Embo lotete lOvakorinto 8:1-13
8 Ohandi mu shangele shi na sha noikulya ya yambelwa oikalunga: Atusheni otu na eshiivo kombinga yoshinima osho. Eshiivo ohali dulu okuningifa omunhu e linenepeke, ndele ohole ohai tungu.
2 Ngeenge ope na ou ta diladila kutya oku na eshiivo kombinga yoshinima shonhumba, ke na eshiivo le lixwa po kombinga yasho.
3 Ndele oo e hole Kalunga, ota kala e shiivike kuKalunga.
4 Paife natu popyeni shi na sha noikulya oyo ya yambelwa oikalunga. Otu shi shii kutya oikalunga oinima yongaho elela nonokutya oku na ashike Kalunga umwe aeke.
5 Nonande oku na oinima ihapu oyo hakutiwa ookalunga, kutya nee omeulu ile okombada yedu, oyo hai ifanwa “ookalunga” ile “oovene,”
6 fye otu na Kalunga umwe aeke, Tate, oo e tu shita nokwa shita oinima aishe. Otu na yo Omwene umwe aeke Jesus Kristus, oo oinima aishe ya shitwa okupitila muye, nafye twa kwatelwa mo.
7 Ndele havanhu aveshe ve shii oshinima osho. Molwaashi vamwe ova li hava longele oikalunga, ngeenge tava li oikulya oyo va tala ko kutya oya yambelwa oikalunga, eliudo lavo olo la nghundipala ohali piyaanekwa.
8 Oikulya itai tu ehenifa popepi naKalunga; kutya nee otwa lya ile inatu lya, itashi kumu ekwatafano letu naKalunga.
9 Ndele lungameni opo emanguluko leni liha pundukife ovo ve na eliudo la nghundipala.
10 Ngeenge umwe oo a nghundipala okwe ku mono ove ou u na eshiivo la tya ngaho to lile motembeli yoshikalunga, mbela eliudo laye itali ke linyengifwa a lye oikulya oyo ya yambelwa oikalunga?
11 Ndele omolweshiivo loye, oto ka nyona po eitavelo lomumwaxo oo a nghundipala, oo a filwa kuKristus.
12 Ngeenge omwa nyono kovamwaxo monghedi ya tya ngaho, mwa yahameka eliudo lavo, kungaho otamu nyono kuKristus.
13 Ngeenge oikulya otai pundukifa omumwatate, itandi li vali ombelela nandenande opo ndihe mu pundukife.
