat okwa nangeka po muJerusalem vamwe vomOvalevi navamwe vomovapristeri nosho yo omitwe dimwe domaukwaneumbo omapata aIsrael va longe ve li ovatokoli vaJehova nokupongolola po oibofa yopamhangu yovakalimo vomuJerusalem.
9 Okwe va lombwela, a ti: “Longeni oilonga yeni mu fimaneke filufilu Jehova, mu longeleni noudiinini nosho yo nomutima weni aushe:
10 Ngeenge ovamwaxo, ovo hava di moilando yavo, ove mu etele oshibofa sha kwatela mo etiko lohonde, ile epulo li na sha nomhango, oshipango, omaufomhango, ile omatokolo, omu na oku va londwela, opo vaha kale ve na etimba koshipala shaJehova; ngeenge hasho, Kalunga ote ke mu handukila nosho yo ovamwaxo. Osho osho mu na okuninga, opo muha kale mu na etimba.
11 Ou oAmaria, omupristeri omukulunhu, ou te mu pashukile moshinima keshe shi na sha naJehova. Sebadia, omonamati waIsmael, oye omuwiliki weumbo laJuda moshinima keshe shi na sha nohamba. Ovalevi otava ka longa ve li ovapashukili veni. Kaleni mwa pama nokulonga noudiinini. Jehova na kale pamwe naavo tava longo osho shiwa.”*
Eshangelo lopedu
^ Ile “kombala.”
^ Ile “nombili.”
^ Tala Omafatululo oitya.
^ Ile “nomutima woye owa tokola.”
^ Ile “pamwe nakeshe osho shiwa.”
