Eehamba dotete 22:1-53
22 Pokati kaSiria naIsrael inapa kala oita oule weedula nhatu.
2 Modula onhinhatu, Josafat, ohamba yaJuda, okwa ya kohamba yaIsrael.
3 Opo nee ohamba yaIsrael oya tya kovapiya vayo: “Omu shi shii ngoo kutya Ramot-gilead oshetu, ashike ohatu ongaonga oku shi alula ko kohamba yaSiria.”
4 Natango, ohamba yaIsrael oya tya kuJosafat: “Oto i ngoo pamwe naame tu ka lwile kuRamot-gilead?” Josafat okwe mu nyamukula, a ti: “Fye naave vamwe aveke. Ovanhu vange novanhu voye vamwe aveke. Eenghambe dange neenghambe doye dimwe adike.”
5 Ashike Josafat okwa tya kohamba yaIsrael: “Alikana, tete pula ewiliko kuJehova.”
6 Onghee ohamba yaIsrael oya ongela pamwe ovaprofeti, ovalumenhu 400 lwaapo, ndele tai ti kuvo: “Nandi ye ngoo ndi ka lwife Ramot-gilead, ile nandi shi efe?” Ove mu nyamukula, va ti: “Inda, na Jehova ote ke shi yandja momake ohamba.”
7 Opo nee Josafat okwa ti: “Hano apa kape na omuprofeti waJehova? Natu puleni yo ewiliko okupitila muye.”
8 Onghee ohamba yaIsrael oya tya kuJosafat: “Ope na natango omulumenhu umwe, oo hatu dulu okupula ewiliko kuJehova okupitila muye, ashike kandi mu hole, molwaashi iha xunganeke oinima iwa kombinga yange, ndele oyoyo ashike ii. Edina laye oMikaia, omonamati waImla.” Ashike Josafat okwa ti: “Ohamba, ino popya vali oshinima sha tya ngaho.”
9 Onghee ohamba yaIsrael oya ifana elenga, ndele tai ti kulo: “Ifana diva Mikaia, omonamati waImla.”
10 Ohamba yaIsrael nosho yo Josafat, ohamba yaJuda, ova li omutumba keshe umwe kolukalwapangelo laye, va djala oikutu youhamba, ve li poshipale shoposhivelo shaSamaria, novaprofeti aveshe ova li tava xunganeke moipafi yavo.
11 Opo nee Sedekia, omonamati waKenaana, okwe liningila eembinga doivela, ndele ta ti: “Jehova okwa ti, ‘Eembinga edi odo to twifa* Ovasiria, fiyo osheshi we va xulifa po.’”
12 Ovaprofeti aveshe vakwao ova li tava xunganeke oshinima sha faafana, tava ti: “Inda u ka lwife Ramot-gilead noto ka findana; Jehova ote ke shi yandja meke lohamba.”
13 Onghee omutumwa, oo a tumwa a ka ifane Mikaia, okwa tya kuye: “Tala, ovaprofeti aveshe ova xunganeka oinima iwa i na sha nohamba. Alikana, naave eendjovo doye nadi kale diwa ngaashi eendjovo davo, ndele to xunganeke oinima iwa i na sha nohamba.”
14 Ashike Mikaia okwa ti: “Ohandi ane kuJehova, Kalunga omunamwenyo, kutya keshe osho Jehova ta lombwele nge, osho handi popi.”
15 Opo nee Mikaia okwe uya kohamba, noye mu pula, ya ti: “Mikaia, natu ye ngoo tu ka lwife Ramot-gilead, ile natu shi efe?” Okwe i nyamukula, a ti: “Inda noto ka findana. Jehova ote ke shi yandja meke lohamba.”
16 Onghee ohamba oya tya kuye: “Olungapi ndi na oku ku anifa uha lombwele nge oipupulu, ndele ou lombwele nge ashike oshili medina laJehova?”
17 Okwa ti: “Ondi wete Ovaisrael aveshe ve lihanena keemhunda, ngaashi eedi dihe na omufita. Jehova okwa ti: ‘Kave na omupashukili. Keshe umwe na ye keumbo laye nombili.’”
18 Opo nee ohamba yaIsrael oya tya kuJosafat: “Inandi ku lombwela kutya, ‘Ita ka xunganeka oinima iwa i na sha naame, ndele oyoyo ashike ii’?”
19 Mikaia okwa ti: “Pwilikina kondjovo yaJehova: Onda mona Jehova e li omutumba kolukalwapangelo laye nosho yo etangakwaita alishe lomeulu la fikama puye, kolulyo nokolumosho laye.
20 Opo nee Jehova okwa ti; ‘Olyelye ta ka kengelela Ahab, opo a ye a ka lwife Ramot-gilead, ndele ta file oko?’ Ashike omweengeli umwe okwa li ta popi oshinima shimwe, ofimbo omweengeli mukwao a li ta popi oshinima shi lili.
21 Opo nee omweengeli* umwe okwe uya nokwa fikama moipafi yaJehova, ndele ta ti, ‘Ohandi ke mu kengelela.’ Jehova okwe mu pula, a ti, ‘Oto ke shi enda ngahelipi?’
22 Omweengeli okwa nyamukula, a ti: ‘Ohandi ka ningifa ovaprofeti vaye aveshe va popye oipupulu.’ Onghee Kalunga okwa ti, ‘Oto ke mu kengelela noto ka pondola. Inda, ndele to ka ninga ngaho.’
23 Paife Jehova okwa ningifa ovaprofeti voye aveshe ava va popye oipupulu, ashike Jehova ote ke ku etela oudjuu.”
24 Sedekia, omonamati waKenaana, okwa ya nokwa denga Mikaia kolupanda, ndele ta ti: “Omhepo yaJehova oya enda nge peni, opo i ka popye naave?”
25 Mikaia okwe mu nyamukula, a ti: “Tala, oto ke shi mona mefiku olo to ka hondama medimo lomeni elela.”
26 Opo nee ohamba yaIsrael oya ti: “Kufa Mikaia, ndele to ke mu yandja kuAmon, elenga loshilando, nosho yo kuJoas, omonamati wohamba.
27 Va lombwela to ti, ‘Ohamba oya ti: “Tuleni omulumenhu ou modolongo noku mu pa omungome nosho yo omeva manini, fiyo osheshi nda aluka nombili.”’”
28 Ashike Mikaia okwa ti: “Ngeenge owa aluka nombili, osha yela kutya Jehova ina popya naame.” Okwa weda ko, a ti: “Amushe shi didilikeni.”
29 Onghee ohamba yaIsrael nosho yo Josafat, ohamba yaJuda, ova ya va ka lwife Ramot-gilead.
30 Ohamba yaIsrael oya tya kuJosafat: “Ohandi ka djala oikutu imwe, opo ndiha dimbulukiwe, ndele handi i molwoodi, ashike ove djala oikutu yoye youhamba.” Onghee ohamba yaIsrael oya djala oikutu imwe, ndele tai i molwoodi.
31 Ohamba yaSiria oya yandja elombwelo kovawiliki vayo vomatemba 32, ya ti: “Inamu lwa nomunhu umwe e lili, kutya nee omunini, ile omukulunhu, kakele ashike kohamba yaIsrael.”
32 Diva eshi ovawiliki vomatemba va mona Josafat, ova lombwelafana tava ti: “Ohamba yaIsrael oyo naanaa ngaho.” Onghee ova piluka ve mu lwife, na Josafat okwa li a pula ekwafo.
33 Eshi ovawiliki vomatemba va mona kutya haye ohamba yaIsrael, ova efa po diva oku mu shikula.
34 Ashike omulumenhu umwe okwa umba oshikuti shaye momhepo,* ndele ta yashe ohamba yaIsrael pokati koipapa yokandjafa koukwaita. Onghee ohamba oya tya kwaao a li ta shingi etemba layo: “Piluka, ndele to kufa nge mo molwoodi,* osheshi onda ehamekwa unene.”
35 Olwoodi ola kwata efiku alishe, nohamba oya li ya fikama metemba ya taalela Ovasiria. Ohonde yohamba yaIsrael oya li tai tikile metemba loita, nohamba oyo oya fya oufiku oo.
36 Eshi etango la li tali ningine, monhanda omwa ningwa eingido tali ti: “Keshe umwe na shune koshilando shavo! Keshe umwe na shune koshilongo shavo!”
37 Onghee ohamba oya fya, nove i twala kuSamaria; ova paka ohamba muSamaria.
38 Eshi va kosha etemba loita petale lomuSamaria, eembwa oda lafa po ohonde yohamba neembwada ode likoshela omo,* metwokumwe nondjovo oyo Jehova a popya.
39 Ondjokonona aishe yaAhab, ashishe osho a ninga, neumbo,* olo a tunga nomayoo eendjaba, nosho yo oilando aishe oyo a tunga, mbela inai shangwa membo londjokonona yopefimbo leehamba daIsrael?
40 Onghee Ahab okwa nangekwa pooxekulululwa; omonamati waye, Ahasia, okwa ninga ohamba ponhele yaye.
41 Josafat, omonamati waAsa, okwa ninga ohamba yaJuda momudo omutine wepangelo laAhab, ohamba yaIsrael.
42 Josafat okwa li e na eedula 35, eshi a ninga ohamba. Okwa pangela muJerusalem oule weedula 25. Edina laina oAsuba, omonakadona waSilhi.
43 Okwa twikila okweenda meendjila adishe daxe Asa. Ina yapuka mo mudo, nokwa longa osho sha yuka momesho aJehova. Ashike eenhele dokoikulundudu kada li da hanaunwa po, novanhu ova li natango tava yambele keenhele dokoikulundudu nokutwimina ko omayambo.
44 Josafat okwa kaleka po ekwatafano liwa nohamba yaIsrael.
45 Ondjokonona aishe yaJosafat, oilonganghono yaye, nanghee a lwa olwoodi, mbela inai shangwa membo londjokonona yopefimbo leehamba daJuda?
46 Moshilongo okwa taataa mo omashenge* aeshe omotembeli, oo a li a fyaala po pefimbo laxe Asa.
47 MuEdom kamwa li ohamba, ashike omwa li omuponhele wohamba.
48 Josafat okwa ningifa yo eeskepa* dokuTarsis, di ye kuOfir di ka tale oshingoli, ashike eeskepa inadi ya, molwaashi oda tekela muEsion-geber.
49 Opo nee Ahasia, omonamati waAhab, okwa tya kuJosafat: “Pitika ovapiya vange va ye pamwe novapiya voye meeskepa,” ashike Josafat ine shi dimina.
50 Josafat okwa nangekwa pooxekulululwa, nokwa pakwa pooxekulululwa mOshilando shaDavid, xekulululwa. Omonamati waye, Jehoram, okwa ninga ohamba ponhele yaye.
51 Ahasia, omonamati waAhab, okwa ninga ohamba yaIsrael muSamaria, momudo omuti-17 wepangelo laJosafat, ohamba yaJuda, nokwa pangela Israel oule weedula mbali.
52 Okwa twikila okuninga osho shii momesho aJehova, nokwa enda mondjila yaxe noyaina nosho yo mondjila yaJerobeam, omonamati waNebat, oo a ningifa Israel shi nyone.
53 Okwa twikila okulongela Baal noku mu linyongamena, nokwa twikila okuhandukifa Jehova, Kalunga kaIsrael, ngaashi ashike xe a li a ninga.
Eshangelo lopedu
^ Ile “undulifa.”
^ Eln., “omhepo.”
^ Ile “ine shi ningila owina.”
^ Eln., “monhanda.”
^ Ile tashi dulika, “omo eembwada hadi likosho, omo eembwa da lafa ohonde yaye.”
^ Ile “nombala.”
^ Ile “ovalumenhu ovo hava endwa konima.”
^ Tala Omafatululo oitya.
