Eehamba dotete 2:1-46
2 Eshi David a li pokufya, okwa yandja omalombwelo aa komona waye Salomo, a ti:
2 “Ame ondi li pokufya.* Onghee kala wa pama nou na ouladi.
3 Ou na okukala omudiinini kuJehova, Kalunga koye, mokweenda meendjila daye, mokudiinina eenghedimhango daye, oipango yaye, omatokolo aye nomadimbulukifo aye, ngaashi ya shangwa mOmhango yaMoses. Ngeenge owa ningi ngaho, oto ka pondola* mukeshe eshi to ningi, nakeshe apa to i.
4 Jehova ota ka wanifa po eudaneko olo a udanekela nge, a ti: ‘Ngeenge ovanamati voye ova lungamene nawa onghedi yavo yokukalamwenyo, mokukala ovadiinini kwaame nomutima wavo aushe nosho yo nomwenyo* wavo aushe, kolukalwapangelo laIsrael otaku ka kala alushe omulumenhu womoludalo loye.’
5 “Ou shii yo osho Joab, omonamati waSerua, a ningila nge nosho yo osho a ningila eendjai mbali domatangakwaita aIsrael, Abner, omonamati waNer, naAmasa, omonamati waJeter. Okwe va dipaa nokwa tilashi ohonde yavo pefimbo olo pa li pehe na oita, ndele ta vaeke ohonde yavo kekwamo olo a li a djala moshiya nokeenghaku odo a li a djala keemhadi daye.
6 Ou na okukatuka pandunge, noino efa aye nombili neenghwakutoka daye mOmbila.*
7 “Ndele ovanamati vaBarsillai, Omugilead, ou na oku va ulikila ohole i na oudiinini, nove na okukala vamwe vomwaavo hava li poshitaafula shoye, molwaashi ova kala tava yambidida nge, eshi nda li handi faduka po omumwanyoko, Absalom.
8 “Pwoove ope na yo Simei, omonamati waGera, Omubenjamin, a dja kuBahurim. Oye a li a ula nge eendjovo dii neenghono mefiku olo nda li handi i kuMahanaim, ashike eshi e uya okushakeneka nge pomulonga waJordan, onde mu anena kuJehova, nda ti: ‘Itandi ku dipaa neongamukonda.’
9 Ino mu efa nandenande ina handukilwa, molwaashi ove omulumenhu omunaendunge nou shii osho u na oku mu ningila; eenghwakutoka daye ou na oku di tula mOmbila* pamwe nohonde.”
10 Opo nee David okwa nangekwa pooxekulululwa, nokwa pakwa mOshilando shaDavid.
11 Efimbo* olo David a pangela Israel ola li eedula 40. MuHebron okwa pangela mo oule weedula 7, nomuJerusalem okwa pangela mo oule weedula 33.
12 Opo nee Salomo okwa kala omutumba kolukalwapangelo laxe David, nomokweendela ko kwefimbo epangelo laye ola ka kala la pamenena.
13 Lwanima, Adonia, omonamati waHaggit, okwa ya kuBatseba, ina yaSalomo. Batseba okwe mu pula, ta ti: “Owe uya ngoo nombili?” Adonia okwa nyamukula, a ti: “Heeno, onde uya nombili.”
14 Opo nee Adonia okwa ti: “Onda hala oku ku lombwela sha.” Batseba okwa ti: “Popya.”
15 Adonia okwa twikila ko ta ti: “Ou shii nawa kutya ouhamba owa li u na okuninga wange, nOvaisrael aveshe ova li va teelela* ndi ninge ohamba, ashike ouhamba onde u kufwa, ndele tau ningi womumwameme, molwaashi osho osho shi li ehalo laJehova.
16 Ndele paife onda hala oku ku ehela oshinima shimwe. Ashike ino anya eindilo lange.” Batseba okwa tya kuye: “Popya.”
17 Adonia okwa ti: “Alikana, pula ohamba Salomo, molwaashi itai ka anya eindilo loye, i pe nge Abisag, Omusunemi, a ninge omukulukadi wange.”
18 Opo nee Batseba okwa ti: “Oshi li nawa! Ohandi ke ku popila ko kohamba.”
19 Batseba okwa ya kohamba Salomo a ka popye nayo ponhele yaAdonia. Opo nee ohamba oya fikama diva i mu shakeneke noye linyongamena kuye. Ohamba oya kala omutumba kolukalwapangelo noya etelwa oshipundi, opo ina, Batseba, a kale omutumba kolulyo layo.
20 Opo nee Batseba okwa ti: “Ondi na oshinima shinini nda hala oku ku indila. Ashike ino anya eindilo lange.” Ohamba oya tya kuye: “Meme, popya eindilo loye, itandi li anye.”
21 Batseba okwa ti: “Abisag, Omusunemi, na yandjwe komumwanyoko Adonia a ninge omukulukadi waye.”
22 Ohamba Salomo oya tya kuina: “Omolwashike to pula Abisag, Omusunemi, a yandjwe kuAdonia? Pula yo a pewe ouhamba, molwaashi ye omukulu wange nota yambididwa komupristeri Abjatar nokuJoab, omonamati waSerua.”
23 Onghee ohamba Salomo oya ana kuJehova ya ti: “Kalunga na handukile nge unene, ngeenge itashi tula omwenyo waAdonia moshiponga, eshi a pula nge oshinima eshi.
24 Paife ohandi ane kuJehova, Kalunga omunamwenyo, oo a pameka nge, ndele ta tula nge kolukalwapangelo latate David nokwa tungila nge eumbo, ngaashi a li a udaneka, Adonia oku na okudipawa nena eli.”
25 Ohamba Salomo oya tuma diva Benaia, omonamati waJehoiada, oo a ya nokwa ponokela* Adonia, ndele te mu dipaa.
26 Ohamba oya tya komupristeri Abjatar: “Inda komapya oye muAnatot! Owa wana okufya, ashike itandi ku dipaa nena, molwaashi owa li wa humbata Oshikefa shOmwene Jehova, Omunamapangelo aeshe, koshipala shatate David, nomolwaashi owa kala pamwe natate momaudjuu aeshe oo a pita muo.”
27 Onghee Salomo okwa kufa Abjatar oshinakuwanifwa shokulonga e li omupristeri waJehova, naasho osha wanifa po ondjovo yaJehova i na sha neumbo laEli, muSilo.
28 Eshi Joab a uda onghundana oyo, okwa faduka po, molwaashi okwa li ha yambidida Adonia, ndele ka li ha yambidida Absalom. Okwa ya onhapo ketwali laJehova, ndele ta kala e kwete keembinga doaltari.
29 Opo nee ohamba Salomo oya lombwelwa taku ti: “Joab okwa faduka po a ya ketwali laJehova, naako oko e li, e li popepi noaltari.” Onghee Salomo okwa tuma ko Benaia, omonamati waJehoiada, ta ti: “Inda ko u ke mu dipae!”
30 Benaia okwa ya ketwali laJehova, ndele ta ti kuye: “Ohamba oya ti, ‘Dja mo!’” Ashike okwa ti: “Ahawe! Omo handi file omu.” Benaia okwa alukila kohamba, ndele ta ti: “Eshi osho Joab a popya, nosho yo a nyamukula nge.”
31 Opo nee ohamba oya tya kuye: “Ninga osho ta popi, mu dipaa noku mu paka, ndele to kufa po pwaame nomeumbo latate ohonde oyo Joab a tilashi ihe na etimba.
32 Jehova ote mu alulile etimba lohonde, oyo a tilashi, eshi a dipaa ovalumenhu vavali, ovo va li ovayuki unene nove mu dule, naasho okwe shi ninga, tate David ine shi shiiva; ovalumenhu ovo ovo Abner, omonamati waNer, ondjai yetangakwaita laIsrael nosho yo Amasa, omonamati waJeter, ondjai yetangakwaita laJuda.
33 Joab nosho yo oludalo laye ovo tava kala ve na etimba lohonde yaAbner naAmasa fiyo alushe. Ashike David, oludalo laye, eumbo laye nolukalwapangelo laye nali kale li na ombili, oyo tai di kuJehova fiyo alushe.”
34 Onghee Benaia, omonamati waJehoiada, okwa ya nokwa ponokela Joab, ndele te mu dipaa nokwa pakwa peumbo laye mombuwa.
35 Opo nee ohamba oya nangeka po Benaia, omonamati waJehoiada, a ninge ondjai yetangakwaita ponhele yaJoab. Natango, ohamba oya nangeka po omupristeri Sadok ponhele yaAbjatar.
36 Ohamba oya tuma Simei noye mu lombwela ya ti: “Litungila eumbo muJerusalem, ndele to kala omo, ino dja mo u ye koshitukulwa shimwe shi lili.
37 Mefiku olo to di mo, ndele to tauluka Efilu laKidron, kala u shi shii kutya ou na okufya. Oto ka mona oilanduliko yohonde oyo wa tilashi.”
38 Simei okwa nyamukula ohamba, a ti: “Osho wa popya osha yuka. Omupiya woye ota ningi ngaashi omwene wange ohamba a popya.” Onghee Simei okwa kala muJerusalem omafiku mahapu.
39 Ndele pexulilo lomido nhatu, ovapiya vavali vaSimei ova faduka po va ya kuAkis, omonamati waMaaka, ohamba yaGat. Eshi Simei a lombwelwa taku ti: “Tala, ovapiya voye ove li muGat,”
40 Simei okwa longekida diva ondongi yaye, ndele ta i kuAkis muGat a ka tale ovapiya vaye. Eshi Simei a aluka kuGat pamwe novapiya vaye,
41 Salomo okwa lombwelwa taku ti: “Simei okwa li a dja mo muJerusalem a ya kuGat, ndele ta aluka ko.”
42 Opo nee ohamba oya tuma i ifanenwe Simei, ndele tai ti kuye: “Inandi ku anifa kuJehova noku ku londwela kutya: ‘Efiku to di mo omu, ndele to i konhele imwe i lili, kala u shi shii kutya ou na okufya’? Kwa li wa lombwela nge kutya, ‘Eshi wa popya osha yuka, nohandi shi ningi’?
43 Ndele omolwashike ino diinina eano olo wa ningila Jehova nokudulika kwaasho nde ku lombwela?”
44 Ohamba oya tya kuSimei: “Ou shii owii aushe oo wa ningila tate David, na Jehova ote ku shunifile owii oo.
45 Ashike ohamba Salomo otai nangekwa noupuna, nolukalwapangelo laDavid otali kala la pamenena koshipala shaJehova fiyo alushe.”
46 Opo nee ohamba oya lombwela Benaia, omonamati waJehoiada, oo a ya, ndele ta ponokele Simei, noku mu dipaa.
Onghee ouhamba oo wa li meke laSalomo owa li wa pamenena.
Eshangelo lopedu
^ Eln., “Ohandi i nondjila oyo hai endwa kovanhu aveshe kombada yedu.”
^ Ile “katuka pandunge.”
^ Tala Omafatululo oitya.
^ Sha hala okutya, kOufi. Tala Omafatululo oitya.
^ Sha hala okutya, kOufi. Tala Omafatululo oitya.
^ Eln., “Omafiku.”
^ Eln., “ova li va tala kwaame.”
^ Ile “wila kuAdonia.”
