Ovakriste ova itavela kutya Jesus okwa fya omolwomatimba ovanhu. (1 Petrus 3:18) Ndele opo tu ka xupifwe otu na okuninga shihapu shihe fi ashike okwiitavela muJesus e li Omuxupifi. Eendemoni odi shii kutya Jesus “Omona waKalunga,” ashike itadi ka xupifwa, ndele otadi ka hanaunwa po. — Lukas 4:41; Judas 6.

•  Oshike ndi na okuninga opo ndi ka xupifwe?

•  Ongahelipi shi na sha “nEilikano lOmulunde”?

•  Osha enda ngahelipi opo pa kale “Eilikano lOmulunde”?

•   Ou na okwiitavela kutya Jesus okwa yandja omwenyo waye u li ekuliloyambo omolwomatimba etu. (Oilonga 16:30, 31; 1 Johannes 2:2) Osho osha kwatela mo okwiitavela kutya Jesus okwa li omunhu wolela nosho yo kutya osho omahokololo Ombiibeli a popya kombinga yaye oshoshili.

•   Lihonga osho Ombiibeli tai ti lela. (2 Timoteus 3:15) Ombiibeli oya popya kutya omuyapostoli Paulus naSilas ova lombwela omukeleli wodolongo kutya: “Itavela Omwene Jesus Kristus, opo to ka xupifwa.” Konima yaasho, ova li va hovela okuhonga omukeleli wodolongo oo “eendjovo daJehova.” a (Oilonga 16:31, 32) Osho otashi ulike kutya omukeleli wodolongo ka li ta dulu okwiitavela Jesus, okuninga shapo e shii omahovelohongo Eendjovo daKalunga. Okwa li a pumbwa eshiivo lashili la kanghamena kOmishangwa. — 1 Timoteus 2:3, 4.

•   Lidilulula. (Oilonga 3:19) Ou na okulidilulula, ile okukala wa nyika oluhodi omolwoikala nelihumbato loye lii lomonakudiwa. Ovanhu ove na okumona kutya owe lidilulula eshi wa efa po oilonga oyo hai nyemateke Kalunga nokulonga “oilonga oyo tai ulike elidilululo.” — Oilonga 26:20.

•   Ninginifwa. (Mateus 28:19) Jesus okwa ti kutya ovo tava ningi ovahongwa vaye ove na okuninginifwa. Omukeleli wodolongo oo a tumbulwa pehovelo okwa li a ninginifwa. (Oilonga 16:33) Sha faafana, konima eshi omuyapostoli Petrus a honga ongudu yovanhu kombinga yaJesus, “ovo va li va tambula ko nehafo eendjovo daye ova li va ninginifwa.” — Oilonga 2:40, 41.

•   Dulika komalombwelo aJesus. (Ovaheberi 5:9) Ovo hava ‘diinine oinima aishe’ oyo Jesus a popya ohave shi ulike monghalamwenyo yavo kutya ove li ovashikuli vaye. (Mateus 28:20) Ove li “ovawanifi veendjovo, ndele havapwilikini ashike vongaho.” — Jakob 1:22.

•   Lididimika fiyo okexulilo. (Markus 13:13) Ovahongwa vaJesus ova “pumbwa elididimiko” opo va ka xupifwe. (Ovaheberi 10:36) Pashihopaenenwa, omuyapostoli Paulus okwa kala ha dulika komahongo aJesus nokwa kala omudiinini kuKalunga okudja kefiku olo a ninga Omukriste fiyo osheshi a fya. — 1 Ovakorinto 9:27.

 Oilyo imwe yomalongelokalunga oya itavela kutya ope na “Eilikano lOmulunde” nosho yo “Eilikano lExupifo.” Ovo hava ilikana omailikano oo ohava holola oulunde wavo nokuholola kutya Jesus okwe va fila omolwomatimba avo. Ohava pula Jesus e uye momitima davo ile meenghalamwenyo davo. Ashike kape na apa Ombiibeli ya popya kutya ope na “Eilikano lOmulunde.”

 Ovanhu vamwe ova itavela kutya ngeenge omunhu a mane okwiindila “Eilikano lOmulunde,” kungaho okwa shilipalekwa kutya ota ka xupifwa. Ndele meilikano lovene ihamu di exupifo. Tu li ovanhu inatu wanenena, ohatu twikile okuninga omapuko. (1 Johannes 1:8) Nomolwaashi Jesus a honga ovashikuli vaye va kale hava ilikana pandjikilile tava pula ediminepo. (Lukas 11:2, 4) Ashike Ovakriste vamwe, ovo ve na eteelelo loku ka mona omwenyo waalushe, ohava kanifa oufembanghenda wa tya ngaho molwaashi va sholola ile va efa po okulongela Kalunga. — Ovaheberi 6:4-6; 2 Petrus 2:20, 21.

 Ovanandjokonona itava tu kumwe noudilo “wEilikano lOmulunde.” Vamwe ova popya kutya eilikano olo ola totwa po pefimbo lEyelifo leitavelo lOvaprotestante. Vamwe ova itavela kutya “Eilikano lOmulunde” ola totwa po komalongelokalunga oo a li ko mefelemudo eti-18 nosho yo eti-19. Kashi na nee mbudi kutya osha enda ngahelipi, Omishangwa itadi yambidida eilikano olo, notali kondjifafana nomahongo Ombiibeli.