Aca, gũtirĩ hĩndĩ Thĩ ĩno ĩkaaniinwo, kana ĩcinwo, o na kana kũũmbwo thĩ ĩngĩ ithenya rĩayo. Bibilia ĩrutanaga atĩ Ngai oombire thĩ nĩguo ĩtũũragwo tene na tene.

•   “Andũ arĩa athingu nĩ makaagaya thĩ, na magaatũũra thĩinĩ wayo tene na tene.”—Thaburi 37:29.

•   “[Ngai] nĩ ahandĩte thĩ igũrũ rĩa mĩthingi yayo; gũtirĩ hĩndĩ ĩkeherio harĩa ĩrĩ tene na tene.”—Thaburi 104:5.

•   “Thĩ ĩtũũraga tene na tene.”—Kohelethu 1:4.

•   “Ũrĩa wombire thĩ, Mũũmbi wayo ũrĩa wamĩrũmirie wega, . . . ndaamĩũmbire hatarĩ gĩtũmi, ĩndĩ aamĩũmbire nĩguo ĩtũũragwo.”—Isaia 45:18.

 Ngai ndangĩtĩkĩria andũ manange thĩ biũ kũgerera kũmĩthũkangia, mbaara, kana o na njĩra ingĩ. Handũ ha ũguo, nĩ “[arĩananga] arĩa manangaga thĩ.” (Kũguũrĩrio 11:18) Ageeka ũguo atĩa?

 Ngai nĩ akeeheria thirikari cia andũ, iria iremetwo nĩ kũgitĩra thĩ, na ithenya rĩacio aarehe Ũthamaki wa igũrũ. (Danieli 2:44; Mathayo 6:9, 10) Mũthamaki wa Ũthamaki ũcio nĩ Jesu Kristo, Mũrũ wa Ngai. (Isaia 9:6, 7) Rĩrĩa Jesu aarĩ gũkũ thĩ nĩ aahũthagĩra hinya ũrĩa aahetwo nĩ Ngai gwatha mahinya ma ndũire. (Mariko 4:35-41) Arĩ Mũthamaki wa Ũthamaki wa Ngai, nĩ akaahũthĩra hinya ũcio gwatha thĩ yothe o hamwe na mahinya mayo ma ndũire. Nĩ akeerũhia maũndũ thĩinĩ wa thĩ, atũme mahaane ta ũrĩa maarĩ thĩinĩ wa mũgũnda wa Edeni.—Mathayo 19:28; Luka 23:43.

 Aca, ndĩrutanaga ũguo. Mawoni macio mahĩtanu moimanaga na gũtaũkĩrũo ũũru nĩ rĩandĩko rĩa 2 Petero 3:7 rĩrĩa riugaga ũũ: “Igũrũ na thĩ iria irĩ kuo rĩu ciigĩirũo mwaki.” Reke tũrore maũndũ merĩ ma bata marĩa mangĩtũteithia gũtaũkĩrũo nĩ ciugo icio:

1.   Bibilia ĩhũthagĩra ciugo “igũrũ,” “thĩ,” na “mwaki” kuonania maũndũ matiganĩte. Kwa ngerekano, Kĩambĩrĩria 11:1 yugaga ũũ: “Thĩ yothe ĩgĩthiĩ na mbere gũkorũo na rũthiomi rũmwe.” Thĩinĩ wa mũhari ũcio, “thĩ” ĩrarũgamĩrĩra andũ.

2.   Ciugo iria ithiũrũrũkĩirie 2 Petero 3:7 nĩ cionanagia kĩrĩa kĩrũgamĩrĩirũo nĩ “igũrũ,” “thĩ,” na “mwaki” mũhari-inĩ ũcio. Mũhari wa 5 na 6 ũringithanagia ũndũ ũcio na Mũiyũro wa hĩndĩ ya Nuhu. Hĩndĩ ĩyo, thĩ ĩrĩa yarĩ kuo nĩ yaanangirũo, no thĩ ĩno itũ ĩrĩ o kuo. Mũiyũro ũcio waniinire andũ arĩa meekaga maũndũ moru, kana “thĩ.” (Kĩambĩrĩria 6:11) Ningĩ nĩ waanangire “igũrũ” rĩa mũhaano—andũ arĩa maathanaga thĩinĩ wa thĩ ya hĩndĩ ĩyo. Kwoguo, andũ arĩa oru nĩo maanangirũo no ti thĩ ĩno itũ. Nuhu na famĩlĩ yake nĩ maahonokire hĩndĩ ya mwanangĩko ũcio na magĩthiĩ na mbere gũtũũra thĩinĩ wa thĩ thutha wa Mũiyũro.—Kĩambĩrĩria 8:15-18.

 O ta hĩndĩ ya Mũiyũro ũcio wa maĩ, mwanangĩko, kana “mwaki” ũrĩa ũgwetetwo thĩinĩ wa 2 Petero 3:7 ũkaaniina andũ arĩa aganu thĩinĩ wa thĩ, no ti thĩ yo nyene. Ngai nĩ eranĩire “igũrũ rĩerũ na thĩ njerũ” kũrĩa “gũgaatũũra ũthingu.” (2 Petero 3:13) “Thĩ njerũ,” kana andũ arĩa athingu, magaathagwo nĩ “igũrũ rĩerũ,” kana ũtongoria mwerũ wa Ũthamaki wa Ngai. Rungu rwa Ũthamaki ũcio, thĩ ĩgaakorũo ĩrĩ paradiso ĩrĩ na thayũ.—Kũguũrĩrio 21:1-4.