Mũndũ ũrĩa mũhikanĩtie nake akoiga kana ageka ũndũ wa gũkũrakaria, nawe ũkageria kũhingĩrĩria marakara maku. No mũndũ ũcio mũhikanĩtie nake akona atĩ nĩ warakara na agakũũria nĩ kĩĩ kĩũru. Ũndũ ũcio ũgakũrakaria o na makĩria. Nĩ kĩĩ kĩngĩgũteithia kũgirĩrĩria marakara maku maũndũ-inĩ ta macio?

•  Maũndũ marĩa wagĩrĩirũo kũmenya

•  Ũrĩa ũngĩka

•   Gwĩtĩkĩria marakara magũtongorie no gũthũkie ũgima waku wa mwĩrĩ. Ũthuthuria wonanagia atĩ kwaga kũgirĩrĩria marakara no kuongerere ũhotekeku wa kũhaica thakame, kũnyitwo nĩ mũrimũ wa ngoro, gũthuthĩka ngoro, na mathĩna ma nda. Ningĩ marakara nĩ makuruhithanagio na kũũrũo nĩ toro, gũtangĩka mũno, mathĩna ma ngothi, na mũrimũ wa gũkua ciĩga. Nĩkĩo Bibilia yugaga ũũ: “Eheria marakara . . . , tondũ ũndũ ũcio no ũtũme wĩke ũũru.”—Thaburi 37:8, kohoro ka magũrũ-inĩ.

•   O na kũhingĩrĩria marakara no gũkorũo na moimĩrĩro moru. Marakara mangĩtĩkĩrio gũthiĩ na mbere no mahaane ta mũrimũ ũrakũrĩĩra na thĩinĩ. Kwa ngerekano, no ũkũrie mwerekera wa kuonaga o mahĩtia tu. Roho ta ũcio no ũtũme andũ angĩ maritũhĩrũo gũikarania nawe na no ũthũkie kĩhiko gĩaku biũ.

•   Rora ngumo njega cia ũrĩa mũhikanĩtie nake. Andĩka maũndũ matatũ marĩa magũkenagia ma ũrĩa mũhikanĩtie nake. Hĩndĩ ĩngĩ angĩka ũndũ wa gũkũrakaria, wĩcirie ũhoro wa ngumo iria waandĩkire. Ũndũ ũcio no ũgũteithie kũgirĩrĩria marakara maku.

   Ũtaaro wa Bibilia: ‘Onanagiai atĩ mũrĩ na ngatho.’—Akolosai 3:15.

•   Kũria mwerekera wa kuohanĩra. Amba ũgerie kuona maũndũ na muonere wa mũndũ ũcio mũhikanĩtie nake. Ũndũ ũcio no ũgũteithie gũkũria ngumo ya “tha.” (1 Petero 3:8) Ũcoke wĩyũrie atĩrĩ, ‘Hihi ndĩ na gĩtũmi kĩnene gĩa kũrakara ũũ atĩ ndingĩmuohera?’

   Ũtaaro wa Bibilia: “Nĩ ũthaka . . . kwaga gũtindanĩra na mahĩtia.”—Thimo 19:11.

•    Taarĩria ũrĩa ũraigua na njĩra ya wendo na ũũgĩ. Hũthĩra kiugo “niĩ’ ũkĩaria. Kwa ngerekano, handũ ha kuuga, “Wee ndwĩciragia ũhoro wakwa tondũ ndũhũũragĩra thimũ kũnjĩra kũrĩa ũrĩ,” uga, “Niĩ nĩ makaga rĩrĩa gwatuka na ndiramenya kana ũrĩ ũgwati-inĩ.” Gũtaarĩria ũrĩa ũraigua na njĩra ya ũhooreri no gũgũteithie kũgirĩrĩria marakara maku.

   Ũtaaro wa Bibilia: “Rekei ciugo cianyu ikoragwo irĩ cia ũtugi hingo ciothe, ta ciĩkĩrĩtwo cumbĩ.”—Akolosai 4:6.

•    Thikĩrĩria na njĩra ya gĩtĩo. Thutha wa gũtaarĩria ũrĩa ũraigua, ĩtĩkĩria mũndũ ũrĩa mũhikanĩtie nake eyarie ũtekũmũtinia. Arĩkia kwaria, cokera ũrĩa oiga ũkĩhũthĩra ciugo ciaku wone kana nĩ wataũkĩrũo wega. Gũthikĩrĩria tu no gũkorũo na itemi inene harĩ gũgũteithia kũgirĩrĩria marakara maku.

   Ũtaaro wa Bibilia: ‘Hiũhaga gũthikĩrĩria, ndũkahiũhage kwaria.’—Jakubu 1:19.