Ĩĩ no ĩgũteithie! Bibilia yumĩte kũrĩ Ngai “o we ũũmagĩrĩria arĩa makuĩte ngoro.” (2 Akorintho 7:6) O na gũtuĩka Bibilia ti ibuku rĩaragĩrĩria ũhoro wĩgiĩ thĩna wa meciria, nĩ ĩteithĩtie andũ aingĩ gũtooria meciria ma kwenda kwĩyũraga. Ũtaaro wayo no ũgũteithie o nawe.

•  Bibilia ĩtũheaga ũtaaro ũrĩkũ?

•  Hihi Bibilia nĩ yarĩtie ũhoro wĩgiĩ andũ meeriragĩria gũkua?

•  Nĩ mĩhari ĩrĩkũ ya Bibilia ĩngĩgũteithia kweheria meciria ma kwenda kwĩyũraga?

•  Ũngĩka atĩa mũrata waku angĩkwĩra, “Nĩ ngwĩyũraga”?

•  Ĩ angĩkorũo ndanageria kwĩyũraga mahinda mahĩtũku?

• ● Wĩyarie.

   Ũrĩa Bibilia yugaga: “Mũrata wa ma onanagia wendo hingo ciothe, na aciarĩtwo atuĩke mũrũ wa nyina na mũndũ hĩndĩ ya mĩtangĩko.”—Thimo 17:17.

   Ũrutani: Nĩ tũbataraga ũteithio wa andũ arĩa angĩ rĩrĩa tũrĩ na mĩtangĩko.

   Ũngĩaga kwĩyaria no ũtoorio nĩ mĩtangĩko yaku. No ũngĩra andũ arĩa angĩ ũrĩa ũraigua, mĩtangĩko yaku no ĩnyihanyihe na wambĩrĩrie kuona maũndũ na njĩra ngũrani.

   Geria ũũ: Aria na mũndũ ũmũthĩ, hihi mũndũ wa famĩlĩ yanyu kana mũrata wĩhokete. a Ningĩ no wĩyarie na njĩra ya kwandĩka ũrĩa ũraigua.

• ● Etha ũrigitani.

   Ũrĩa Bibilia yugaga: “Andũ arĩa marĩ na ũgima mwega wa mwĩrĩ matibataraga ndagĩtarĩ, no arĩa arwaru nĩo mamũbataraga.”—Mathayo 9:12.

   Ũrutani: Nĩ twagĩrĩirũo gũcaria ũteithio wa ndagĩtarĩ rĩrĩa tũrĩ arwaru.

   Kwenda kwĩyũraga no gũkorũo kuumanĩte na mũrimũ wa meciria kana gũthuthĩka ngoro. Ndwagĩrĩirũo gũconoka gũthiĩ kũrĩ ndagĩtarĩ, o ta ũrĩa ũtangĩconoka gũthiĩ kũrigitwo mũrimũ ũngĩ o wothe. Andũ nĩ marigitagwo mũrimũ wa meciria na gũthuthĩka ngoro na makahona.

   Geria ũũ: Etha ũteithio wa ndagĩtarĩ na ihenya o ũrĩa kwahoteka.

• ● Ririkana atĩ Ngai nĩ akũrũmbũyagia.

   Ũrĩa Bibilia yugaga: “Githĩ tũnyoni tũtano tũtiendagio tũthendi twĩrĩ twa thogora mũnini? No gũtirĩ o na kamwe ga tuo Ngai ariganagĩrũo nĩko. . . . Mũtigetigĩre; inyuĩ mũrĩ a bata gũkĩra tũnyoni tũingĩ.”—Luka 12:6, 7.

   Ũrutani: Ũrĩ wa bata mũno maitho-inĩ ma Ngai.

   No wone ta gũtarĩ mũndũ ũratindanĩra nawe, no Ngai nĩ onaga maũndũ marĩa ũragerera. Nĩ akũrũmbũyagia, o na rĩrĩa ũraigua ta ũkinyĩte mũico. Thaburi 51:17 yugaga, “Ngoro ĩthuthĩkĩte na ĩkahehenjeka, wee Ngai ndũngĩmĩrega.” Ngai nĩ arenda ũthiĩ na mbere gũtũũra tondũ nĩ akwendete.

   Geria ũũ: Caria ũira thĩinĩ wa Bibilia ũronania atĩ Ngai nĩ akwendete. Kwa ngerekano, thoma gĩcunjĩ kĩa 24 kĩa ibuku rĩaragĩrĩria Bibilia rĩĩtagwo Kuhĩrĩria Jehova.

• ● Hoya Ngai.

   Ũrĩa Bibilia yugaga: “O [mũgĩikagĩria Ngai] mĩtangĩko yanyu yothe, tondũ nĩ amũrũmbũyagia.”—1 Petero 5:7.

   Ũrutani: Ngai nĩ endaga ũmwĩre cara-rũkũ ũrĩa ũraigua na maũndũ marĩa maratũma ũtangĩke.

   Ngai no akũhe thayũ wa meciria na hinya ũrĩa ũrabatara nĩguo ũhote gũkirĩrĩria maũndũ marĩa ũragerera. (Afilipi 4:6, 7, 13) Nĩ ekaga ũguo gũteithia andũ arĩa mamũhoyaga kuuma ngoro makĩenda ũteithio.—Thaburi 55:22.

   Geria ũũ: Hoya Ngai ũmũthĩ. Hũthĩra rĩĩtwa rĩake Jehova, na ũmwĩre ũrĩa ũraigua. (Thaburi 83:18) Mwĩre akũhe hinya wa gũthiĩ na mbere.

• ● Wĩcũranie kĩĩrĩgĩrĩro kĩa Bibilia kĩgiĩ mahinda marĩa maroka.

   Ũrĩa Bibilia yugaga: “Tũrĩ na kĩĩrĩgĩrĩro kĩu gĩtariĩ ta nanga ya muoyo, nĩ kĩa ma na nĩ kĩrũmu.”—Ahibirania 6:19.

   Ũrutani: O ta ũrĩa gatarũ kangĩikio igũrũ gagĩcokagio thĩ nĩ makũmbĩ, rĩmwe no ũiguage ũrĩ mũkenu na rĩngĩ ũkaigua ũkuĩte ngoro, no kĩĩrĩgĩrĩro kĩrĩa gĩkoragwo Bibilia-inĩ no gĩgũteithie gũkorũo na ũigananĩru.

   Kĩĩrĩgĩrĩro kĩu ti ũndũ wa gwĩcirĩria, no nĩ ũndũ wa ma twĩrĩirũo nĩ Ngai atĩ nĩ agaatwehereria ruo.—Kũguũrĩrio 21:4.

   Geria ũũ: Wĩrute ũhoro makĩria wĩgiĩ kĩĩranĩro kĩu kĩa Bibilia thĩinĩ wa ithomo rĩa 5 rĩa kabuku getagwo Ũhoro Mwega Kuuma Kũrĩ Ngai!

• ● Ĩka kaũndũ karĩa wendete.

   Ũrĩa Bibilia yugaga: “Ngoro ĩrĩ na gĩkeno nĩ ndawa njega.”—Thimo 17:22.

   Ũrutani: No twagagĩrie ũgima witũ wa meciria na tũtige gũthuthĩka ngoro tũngĩka kaũndũ karĩa twendete.

   Geria ũũ: Ĩka kaũndũ karĩa wendete. Kwa ngerekano, thikĩrĩria nyĩmbo ingĩgwaka, ũthome kaũndũ ga gwĩkĩra ngoro, kana wĩke kaũndũ karĩa gagũkenagia. Ningĩ gĩkeno gĩaku no kĩongerereke ũngĩteithia andũ arĩa angĩ, o na akorũo no tũmaũndũ-inĩ tũnini.—Atũmwo 20:35.

• ● Rũmbũiya ũgima waku wa mwĩrĩ.

   Ũrĩa Bibilia yugaga: “Kũmenyeria mwĩrĩ kũrĩ ũguni.”—1 Timotheo 4:8.

   Ũrutani: Nĩ tũgunĩkaga rĩrĩa twamenyeria mwĩrĩ, twakoma toro wa kũigana, na twarĩa irio cia gwaka mwĩrĩ.

   Geria ũũ: Ceracera nĩguo ũnogore magũrũ, o na akorũo nĩ ihinda rĩa ndagĩka 15.

• ● Ririkana atĩ maũndũ ũtũũro-inĩ no macenjie o na kana ũrĩa ũraigua.

   Ũrĩa Bibilia yugaga: “Mũtiũĩ ũrĩa ũtũũro wanyu ũgaakorũo ũhaana rũciũ.”—Jakubu 4:14.

   Ũrutani: Ũndũ ũrĩa ũragũthĩnia, o na ũrĩa ũroneka ta ũtarĩ kĩhonia, no ũkorũo ũrĩ wa ihinda inini.

   O na ũngĩkorũo ũkĩgerera ũndũ mũritũ atĩa ũmũthĩ, rũciũ maũndũ no macenjie. Kwoguo geria gwĩciria ũrĩa ũngĩhiũrania na thĩna ũcio. (2 Akorintho 4:8) Thutha wa ihinda ũndũ ũrĩa ũragũthĩnia no ũcenjie, no ũngĩĩyũraga ndũngĩhota gũcenjia ũndũ ũcio.

   Geria ũũ: Thoma ũhoro wa andũ maakuĩte ngoro nginya makerirĩria gũkua thĩinĩ wa Bibilia, na ũrĩa ũtũũro wao wacokire ũgĩcenjia ũkĩagĩra nginya na njĩra matangĩecirĩirie. Reke tuone ngerekano cia amwe ao.

 Ĩĩ. Bibilia nĩ yarĩtie ũhoro wĩgiĩ andũ amwe meeriragĩria gũkua. Ngai ndaigana kũmamenereria, no nĩ aamateithirie. O nawe no agũteithie o tao.

Elija

•  ● Hihi aarĩ ũũ? Aarĩ mũnabii wakoragwo na ũcamba. No rĩmwe na rĩmwe nĩ aaiguaga akuĩte ngoro. Jakubu 5:17 yugaga, “Elija aarĩ mũndũ o ta ithuĩ.”

•  ● Nĩ kĩĩ gĩatũmaga erirĩrie gũkua? Kũrĩ hĩndĩ ĩmwe aaiguaga atiganĩirio, arĩ na guoya, na arĩ mũndũ ũtarĩ kĩene. Kwoguo akĩhoya akiuga: “Jehova, rĩu nduta muoyo.”—1 Athamaki 19:4.

•  ● Nĩ kĩĩ kĩamũteithirie? Elija nĩ eerire Ngai ĩmwe kwa ĩmwe maũndũ marĩa maamũthĩnagia. Hihi Ngai eekire atĩa nĩguo amwĩkĩre ngoro? Nĩ oonirie Elija atĩ nĩ aamũrũmbũyagia na akĩmũteithia kuona atĩ we nĩ Ngai ũkoragwo na hinya mũingĩ. Ningĩ nĩ eerire Elija atĩ aarĩ mũndũ wa bata na akĩmũhe mũndũ wa kũmũteithĩrĩria.

•  ▸ Thoma ũhoro wĩgiĩ Elija: 1 Athamaki 19:2-18.

Ayubu

•  ● Hihi aarĩ ũũ? Aarĩ mũthuri mũtongu warĩ na famĩlĩ na aatungatagĩra Ngai arĩ na wĩhokeku.

•  ● Nĩ kĩĩ gĩatũmaga erirĩrie gũkua? Ũtũũro wake wacenjirie o rĩmwe, maũndũ makĩharagana. Akĩũrũo nĩ indo ciake ciothe. Ciana ciake ciothe igĩkua thutha wa rũhuho rũnene. Akĩrwara mũrimũ warĩ na ruo mũno. Na mũthia-inĩ akĩĩrũo atĩ mathĩna make moimanĩte na we mwene, o na gũtuĩka ũguo tiguo kwarĩ. Ayubu ooigire ũũ: “Nĩ thũũrĩte muoyo wakwa; ndikwenda gũthiĩ na mbere gũtũũra.”—Ayubu 7:16.

•  ● Nĩ kĩĩ kĩamũteithirie? Ayubu nĩ aahoire Ngai na akĩaria na andũ arĩa angĩ. (Ayubu 10:1-3) Nĩ eekĩrirũo ngoro nĩ mũrata wake warĩ na ũcayanĩri wetagwo Elihu ũrĩa wamũteithirie kuona maũndũ na njĩra ĩrĩa yagĩrĩire. Makĩria ma maũndũ mothe, Ayubu nĩ aakeneire kũrũngwo o na gũteithio nĩ Ngai.

•  ▸ Thoma ũhoro wĩgiĩ Ayubu: Ayubu 1:1-3, 13-22; 2:7; 3:1-13; 36:1-7; 38:1-3; 42:1, 2, 10-13.

Musa

•  ● Hihi aarĩ ũũ? Musa aarĩ mũtongoria wa rũrĩrĩ rwa tene rwa Isiraeli, na aarĩ mũnabii mwĩhokeku.

•  ● Nĩ kĩĩ gĩatũmaga erirĩrie gũkua? Musa eehokeirũo wĩra mũritũ, aaikaraga akĩmenagĩrĩrio, na aaiguaga arĩ mũnogu. Kwoguo akĩhoya Ngai akĩmwĩra: “Ndagũthaitha ũnjũrage o rĩu.”—Ndari 11:11, 15.

•  ● Nĩ kĩĩ kĩamũteithirie? Musa nĩ eerire Ngai ũrĩa aaiguaga. Ngai nĩ aateithirie Musa kũhũthahũthĩrũo nĩ wĩra nĩguo anyihie mĩtangĩko.

•  ▸ Thoma ũhoro wĩgiĩ Musa: Ndari 11:4-6, 10-17.