Omafimbo otete 12:1-40
-
Ovayambididi vouhamba waDavid (1-40)
12 Ava ovalumenhu ovo ve uya kuDavid puSiklag, ofimbo a li ita dulu okulinyenga a manguluka omolwaSaul, omonamati waKish, nova li mokati kovakwaita ovanaenghono, ovo ve mu yambidida molwoodi.
2 Ova li ve likundika omauta, nova li hava dulu okulongifa olulyo nolumosho va umbe oumanya, ile va yashe noikuti, tava longifa omauta. Ova li ovamwaina vaSaul, va dja muBenjamin.
3 Ahieser oye a li omutwe wavo. Okwa li pamwe naJoas, aveshe ovanamati vaShemaa, Omugibea; Jesiel naPelet, ovanamati vaAsmavet, Beraka, Jehu, Omuanatot,
4 Ismaia, Omugibeon, omukwaita omunaenghono, umwe womovakwaita omilongo nhatu, oye a li omuwiliki wovakwaita ovo omilongo nhatu; na Jeremia, Jahasiel, Johanan, Josabad, Omugedera,
5 Elusai, Jerimot, Bealia, Shemaria, Sefatia, Omuharif,
6 Elkana, Isshia, Asareel, Joeser naJasobeam, Omukora;
7 Joela naSebadia, ovanamati vaJeroham, vokuGedor.
8 Ovagad vamwe ova ya kuDavid pohotengulu, oyo i li mombuwa, va ka kale va ama kombinga yaye; ova li ovakwaita ovanaenghono, ovakwaita va deulilwa oita, va fikama ve lilongekida, ve na oikelelifo inene nosho yo omaonga, ovo oipala yavo ya fa yeenghoshi nove na onhapo va fa eemenye dokeemhunda.
9 Eser oye omutwe, omutivali oObadja, omutitatu oEliab,
10 omutine oMismanna, omutitano oJeremia,
11 omutihamano oAttai, omutiheyali oEliel,
12 omutihetatu oJohanan, omutimuwoi oElsabad,
13 omutimulongo oJeremia nomutimulongo naumwe oMakbannai.
14 Ovo ova dja mOvagad, omitwe detangakwaita. Oo munini ota dulu okulwifa 100, nau munene ota dulu okulwifa 1 000.
15 Ava ovalumenhu ovo va tauluka omulonga waJordan, momwedi wotete, eshi wa li tau kunguluka fiyo okominghulo dao. Ova taataa aveshe ovo va li hava kala momalufilu, nove lihanena koushilo nosho yo kouninginino.
16 Ovalumenhu vamwe Ovabenjamin nosho yo Ovajuda ova li yo ve uya kuDavid, pohotengulu yaye.
17 Opo nee David okwa fikama moipafi yavo, ndele ta ti kuvo: “Ngeenge omwe uya kwaame nombili mu kwafele nge, omutima wange otau ka hangana nanye. Ashike ngeenge omwe uya okukengelela nge nokuyandja nge kovatondi vange, ofimbo omake ange inaa longa owii, Kalunga kootatekulululwa ne shi tale, ndele ta tokola.”
18 Opo nee omhepo oye uya* kuAmasai, omutwe womilongo nhatu, ndele tai ti:
“David, fye ovoye; omonamati waIsai, fye otu li pamwe naave.
Ombili, ombili nai kale naave, nombili nai kale pamwe naao te ku kwafele,Molwaashi Kalunga ote ku kwafele.”
Onghee David okwe va tambula, nokwe va nangeka po mokati komitwe domatangakwaita.
19 Vamwe ovo va dja muManasse ove uya yo okuwaimina David, eshi a li e uya pamwe nOvafilisti va ka lwife Saul, ashike ina kwafela Ovafilisti, molwaashi konima yeenghundafana, ovapangeli vOvafilisti ove mu lekela, va ti: “Ota ka waimina omwene waye, Saul, naasho otashi ka tula eemwenyo detu moshiponga.”
20 Eshi a ya kuSiklag, ava ve mu waimina, va dja muManasse, ovo: Adna, Josabad, Jediael, Mikael, Josabad, Elihu naSilletai, omitwe domayovi epata laManasse.
21 Ova kwafela David mokulwifa ongudu yovaponokeli, molwaashi aveshe ova li ovanaenghono, ovalumenhu ovaladi, nova li omalenga etangakwaita.
22 Efiku nefiku ovanhu ova kala nokuuya kuDavid, fiyo osheshi va ninga onhanda inene, ngaashi onhanda yaKalunga.
23 Ou omuvalu womitwe daavo ve lilongekidila oita, ovo ve uya kuDavid, puHebron, opo va yandje ouhamba waSaul kuye, metwokumwe nelombwelo laJehova.
24 Ovalumenhu vokuJuda, ovo va humbata oikelelifo inene nomaonga, va homatela olwoodi, ova li 6 800.
25 MuSimeon, ovalumenhu ovanaenghono novaladi vometangakwaita ova li 7 100.
26 MOvalevi 4 600.
27 Jehoiada okwa li omuwiliki wovanamati vaAron, nokwa li pamwe 3 700
28 nosho yo Sadok, omulumenhu omunyasha, omunaenghono nomuladi, pamwe nomalenga 22, a dja moukwaneumbo wepata laye.
29 MOvabenjamin, ovamwainamati vaSaul, opa li 3 000, ovo vahapu vomuvo va li nale hava yambidida oukwaneumbo waSaul.
30 MOvaefraim, opa li ovalumenhu ovanaenghono, ovaladi nova fimanekwa ve li 20 800, mokati komaukwaneumbo omapata avo.
31 Metata lepata laManasse, opa li 18 000, ovo va hoololwa pamadina, ve uya va ninge David ohamba.
32 Mepata laIsaskar, opa li ovo hava tale onghalo nohava kala ve shii kutya Israel na ninge po shike. Opa li ovawiliki vavo 200, novamwaxe aveshe ova li koshi yewiliko lavo.
33 MuSebulon, opa li 50 000, ovo va li tava dulu okuwaimina etangakwaita, ve lilongekidila olwoodi nova li ve na oilwifo aishe yomoita; aveshe ova li tava waimine David noudiinini.*
34 MuNaftali, opa li omalenga 1 000, nokwa li pamwe 37 000, ve na oikelelifo inene nomaonga.
35 MOvadan, ovo ve lilongekidila olwoodi ova li 28 600.
36 MuAsser, ovo ve lilongekidila olwoodi ova li 40 000.
37 Okudja kombinga ikwao yomulonga waJordan, mOvaruben, mOvagad nometata lepata laManasse, opa li ovakwaita 120 000, ovo va li ve na oilwifo yomoita i lili noku lili.
38 Aveshe ovo ova li ovalumenhu va wana okuya moita, ve lilongekidila olwoodi; ove uya kuHebron nomutima aushe va ninge David ohamba yaIsrael ashishe, nOvaisrael vakwao aveshe ova li va twa kumwe* va ninge David ohamba.
39 Ova kala pamwe naDavid oule womafiku atatu, tava li nokunwa, molwaashi ovamwaxe ova li ve va ningila omalongekido.
40 Ovo va li popepi navo nosho yo ovo va li kokule, fiyo okuIsaskar, kuSebulon nokuNaftali, ova li tava eta oikulya ya londekwa keendongi, keengamelo, komamwili nokeengobe, omafiloshisho oufila, oikuki yeenghwiyu da tyanghaulwa nosho yo omandjebele a kukutikwa, omaviinyu, omaadi, eengobe needi momuvalu muhapu, molwaashi muIsrael omwa li ehafo linene.
Eshangelo lopedu
^ Eln., “uvika.”
^ Ile “aveshe ova li tava waimine David nomutima aushe.”
^ Eln., “va li ve na omutima umwe.”
