“Ngoretwo ngĩeterera kwa ihinda rĩa mĩaka 19!” Hihi nĩ kĩĩ mũrũ wa Ithe witũ eetagĩrĩra? Nĩ Bibilia ya New World Translation of the Christian Greek Scriptures ya rũthiomi rwao rwa Bengali. Andũ aingĩ nĩ maugaga ũndũ ta ũcio rĩrĩa Bibilia ya New World Translation yarutwo na rũthiomi rwao. No hihi nĩ ũrĩ weyũria ũrĩa wĩra wa gũtaũra na gũcaba Bibilia icio ũrutagwo?

 Ũndũ wa mbere nĩ atĩ, timu ya ataũri nĩ ĩthuuragwo nĩ Kamĩtĩ ya Wandĩki ya Kĩama Kĩrĩa Gĩtongoragia. Timu ya ataũri ĩhũthagĩra ihinda rĩigana atĩa gũtaũra Bibilia? Nicholas Ahladis, ũrĩa ũrutithanagia wĩra na Rũhonge Rũrĩa Rũrũgamagĩrĩra Ũtaũri thĩinĩ wa Warwick, New York, aataarĩirie akiuga: “Nĩ kũringanaga na maũndũ maingĩ ta mũigana wa ataũri, ũritũ wa rũthiomi, ũrĩa athomi a ruo mataũkagĩrũo nĩ ũtũũro wa hĩndĩ ĩrĩa Bibilia yandĩkagwo, na kana rũthiomi rũu nĩ rwaragio na njĩra itiganĩte kũndũ ngũrani. Timu ya ataũri ĩhũthagĩra kĩndũ mwaka ũmwe nginya mĩaka ĩtatũ gũtaũra Maandĩko ma Gĩkristiano ma Kĩngiriki na mĩaka ĩna kana makĩria gũtaũra Bibilia ĩrĩ yothe. Gũtaũra Bibilia cia rũthiomi rwa kwaria na ciĩko nĩ kuoyaga ihinda iraihu makĩria.”

 To timu ya ataũri tu ĩbataranagia nĩguo Bibilia ĩtaũrũo. Gĩkundi kĩa athomi a kuuma mĩrerere ĩtiganĩte, na rĩmwe kuuma mabũrũri matiganĩte, nĩ merutagĩra kũrora ũhoro ũrĩa ũtaũrĩtwo matekũrĩhia. Mawoni mao nĩ mateithagia ataũri kũruta Bibilia ĩrĩ na ũhoro mũrũngĩrĩru na ũrataũkĩka. Mũrũ wa Ithe witũ ũmwe ũmenyeragia ataũri a Bibilia aaugire ũũ: “Ataũri nĩ maiguaga marĩ na ũigĩrĩrĩki mũnene harĩ Jehova na harĩ arĩa mathomaga Kiugo gĩake.”

 Bibilia yarĩkia gũtaũrũo, no nginya ĩcabwo na ĩnyitithanio. Nĩguo wĩra ũcio ũrutwo, iganda cia gũcaba ihũthagĩra indo ta ikũmi: maratathi, rangi, indo cia gũthondeka ngothi, ngamu, tũtambaya twa gũtũma ngothi yũme, rangi wa betha, rimboni, tũrũrigi twa gũthiũrũrũkĩria mĩena yothe, iratathi rĩũmũ rĩa gwĩkĩrũo harĩa maratathi manyitithanĩirio, na gĩtambaya gĩa gwĩkĩrũo mwena wa thĩinĩ nĩguo Bibilia yothe ĩnyitane wega. Mwaka wa 2019, dola makĩria ma milioni 20 cia Amerika nĩ ciahũthĩrirũo kũgũra indo icio cia gũcaba na kũnyitithania Bibilia. Arĩa marutaga wĩra iganda-inĩ cia gũcaba maahũthĩrire makĩria ma mathaa 300,000 mwaka ũcio gũcaba na kũnyitithania Bibilia nĩguo itwarĩrũo andũ.

 Nĩ kĩĩ gĩtũmaga tũhũthĩre mahinda na mbeca nyingĩ ũguo kũruta mawĩra macio? Mũrũ wa Ithe witũ Joel Blue wa Rũhonge rwa Thĩ Yothe rwa Gũcaba aaugire ũũ: “Bibilia nĩyo ibuku rĩrĩa rĩa bata mũno tũrutaga. Kwoguo twendaga kũmĩthondeka ũndũ ĩkũgoocithia Ngai ũrĩa tũthathayagia na ĩtĩithie ndũmĩrĩri ĩrĩa tũhunjagia.”

 Makĩria ma kũruta Bibilia ya New World Translation ĩrĩa ĩhũthagĩrũo nĩ andũ aingĩ, nĩ tũrutaga nginya mĩthemba ĩngĩ ya kũhũthĩrũo nĩ andũ arĩa marĩ na mabataro ma mwanya. Kwa ngerekano, Bibilia ya New World Translation ya kũhũthĩrũo nĩ andũ arĩa matonaga nĩ ĩrutĩtwo na thiomi ikũmi. Gũthondeka Bibilia ĩmwe ta ĩyo no kũhũthĩre mathaa manana, na tondũ ĩrutagwo ĩrĩ icunjĩ, ĩbataraga handũ ha kũmĩiga harĩ na ũraihu wa mita ta 2.3 (fiti 7.5). Ningĩ nĩ tũrutaga Bibilia ya mwanya ya kũhũthĩrũo nĩ ohwo a njera iria ciĩtĩkagĩria o mabuku marĩ na ngothi ya maratathi tu.

 Bibilia ya New World Translation nĩ ĩcenjagia mũtũũrĩre wa arĩa mamĩthomaga. Ta wĩcirie ũhoro wa kĩũngano kĩa rũthiomi rwa Kiluba kĩrĩa gĩkoragwo kũndũ gwĩtagwo Tombe bũrũri-inĩ wa Democratic Republic of the Congo. Rũgendo rwa gũthiĩ na bara kuuma taũni ĩrĩa nene ya bũrũri ũcio nginya Tombe nĩ rwa kilomita makĩria ma 1,700. Aira a Jehova a kũu maarĩ na Bibilia ĩmwe tu, na yarĩ ya rũthiomi rwa tene rwa Kiluba. Nĩguo ariũ a Ithe witũ mahaarĩrie icunjĩ iria mekũruta mĩcemanio-inĩ, ũmwe wao aamĩhũthagĩra, agacoka akanengera ũcio ũngĩ. No kuuma mweri wa Agosti 2018, andũ othe thĩinĩ wa kĩũngano kĩu nĩ makoretwo na Bibilia ngʼima ya New World Translation ya rũthiomi rwa mahinda maya rwa Kiluba.

 Mwarĩ wa Ithe witũ ũmwe waragia Kĩnjĩrĩmani aaugire ũũ ũhoro-inĩ wĩgiĩ Bibilia ya New World Translation ĩkĩtwo mogarũrũku ya rũthiomi rwao: “Rĩu ndiugaga no mũhaka thome Bibilia. Handũ ha ũguo, njugaga, ‘Thaa cia gũthoma igũkinya rĩ ndĩmĩthome rĩngĩ?’” Muohwo ũmwe aandĩkire ũũ: “Nĩ ndaheirũo Bibilia ya New World Translation, na nĩ ĩragarũra ũtũũro wakwa. Ndirĩ ndataũkĩrũo nĩ Kiugo kĩa Ngai wega ta ũrĩa ndaũkĩirũo kuuma rĩrĩa ndambĩrĩirie gũthoma Bibilia ĩno. No nyende kũmenya ũhoro makĩria wĩgiĩ Aira a Jehova na ũrĩa ingĩka nĩguo nduĩke ũmwe wao.”

 Arĩa othe mathomaga Bibilia ya New World Translation nĩ macokagia ngatho nĩ ũndũ wa mĩhothi ĩrĩa ĩrutagwo nĩguo Bibilia ĩyo ĩrutwo. Mĩhothi ĩyo ya gũteithĩrĩria wĩra wa thĩ yothe ĩrutagwo kũgerera njĩra iria irĩ thĩinĩ wa donate.jw.org. Nĩ ngatho nĩ ũndũ wa ũtaana waku wa kũruta mĩhothi.