Timoteus wotete 4:1-16
4 Eendjovo da nwefwa mo* oda popya sha yela kutya monakwiiwa ovanhu vamwe otava ka efa po eitavelo notava ka pwilikina keendjovo doipupulu* odo tadi monika da fa da dja kuKalunga notava ka pwilikina komahongo eendemoni.
2 Otava ka pwilikina yo komapopyo oipupulu ovalumenhu ovanaihelele, ovo va dipaa eliudo lavo la fa la xwikwa noshixwikifo.
3 Ovalumenhu ovo ohava kelele ovanhu vaha hombole nohave va lombwele ve lidilike oikulya nonande Kalunga okwe i shita, opo i liwe nolupandu kwaavo ve na eitavelo nove shii nawanawa oshili.
4 Keshe osho Kalunga a shita oshiwa, nokape na osho tashi dulu okweekelwashi ngeenge osha tambulwa ko nolupandu,
5 osheshi osha yapulwa okupitila meendjovo daKalunga nokeilikano.
6 Ngeenge owa kala ho yandje omayele oo kovamwatate, oto ka kala omuyakuli muwa waKristus Jesus, wa palulwa keendjovo doshili* nokomahongo a yuka oo ho tula moilonga filufilu.
7 Henuka omahokololo oipupulu neendjovo domasheko, ngaashi odo hadi popiwa kovakainhu vamwe ovanamido. Ndele lideula okukala u na etilokalunga.
8 Edeulo lopalutu oli na ekwafo linini, ndele okulideula metilokalunga otaku kwafele moinima aishe molwaashi otaku eta omanangeko noupuna monghalamwenyo paife nosho yo monakwiiwa.
9 Eendjovo odo odoshili nohatu dulu oku di lineekela filufilu.
10 Nomolwaasho hatu longo noudiinini nohatu kendabala twa mana mo molwaashi otwe lineekela muKalunga omunamwenyo, Omuxupifi wovanhu vomaludi aeshe, unene tuu ovo ve li ovadiinini.
11 Kala ho va pe omalombwelo oo noku va honga.
12 Ino efa nande oumwe a kale e ku dina eshi u li omunyasha. Ndele tulila po ovadiinini oshihopaenenwa shiwa ngeenge tashi uya pokupopya, elihumbato, ohole, eitavelo nosho yo oukoshoki.
13 Twikila okukala ho lesha moipafi nelitulemo, okukumaida* nokuhonga fiyo osheshi handi uya.
14 Ino hepifa oshali oyo wa pewa eshi ovakulunhuongalo ve ku tenheka omake avo, oyo wa xunganekelwa kovaprofeti.
15 Dilonga kombinga yoinima oyo noku i diinina, opo exumokomesho loye li monike filufilu kovanhu aveshe.
16 Lipashukila ove mwene nosho yo ehongo loye. Kendabala okuwanifa po oinima oyo, molwaashi ngeenge owa ningi ngaho, oto lixupifa ove mwene nosho yo ovo tave ku pwilikine.
Eshangelo lopedu
^ Eln., “Omhepo.”
^ Eln., “keemhepo dipukifi.”
^ Eln., “keendjovo deitavelo.”
^ Ile “okutwa omukumo.”
