Mikaeli, ũrĩa ndini imwe ciĩtaga “Mũtheru Mikaeli,” nĩ rĩĩtwa rĩa Jesu rĩrĩa aaheirũo atanoka gũkũ thĩ, na acoka igũrũ. a Mikaeli nĩ maakararanirie na Shaitani thutha wa Musa gũkua na agĩteithia mũraika ũmwe gũtwara ndũmĩrĩri ya Ngai kũrĩ mũnabii Danieli. (Danieli 10:13, 21; Judasi 9) Mikaeli atũũraga kũringana na rĩĩtwa rĩake, rĩrĩa riugĩte “Nũũ Ũhaana ta Ngai?” na njĩra ya gũtetera wathani wa Ngai na kũrũa na thũ cia Ngai.—Danieli 12:1; Kũguũrĩrio 12:7.

 Reke tũrore itũmi iria ingĩtũma tuuge atĩ Jesu nĩwe Mikaeli Mũraika Ũrĩa Mũnene.

•   Mikaeli nĩwe “mũraika ũrĩa mũnene.” (Judasi 9) Ciugo “mũraika ũrĩa mũnene” iria ciugĩte mũnene wa araika, cionekaga thĩinĩ wa Bibilia mĩhari-inĩ ĩĩrĩ tu. Mĩhari-inĩ ĩyo ĩĩrĩ ciugo icio ihũthĩrĩtwo kuonania mũndũ o ũmwe, ũguo nĩ kuuga mũraika ũrĩa mũnene no ũmwe tu. Mũhari ũmwe ũroiga Mwathani Jesu thutha wa kũriũkio “agaaikũrũka kuuma igũrũ na mũgambo mũnene, na mũgambo wa mũraika ũrĩa mũnene.” (1 Athesalonike 4:16) Jesu arĩ na “mũgambo wa mũraika ũrĩa mũnene” tondũ nĩwe Mikaeli mũraika ũrĩa mũnene.

•   Mikaeli nĩ athaga mbũtũ ya araika. “Mikaeli na araika ake [nĩ maarũire] na ndamathia,” nĩyo Shaitani. (Kũguũrĩrio 12:7) Mikaeli akoragwo na wathani mũnene kũũrĩa igũrũ, tondũ etĩtwo “ũmwe wa anene arĩa atĩĩku mũno” na “mũnene.” (Danieli 10:13, 21; 12:1) O ta ũrĩa mũthomi ũmwe wa maandĩko ma Kĩrĩkanĩro Kĩrĩa Kĩerũ David E. Aune oigĩte, “marĩĩtwa macio monanagia Mikaeli nĩwe mũtongoria ũrĩa mũnene wa mbũtũ cia araika.”

   Bibilia ĩgwetaga rĩĩtwa rĩngĩ rĩmwe tu rĩa mũndũ ũkoragwo na wathani igũrũ rĩa mbũtũ ya araika. Nĩ ĩtaarĩirie ũrĩa “Mwathani Jesu akaaguũranĩrio kuuma igũrũ arĩ hamwe na araika ake marĩ hinya arĩ na mwaki ũrarĩrĩmbũka, rĩrĩa agooka kwĩrĩhĩria.” (2 Athesalonike 1:7, 8; Mathayo 16:27) Jesu “nĩ aambatire igũrũ, na araika na monene na mahinya nĩ maaigirũo rungu rwake.” (1 Petero 3:21, 22) Gũtingĩhoteka Ngai atue Jesu na Mikaeli atongoria erĩ ngũrani a mbũtũ ya araika. Kwoguo marĩĩtwa macio merĩ, Jesu na Mikaeli, no mũhaka makorũo mararũgamĩrĩra mũndũ ũmwe.

•   Mikaeli ‘nĩ akaarũgama ihinda rĩa mĩtangĩko’ ĩtarĩ yoneka rĩngĩ. (Danieli 12:1) Thĩinĩ wa ibuku rĩa Danieli, kiugo ‘kũrũgama’ kaingĩ nĩ kĩhũthagĩrũo kuonania Mũthamaki ũrarahũka nĩguo oe ikinya rĩna rĩa mwanya. (Danieli 11:2-4, 21) Jesu Kristo ũrĩa wĩtagwo “Kiugo kĩa Ngai” nĩ akoya ikinya rĩa mwanya arĩ “Mũthamaki wa athamaki” aniine thũ cia Ngai na agitĩre andũ a Ngai. (Kũguũrĩrio 19:11-16) Ageeka ũguo hĩndĩ ya “thĩna mũnene ũtarĩ woneka kuuma kĩambĩrĩria gĩa thĩ.”—Mathayo 24:21, 42.