Samuel wotete 25:1-44
25 Mokweendela ko kwefimbo, Samuel okwa ka fya. Opo nee Ovaisrael aveshe ova ongala ve mu lile nove mu paka peumbo laye muRama. Konima yaasho, David okwa fikama, ndele ta i kombuwa yaParan.
2 Pefimbo opo, muMaon omwa li omulumenhu oo ha ka longela kuKarmel.* Omulumenhu oo okwa li a punapala unene. Okwa li e na eedi 3 000 noikombo 1 000, nokwa li a ka kululila eedi daye kuKarmel.
3 Edina lomulumenhu oo ola li Nabal, nedina lomukulukadi waye oAbigail. Omukulukadi waye okwa li muwa noku na eendunge, ashike omushamane, Omukaleb, okwa li e na onyanya noku na eenghedi dii.
4 Eshi David a li mombuwa, okwa uda kutya Nabal ota kulula eedi daye.
5 Opo nee David okwa tuma kuye ovalumenhu ovanyasha omulongo, nokwe va lombwela ta ti: “Indeni kuKarmel, ndele ngeenge omwa mono Nabal, mu lombweleni kutya onda hala okuuda ngeenge oku li ngoo nawa.
6 Mu lombweleni yo kutya, David okwa ti, ‘Kala nomwenyo efimbo lile, ove u kale nawa,* noukwaneumbo woye nosho yo oinima aishe oyo u na nai kale nawa.
7 Onda uda kutya oto kulula eedi doye. Eshi ovafita voimuna yoye va li pamwe nafye, katwa li twe va ningila owii washa, noinava kanifa sha nandenande efimbo alishe olo va kala muKarmel.
8 Pula ovapiya voye ovanyasha, notave shi ku lombwele. Alikana, fila onghenda ovapiya vange ovanyasha, molwaashi otwe uya pefimbo lehafo.* Alikana, pa ovapiya voye nosho yo omonamati woye, David, keshe osho wa xupifa po.’”
9 Onghee ovapiya ovanyasha vaDavid ova ya, ndele tava lombwele Nabal ashishe osho va lombwelwa kuDavid. Eshi va mana okupopya,
10 Nabal okwe va nyamukula a ti: “David, omona waIsai, oye lyelye, opo ndi pwilikine kuye? Kunena ovapiya vahapu ohave livake po poovene vavo.
11 Mbela ondi na okukufa omungome wange, omeva ange nombelela oyo nda longekidila ovakululi veedi dange, ndele handi i yandje kovalumenhu, ovo ndihe shii kutya ova dja peni?”
12 Opo nee ovapiya ovanyasha vaDavid ova shuna kuye, ndele tave mu lombwele eendjovo adishe odo.
13 David okwa lombwela diva ovapiya vaye ta ti: “Keshe umwe homata eongamukonda loye.” Opo nee aveshe ova homata omaongamukonda avo. David naye okwa homata eongamukonda laye, nokwa ya pamwe novalumenhu 400 lwaapo, ofimbo ovalumenhu 200 va fyaala peendongelwa.
14 Ndele umwe womovapiya vaNabal, okwa lombwela Abigail, omukulukadi waNabal, ta ti: “Tala, David okwa li a tuma ovatumwa va dja mombuwa va ka popife omwene wetu, ashike okwe va hanyaukila te va ula nai.
15 Ovalumenhu ovo ova li va ungaunga nawa nafye. Inave tu ningila owii washa, nokatwa li twa kanifa sha efimbo alishe olo twa kala pamwe navo mofuka.
16 Ova li ngaashi ekuma leameno, olo la kala le tu dingilila omutenya noufiku, efimbo alishe olo twa kala pamwe navo hatu lifa oimuna.
17 Tokola paife kutya oto ka ninga po shike, osheshi omwene wetu neumbo laye alishe otali hangwa filufilu koupyakadi, nomwene wetu oku li omunhu wongaho nokape na oo ta dulu okupopya naye.”
18 Onghee Abigail okwa kufa diva omingome 200, oitoo ivali ya kula yomaviinyu, ombelela yeedi nhano, oimbale itano* yoilya ya fengwa,* oikuki 100 yomandjebele a kukutikwa noikuki 200 yeenghwiyu da tyanghaulwa, ndele aishe te i londeke keendongi.
19 Opo nee okwa lombwela ovapiya vaye ta ti: “Tetekelei nge, ame ohandi mu shikula.” Ashike ka li a lombwela sha omushamane waye Nabal.
20 Ofimbo a li a londa kondongi yaye ta kulukile mefilu lomhunda, David novapiya vaye ovanyasha ova li tava ende va yuka kuye, nokwe va shakeneka.
21 David okwa kala ta ti: “Onda kala ashike handi file oshisho epwanga oinima aishe yomulumenhu oo mombuwa. Moinima yaye inamu kana nande oshimwe, ndele ye paife ota ningile nge owii, ofimbo nde mu longela ouwa.
22 Kalunga na katukile onghatu ovatondi vaDavid,* ngeenge onda xupifa po nande omulumenhu* umwe womeumbo laye a kale nomwenyo fiyo ongula.”
23 Eshi Abigail a mona David, okwa londoloka ko diva kondongi, ndele ta fidimike oshipala shaye pedu koshipala shaDavid, e linyongamena pedu.
24 Opo nee okwa wila peemhadi daye, ndele ta ti: “Omwene wange, aame nandi handukilwe. Alikana, pitika omupiya woye omukainhu a popye naave, ndele to pwilikine keendjovo domupiya woye omukainhu.
25 Alikana, omwene wange, ino pwilikina kuNabal, oo e li omunhu wongaho, molwaashi oku li ngaashi edina laye tali ti. Edina laye oNabal,* noke na eendunge. Ame omupiya woye omukainhu inandi mona ovapiya ovanyasha vomwene wange, ovo wa li wa tuma.
26 Ashike paife, omwene wange, ohandi ane medina laJehova Kalunga omunamwenyo kutya ofimbo u na omwenyo, Jehova oye e ku kwafela uha kale netimba lohonde nouha shunifile vamwe owii* neke loye. Ovatondi voye naaveshe ovo va hala okuningila owii omwene wange nava kale ngaashi Nabal.
27 Oshali* oyo omupiya woye omukainhu a etela omwene wange nai pewe ovalumenhu ovanyasha, ovo ve li nomwene wange.
28 Alikana, dimina po omupiya woye omukainhu, osheshi Jehova ita kala ina pa omwene wange eumbo tali kalelele, molwaashi omwene wange ota lu oita yaJehova noino longa owii washa mokukalamwenyo kwoye akushe.
29 Ngeenge umwe okwa hovele oku ku taataa, opo e ku dipae, Jehova Kalunga koye ote ke ku amena ngaashi omunhu ta amene oinima yondilo, moku i mangela nawa mekutu, ashike eemwenyo dovatondi voye ote ke di ekelashi ngaashi oumanya tava di moshiumbifo.
30 Ngeenge Jehova okwa ningile omwene wange oinima aishe iwa oyo a udaneka, nokwe ku nangeke po u li omupangeli waIsrael,
31 ito ke lipa oushima, ile u livele ombedi* momutima woye omolwokutilashi ohonde ihe na etimba, nomolwaashi omwene wange a shunifila owii* neke laye. Ngeenge Jehova okwa ningile ouwa omwene wange, dimbuluka omupiya woye omukainhu.”
32 Opo nee David okwa tya kuAbigail: “Tanga Jehova Kalunga kaIsrael, oo e ku tuma nena, u uye u shakeneke nge.
33 Kalunga ne ku nangeke noupuna, eshi wa katuka pandunge, ne ku nangeke yo noupuna, eshi wa kelela nge nena ndiha kale netimba lohonde nondiha shunife owii* nomake ange.
34 Ohandi ane medina laJehova Kalunga kaIsrael omunamwenyo, oo a kwafela nge ndihe ku ningile owii, kutya ngeno ku uyile diva u shakeneke nge, ngeno mongula efimbo longula, meumbo laNabal inamu xupa nande omulumenhu* umwe.”
35 Opo nee David okwa tambula ko oinima oyo Abigail e mu etela, ndele ta ti kuye: “Inda nombili keumbo loye. Tala, onde ku uda nohandi ke ku ningila osho wa popya.”
36 Lwanima, Abigail okwa shuna kuNabal, oo a li ta tyapula meumbo laye ngaashi ohamba, na Nabal* okwa li a hafa, nokwa li a kolwa neenghono. Onghee Abigail ka li e mu lombwela sha nandenande fiyo osheshi kwa sha.
37 Ongula eshi Nabal a kololokwa, omukulukadi waye okwe mu lombwela oinima oyo. Onghee omutima waye owa li ngaashi womunhu a fya, nokwa li a nangala a kukuta ngaashi emanya.
38 Konima yomafiku omulongo lwaapo, Jehova okwa li a denga Nabal, ndele ta fi.
39 Eshi David a uda kutya Nabal okwa fya, okwa ti: “Jehova na hambelelwe, oo a amena nge, eshi nda shekwa kuNabal nokwa kwafela omupiya waye aha longe owii. Jehova okwa alulila Nabal owii waye mwene.” Opo nee David okwa tuma ondjovo kuAbigail, a ninge po omukulukadi waye.
40 Ovapiya vaDavid ova ya kuAbigail, kuKarmel, ndele tave mu lombwele kutya: “David okwe tu tuma kwoove u ninge po omukulukadi waye.”
41 Onghee okwa fikama diva nokwe linyongamena oshipala sha twa pedu, ndele ta ti: “Onda hala okuninga omupiya wokukosha eemhadi dovapiya vomwene wange.”
42 Opo nee Abigail okwa fikama diva, ndele ta londo kondongi yaye nokwa shikulwa kovapiya vaye ovakainhu vatano. Ova ya pamwe novatumwa vaDavid, ndele ta ningi po omukulukadi waDavid.
43 David okwa li yo a hombola Ahinoam, a dja kuJisreel, naaveshe ova kala ovakulukadi vaye.
44 Ndele Saul okwa yandja omonakadona waye, Mikal, omukulukadi waDavid, kuPalti, omonamati waLais, oo a dja kuGallim.
Eshangelo lopedu
^ Oshilando shomuJuda; kashi fi omhunda yaKarmel.
^ Ile “u kale nombili.”
^ Eln., “mefiku liwa.”
^ Eesea nhano. Osea imwe oi fike peelita 7,33. Tala Oshiwedelwako B14.
^ Ile “ya yofwa.”
^ Ile tashi dulika, “David.”
^ Eln., “keshe oo ha xuxwile kekuma.” Outumbulilo wOshiheberi tau ulike kovalumenhu.
^ Tali ti “momutwe mwa pwa; elai.”
^ Ile “u ete exupifo.”
^ Eln., “Enangeko noupuna.”
^ Eln., “kumwa, ile punduka.”
^ Ile “a eta exupifo.”
^ Ile “ndi ete exupifo.”
^ Eln., “keshe oo ha xuxwile kekuma.” Outumbulilo wOshiheberi tau ulike kovalumenhu.
^ Eln., “omutima waNabal.”
