Bibilia yugaga atĩ wendi wa Ngai nĩ andũ ‘methemage ngomanio itagĩrĩire.’ (1 Athesalonike 4:3) Bibilia ĩkĩhũthĩra ciugo “ngomanio itagĩrĩire,” ĩkoragwo ĩkĩaria ũhoro wa ũtharia, ngomanio na ihiko cia arũme kwa arũme kana atumia gwa atumia, na ngomanio gatagatĩ ka mũthuri na mũtumia matahikanĩtie.

•  Ngai endaga mũthuri na mũtumia arĩa marenda gũikarania mahikanie nĩkĩ?

•  Hihi andũ nĩ magĩrĩire kwamba gũikarania matanahikania nĩguo mone kana nĩ maganĩrĩire?

•  Andũ mahikanĩtie mangĩka atĩa nĩguo mekĩre kĩhiko kĩao hinya?

•   Ngai nĩwe waambĩrĩirie mũbango wa kĩhiko. Eekire ũguo rĩrĩa oombire mũthuri na mũtumia wa mbere na akĩmaiga hamwe. (Kĩambĩrĩria 2:22-24) Wendi wake ndwarĩ mũthuri na mũtumia maikaranie matarĩ na mũbango wa gũtũũrania tene na tene.

•   Kũrũmĩrĩra motaaro ma Ngai nĩ kũrĩ ũguni. Ngai akĩambĩrĩria mũbango wa kĩhiko, eendaga mũthuri na mũtumia matũũrie kĩhiko kĩao, na ũndũ ũcio nĩ ũngĩagunire na ũgitĩre andũ othe thĩinĩ wa famĩlĩ. Ta wĩcirie ngerekano ĩno. O ta ũrĩa motaaro ma mũndũ ũthondekete kĩndũ kĩna mangĩgũteithia kũnyitithania kĩndũ kĩu wega, no taguo motaaro ma Ngai mangĩtũteithia kwagĩria kĩhiko gitũ. Arĩa marũmagĩrĩra motaaro ma Ngai hĩndĩ ciothe nĩ magunĩkaga.—Isaia 48:17, 18.

•   Ngomanio nja wa kĩhiko nĩ ikoragwo na moimĩrĩro moru mũno. Kwa ngerekano, no itũme mũndũ agĩe nda itagĩrĩire, agĩe na mĩrimũ ya kũgwatanio kũgerera ngomanio, na athuthĩke ngoro. a

•   Ngai aaheire athuri na atumia ũhoti wa gũciarana kũgerera harĩ ngomanio. Ngai onaga muoyo ũrĩ kĩndũ gĩtheru, na ũhoti wa gũciarana nĩ kĩheo kĩa goro. Ngai endaga tũheage kĩheo kĩu gĩtĩo na njĩra ya gwathĩkagĩra mũbango wake wa kĩhiko.—Ahibirania 13:4.

 Nĩguo kĩhiko kĩgaacĩre, ti kuuga atĩ andũ no mũhaka mambe maikaranie nĩguo mone kana nĩ mekũhotana. Handũ ha ũguo, kĩhiko kĩgaacagĩra angĩkorũo andũ erĩ arĩa mahikanĩtie nĩ mendanĩte biũ na nĩ merutanagĩria kũhiũrania na mathĩna marĩ hamwe. b Kĩhiko nĩ gĩtũmaga mũndũ oe maũndũ na ũritũ.—Mathayo 19:6.

 Gũtirĩ kĩhiko gĩtakoragwo na tũmathĩna. O na kũrĩ ũguo, andũ arĩa mahikanĩtie no makorũo na kĩhiko kĩrũmu, mangĩrũmĩrĩra ũtaaro wa Bibilia. Motaaro mamwe nĩ ta:

•   Wĩciragie ũhoro wĩgiĩ mabataro ma ũrĩa mũhikanĩtie nake gũkĩra mabataro maku.—1 Akorintho 7:3-5; Afilipi 2:3, 4.

•   Koragwoi na wendo na gĩtĩo gatagatĩ-inĩ kanyu.—Aefeso 5:25, 33.

•   Wĩciragie mbere ya kwaria.—Thimo 12:18.

•   Koragwo na wetereri na ũkoragwo wĩhaarĩirie kuohanĩra.—Akolosai 3:13, 14.