Famĩlĩ hakuhĩ ciothe nĩ ikoragwo na mawatho, ta hihi megiĩ mathaa marĩa mũndũ agĩrĩirũo gũcoka mũciĩ, ũrĩa marĩhũthagĩra indo ta thimũ, na ũrĩa marĩrũmbũyanagia na andũ arĩa angĩ.

 Wagĩrĩirũo gwĩka atĩa ũngiuna watho wa famĩlĩ? Ndũngĩhota gũcenjia maũndũ, no no ũgirĩrĩrie maũndũ matigathũke makĩria. Gĩcunjĩ gĩkĩ nĩ gĩgũkuonia ũrĩa ũngĩka ũguo.

•  Maũndũ marĩa ũtagĩrĩirũo nĩ gwĩka

•  Maũndũ mega ũngĩka

•  Ũrĩa andũ a riika rĩaku marauga

 Maũndũ marĩa ũtagĩrĩirũo nĩ gwĩka

•   Angĩkorũo aciari aku matinamenya atĩ nĩ uunĩte watho, no wĩkore ũkĩenda kũhitha ũndũ ũrĩa ũrekire.

•   Angĩkorũo nĩ maramenyire atĩ nĩ uunĩte watho, wahota kwambĩrĩria gwĩtetera kana gũcokereria mũndũ ũngĩ mahĩtia.

 Gwĩka maũndũ macio merĩ ti wega. Nĩkĩ? Tondũ kũhitha ũndũ ũrĩa wĩkĩte kana kũruta ciĩgwatio itarĩ na njĩra kuonanagia atĩ ndũgimarĩte. Ũndũ ũcio wonagia aciari aku atĩ no ũrabatara kũgimara makĩria.

 “Kũhenania ti wega. Thutha wa ihinda, ũhoro wa ma no ũkaumbũka, na aciari aku magaakũherithia na njĩra nene gũkĩra ũrĩa mangĩekire korũo warĩtie ma.”—Diana.

 Maũndũ mega ũngĩka

•   Ĩtĩkĩra ũndũ ũrĩa wĩkĩte. Bibilia yugaga ũũ: “Mũndũ ũrĩa ũhumbagĩra mehia make ndagaacagĩra.” (Thimo 28:13) Aciari aku nĩ moĩ atĩ ndũrĩ mũkinyanĩru, o na kũrĩ ũguo, wagĩrĩirũo gũkorũo ũrĩ mwĩhokeku.

   “Aciari aku no makuohere ũngĩaria ma. Ningĩ, no makwĩhoke makĩria.”—Olivia.

•  Hoya woherũo. Bibilia yugaga ũũ: “Mwĩhumbei wĩnyihia.” (1 Petero 5:5) Wĩnyihia nĩ ũbataranagia nĩguo mũndũ ahote kũhoya oherũo ategwĩtetera.

   “Andũ arĩa metetagĩra kaingĩ thutha wa kũhĩtia, mathiaga o matigĩte gũthumbũrũo nĩ thamiri ciao. Thutha-inĩ magatiga kũigua ũũru o na meka mahĩtia.”—Heather.

•   Ĩtĩkĩra moimĩrĩro ma ciĩko ciaku. Bibilia yugaga ũũ: “Thikĩrĩriai ũtaaro.” (Thimo 8:33) Wĩtheme gũteta, na wĩtĩkĩre gwathĩkĩra mĩkaana ĩrĩa yothe aciari aku magũkũigĩra.

   “O ũrĩa ũgũteta nĩ ũndũ wa iherithia rĩrĩa aciari aku magũkũhe, noguo ũgũthũkia maũndũ makĩria. Ĩtĩkĩra ũrĩa ũkwĩrũo, na ndũkaige meciria maku harĩ maũndũ marĩa ũkũũrũo nĩmo.”—Jason.

•   Wĩrutanĩrie nĩguo makwĩhoke rĩngĩ. Bibilia yugaga ũũ: ‘Mwĩyaũre ũmũndũ ũrĩa wa tene ũringaine na mĩthiĩre yanyu ya hau kabere.’ (Aefeso 4:22) Kwoguo, ambĩrĩria gwĩkaga maũndũ marĩa magĩrĩire nĩguo aciari aku makwĩhoke rĩngĩ.

   “Ũngĩtuaga matua ma ũũgĩ na wonie aciari aku atĩ ndũgacokera mahĩtia marĩa wekĩte, no mambĩrĩrie gũkwĩhoka rĩngĩ.”—Karen.

 Geria ũũ: Ĩka makĩria ma maũndũ marĩa aciari aku makwĩrĩte wĩke nĩguo ũmonie atĩ nĩ ũrenda makwĩhoke rĩngĩ. Kwa ngerekano, hĩndĩ ĩyo ĩngĩ wathiĩ handũ, no ũhũũrĩre aciari aku thimũ ũkĩinũka ũmere ũrĩ njĩra ũgĩũka ona angĩkorũo nĩ ũrona ndũgũceererwo. Ũndũ ũcio no ũtũme mone atĩ nĩ ũrenda makwĩhoke rĩngĩ.