Eehamba dotete 19:1-21
19 Opo nee Ahab okwa lombwela Isabel ashishe osho Elia a ninga nanghee a dipaa ovaprofeti aveshe neongamukonda.
2 Onghee Isabel okwa tuma omutumwa kuElia e mu lombwele ta ti: “Ookalunga nava handukile nge unene ngeenge mongula ngaalo inandi ku ningila ngaashi wa ningila keshe umwe* womuvo.”
3 Onghee Elia okwa kwatwa koumbada, nokwa fikama, ndele ta faduka po, opo a xupife omwenyo waye. Okwa ya kuBer-seba muJuda, nomupiya waye oko e mu fiya oko.
4 Okwa ya molweendo lefiku limwe mombuwa, nokwa kala omutumba koshi yoshixwa, ndele ta indile a fye. Okwa ti: “Osha wana! Alikana, Jehova, dipae nge paife, osheshi kandi dule ootatekulululwa.”
5 Opo nee okwa nangala, ndele ta kofele koshi yoshixwa. Ombadilila, okwa holokelwa komweengeli nokwe mu kuma, ndele ta ti: “Penduka u lye.”
6 Eshi a penduka, pomutwe waye opa li omungome wongonga wa tenhekwa komamanya mapyu nosho yo oshitoo shomeva. Okwa lya nokunwa, ndele ta nangala vali.
7 Lwanima, omweengeli waJehova okwa aluka oshikando oshitivali, nokwe mu kuma, ndele ta ti: “Penduka u lye, osheshi olweendo otali ka kala lile.”
8 Onghee okwa penduka, ndele ta li nokunwa, neenghono odo a mona moipalwifa oyo ode mu kwafela, opo a dule okweenda omafiku 40, omutenya noufiku, fiyo osheshi a fika kuHoreb, omhunda yaKalunga kashili.
9 Eshi a fika oko, okwa ya mekololo nokwa nangala omo oufiku; ndele tala, ondjovo yaJehova oye uya kuye tai ti: “Elia, oto ningi shike apa?”
10 Opo nee Elia okwa nyamukula, a ti: “Onda kala nokulongela Jehova, Kalunga komatangakwaita, nouladi, ndele oshiwana shaIsrael inashi diinina ehangano loye, sha hanauna po eealtari doye, nosha dipaa ovaprofeti voye neongamukonda. Aame andike nda xupa po. Paife osha hala okudipaa nge.”
11 Ashike Kalunga okwa ti: “Inda, ndele to ka fikama komhunda koshipala shaJehova.” Ndele tala, Jehova okwa li ta piti po, nomhepo inene noina eenghono oya tukula eemhunda nokuteyaula omamanya koshipala shaJehova, ashike Jehova ka li momhepo oyo. Konima yomhepo, opa li ekakamo ledu, ashike Jehova ka li mekakamo ledu olo.
12 Konima yekakamo ledu, opa li omundilo, ashike Jehova ka li momundilo oo. Konima yomundilo, opa li ondaka tai popi ya ngungumana noi li pedu.
13 Diva eshi Elia a uda ondaka oyo, okwa uvika oshipala shaye noshikutu shaye shiwa, nokwa ya, ndele ta fikama poshivelo shekololo. Opo nee ondaka oye mu pula ya ti: “Elia, oto ningi shike apa?”
14 Opo nee Elia okwa nyamukula, a ti: “Onda kala nokulongela Jehova, Kalunga komatangakwaita, nouladi, ndele oshiwana shaIsrael inashi diinina ehangano loye, sha hanauna po eealtari doye, nosha dipaa ovaprofeti voye neongamukonda. Aame andike nda xupa po. Paife osha hala okudipaa nge.”
15 Jehova okwa tya kuye: “Shuna, ndele to i kombuwa yaDamaskus. Ngeenge wa fiki, vaeka Hasael a ninge ohamba yaSiria.
16 Vaeka yo Jehu, omutekulu waNimsi, a ninge ohamba yaIsrael, ndele to vaeke Elisa,* omonamati waShafat, wokuAbel-mehola, a ninge omuprofeti ponhele yoye.
17 Keshe oo ta faduka po eongamukonda laHasael, ota ka dipawa kuJehu, nakeshe oo ta faduka po eongamukonda laJehu, ota ka dipawa kuElisa.
18 Ondi na natango ovanhu 7 000 muIsrael, ovo inava twila Baal eengolo noinave mu xupita nomilungu davo.”
19 Opo nee okwa dja mo, nokwa hanga Elisa, omonamati waShafat, ta pulula neengobe, eespaana 12, nokwa li ta pulula nospaana onhi-12 yaxuuninwa. Onghee Elia okwa ya kuye, ndele te mu umbile oshikutu shaye shiwa.
20 Opo nee Elisa okwa fiya po eengobe, nokwa tondoka a yuka kuElia, ndele ta ti: “Alikana, pitike nge ndi ka lekele* meme natate, nohandi ke ku shikula.” Okwe mu nyamukula ta ti: “Inda, itandi dulu oku ku kelela.”
21 Onghee Elisa okwa shuna, nokwa kufa eengobe mbali, ndele te di yambe po. Okwa longifa oshipululo nosho yo ondjoko, opo a fulukife ombelela yeengobe odo, ndele te i pe ovanhu, nova lya. Konima yaasho, okwa fikama nokwa shikula Elia, ndele ta hovele oku mu yakula.
Eshangelo lopedu
^ Ile “ninga omwenyo woye ngaashi omwenyo wakeshe umwe.”
^ Tali ti “Kalunga oye exupifo.”
^ Eln., “xupite.”
