Mbela Ouhamba waKalunga ou li momutima woye?

DANA

Enyamukulo lopaMbiibeli

Ahowe, Ouhamba waKalunga kau fi onghalo yonhumba yomomitima dOvakriste. a Ombiibeli oya holola lela kutya Ouhamba oo ou li peni, shaashi oye u ifana “Ouhamba womeulu.” (Mateus 4:17) Diladila ashike kunghee Ombiibeli tai ulike kutya Ouhamba epangelo lolela, olo tali pangele okudja meulu.

Ouhamba waKalunga ou na ovapangeli, ovapangelwa, eemhango nosho yo omafinamhango, oo taa ufa ehalo laKalunga meulu nokombada yedu. — Mateus 6:10; Ehololo 5:10.
Epangelo laKalunga, ile Ouhamba waKalunga, otau ka pangela kedu alishe, “oiwana aishe omaludi nomalaka.” (Daniel 7:13, 14) Eenghonopangelo itadi di kovapangeli vOuhamba, ile kovapangelwa, ndele okuKalunga. — Epsalme 2:4-6; Jesaja 9:7.
Jesus okwa li a lombwela ovayapostoli vaye ovadiinini kutya otave ke mu waimina mOuhamba womeulu, opo va ka kale “omutumba komalukalwapangelo.” — Lukas 22:28, 30.
Ouhamba oo ou na ovatondi, ovo tava ka hanaunwa po kOuhamba oo. — Epsalme 2:1, 2, 8, 9; 110:1, 2; 1 Ovakorinto 15:25, 26.

Ombiibeli itai hongo kutya Ouhamba womeulu ou li momutima womunhu, ngeno meityo olo kutya ohau pangele okupitila momutima womunhu. Ashike otashi ulike kutya, ‘eendjovo, ile etumwalaka lOuhamba’ nosho yo “onghundana ei iwa yOuhamba” otai dulu okukuma omitima detu. — Mateus 13:19; 24:14.

Mbela eshi taku ti “Ouhamba waKalunga ou li mokati keni,” osha hala okutya shike?

Ovanhu vamwe ova lyalyakana nokave shii vali kutya Ouhamba waKalunga ou li peni, ngeenge tava lesha Lukas 17:21 momatoloko Eembiibeli dimwe. Pashihopaenenwa, Ombiibeli yo-King James Version oya ti, “Ouhamba waKalunga ou li munye.” Ashike opo tu ude ko ovelishe oyo mondjila, otwa pumbwa okuuda ko enenediladilo.

Ouhamba waKalunga kawa li momitima dovapataneki vaJesus ovo ve na omitima dikukutu

Jesus okwa li ta popi nOvafarisai, ongudu yovakwatelikomesho velongelokalunga, ovo have mu pataneke nova kufa ombinga meemhangela doku mu dipaifa. (Mateus 12:14; Lukas 17:20) Mbela oshi li ngoo pandunge okudiladila kutya Ouhamba waKalunga ou li momitima davo, odo ihadi itavele? Jesus okwa li e va lombwela ta ti: “Meni leni omu yadi oihelele noukolokoshi.” — Mateus 23:27, 28.

Omatoloko Eembibeli dimwe okwa yelifa nawa eendjovo daJesus, odo di li muLukas 17:21, odo tadi ti, “Ouhamba waKalunga ou li nanye apa.” (Eendjovo ofye twe di laulika; Contemporary English Version) “Ouhamba waKalunga ou li mokati keni.” (Omishangwa dopaKriste dOshigreka) Ouhamba waKalunga owa li ‘navo,’ ile “mokati” kavo meityo olo kutya Jesus, oo a tulwa po kuKalunga a pangele e li Ohamba, okwa li a fikama komesho yavo. — Lukas 1:32, 33.

a Omaitavelo mahapu, oo haku tiwa opaKriste, ohaa hongo kutya Ouhamba waKalunga ou li momutima womunhu. Pashihopaenenwa, eitavelo limwe li li moUnited States hali ifanwa o-Southern Baptist Convention ola popya kutya oshitukulwa shOuhamba waKalunga otashi “pangele momitima nomeenghalamwenyo dovanhu pauhandimwe.” Sha faafana, Omupapa Benedict XVI, okwa popya membo laye ledina, Jesus of Nazareth, a ti kutya, “Ouhamba waKalunga ohau uya momutima oo hau pwilikine.”