Kũrĩ Oktomba 9, 2024, kĩama kĩrĩa kĩrũmbũyanagia na nyamũ cia gĩthaka thĩinĩ wa thĩ (WWF) nĩ kĩarutire riboti yoonanirie maumĩrĩro moru harĩ nyamũ cia gĩthaka marĩa maumanĩte na ciĩko cia andũ. Riboti ĩyo yoonanirie atĩ “ihinda-inĩ rĩa mĩaka 50 mĩhĩtũku (1970-2020), nyamũ cia gĩthaka nĩ inyihĩte na mũigana wa 73 harĩ igana.” Yaugire ũũ: “No tuuge tũrĩ na ma atĩ maũndũ marĩa megwĩkĩka ihinda-inĩ rĩa mĩaka ĩtano ĩrĩa ĩroka, nĩmo makoonania ũrĩa ũtũũro ũgaakorũo ũtariĩ thĩinĩ wa thĩ ihinda rĩũkĩte.”

 Ti ũndũ wa kũgegania kuona andũ aingĩ makĩmakio nĩ riboti ta icio. Nĩ twendete thĩ itũ thaka na nĩ tũiguaga ũũru rĩrĩa tuona nyamũ ikĩnyarirĩka. Tũiguaga ũguo tondũ Ngai aatũmbire nĩguo tũrũmbũyagie nyamũ.—Kĩambĩrĩria 1:27, 28; Thimo 12:10.

 Kwoguo no wĩyũrie, ‘Hihi nĩ tũkaahota kũgitĩra nyamũ cia gĩthaka thĩinĩ wa thĩ? Bibilia yugaga atĩa?’

 O na gũtuĩka no tũgerie ũrĩa wothe tũngĩhota kũhonokia nyamũ, no Ngai tu ũngĩhota gũcigitĩra na njĩra ĩrĩa njega makĩria. Thĩinĩ wa ibuku rĩa Kũguũrĩrio 11:18, Bibilia ĩranagĩra atĩ Ngai nĩ ‘akaananga arĩa manangaga thĩ.’ Mũhari ũcio ũtũrutaga maũndũ maya merĩ:

1.  1. Ngai ndagetĩkĩria andũ manange thĩ biũ.

2.  2. Ica ikuhĩ Ngai nĩ ekuoya ikinya. Tũmenyaga ũguo atĩa? Tondũ ihinda-inĩ rĩrĩ kũrĩ na ũgwati atĩ andũ no manange nyamũ cia gĩthaka na njĩra nene, gũkĩra hĩndĩ ĩngĩ o yothe.

 Ngai ageeka atĩa kũgitĩra nyamũ cia gĩthaka? Nĩ akaahũthĩra thirikari yake ya kũrĩa igũrũ kana Ũthamaki wake, gwathana thĩinĩ wa thĩ yothe. (Mathayo 6:10) Thirikari ĩyo nĩ ĩgaathomithia andũ athĩki na ĩmamenyerie kũrũmbũiya na kũgitĩra nyamũ.—Isaia 11:9.