Ahowe. Ombiibeli otai ulike kutya otu na ashike okwiilikana kuKalunga, hatu pitile medina laJesus. Jesus okwa lombwela ovahongwa vaye a ti: “Hano omu na okwiilikana ngaha: ‘Tate yetu ou u li meulu, edina loye nali yapulwe.’” (Mateus 6:9) Jesus ina honga ovahongwa vaye va ilikane kwaavo va talika ko ovayapuki, kovaengeli ile kuumwe vali ehe fi Kalunga.

 Jesus okwa lombwela ovashikuli vaye ta ti: “Aame ondjila, noshili nomwenyo. Kape na ou te uya kuTate, ngeenge ita pitile mwaame.” (Johannes 14:6) Jesus oye aeke a tulwa po kuKalunga e li omupokati wetu. — Ovaheberi 7:25.

Ongahelipi ngeenge ohandi ilikana kuKalunga nokwaavo yo va talika ko ovayapuki?

 Kalunga okwa popya shi na sha nOipango Omulongo a ti: “Aame Omwene Kalunga koye, Aame Kalunga omuladi,” ile tu tye e na ondubo. (Exodus 20:5) Omonghedi ilipi Kalunga “omuladi,” ile e na ondubo? Ombiibeli yo-New American oya popya meshangelo lopedu kutya okwa “hala okulongelwa oye aeke.” Kalunga okwa hala okulongelwa oye aeke, osho sha kwatela mo okwiilikana kuye odikilila. — Jesaja 48:11.

 Ohatu ka nyemateka Kalunga ngeenge otwa ilikana kuumwe e lili, kutya nee okwaavo va talika ko ovayapuki ile okovaengeli ovayapuki. Eshi omuyapostoli Johannes a li ta kendabala okulinyongamena omweengeli, omweengeli okwa li e mu kelela ta ti: “Ino linyongamena nge. Linyongamena Kalunga! Ame naame omupiya ngaashi ove nongaashi ovamwaxo ovo hava udifa kombinga yaJesus. Osheshi ovaprofeti ova nwefwa mo va hepaulule kombinga yaJesus.” — Ehololo 19:10.