Kĩama kĩa Ũgima wa Mwĩrĩ gĩa Thĩ kĩaugire ũũ: “Kũndũ guothe thĩinĩ wa thĩ atumia nĩ mekagwo maũndũ ma ũhinya. Na ũndũ ũcio ũtheremete ta mũrimũ wa kũgwatanio. Kwoguo nĩ ũndũ wa bata gwĩka ũndũ ũngĩniina thĩna ũcio.” Kũringana na kĩama kĩu, hakuhĩ gĩcunjĩ kĩa mĩrongo ĩtatũ harĩ igana “gĩa atumia arĩa othe manakorũo thĩinĩ wa kĩhiko kana ndũgũ ya kĩĩwendo, manekwo maũndũ moru kana makanyitwo kĩa hinya” nĩ athuri acio. Na riboti ĩmwe ya Ũrũmwe wa Mabũrũri (UN) nĩ yoonanirie atĩ kwa ihinda rĩa mwaka ũmwe, o mũthenya thĩinĩ wa thĩ, atumia 137 nĩ mooragagwo nĩ athuri ao kana nĩ mũndũ wa famĩlĩ. a

 Ũthuthuria no wonanie ũritũ wa thĩna wa ngũĩ cia kĩĩmũciĩ, no ndũngĩhota gũtwĩra wega ũhoro wa ruo rwa mwĩrĩ na rwa ngoro rwa o ũmwe wa arĩa mahiũranagia nacio.

 Hihi ũrĩ ũmwe wa arĩa marahiũrania na ngũĩ cia kĩĩmũciĩ? Kana hihi nĩ ũĩ mũndũ ũrahiũrania nacio? Angĩkorũo nĩguo, rora wone maũndũ maya mangĩgũteithia kuuma Bibilia-inĩ.

  Ngũĩ cia kĩĩmũciĩ ti mahĩtia maku

  No wone ũteithio

  Ndũrĩ wiki

  Ngũĩ cia kĩĩmũciĩ nĩ igaathira

  Ũrĩa ũngĩteithia mũndũ ũrahiũrania na ngũĩ cia kĩĩmũciĩ

 Ũrĩa Bibilia yugaga: “O ũmwe witũ nĩ akaarũgama mbere ya Ngai atuĩrũo kũringana na ciĩko ciake.”—Aroma 14:12.

 Ririkana ũũ: Mũndũ ũrĩa ũgwĩkaga maũndũ moru nĩwe ũkoragwo na mahĩtia.

 Angĩkorũo mũthuri waku nĩ agũcokagĩrĩria mahĩtia rĩrĩa aragwĩka maũndũ moru, nĩ ahĩtagia. Atumia magĩrĩirũo kwendwo, no ti gwĩkwo maũndũ moru.—Akolosai 3:19.

 Mũndũ ũrĩa wĩkaga ũrĩa mahikanĩtie nake maũndũ moru, no akorũo na mũrimũ wa kĩĩmeciria, kana hihi akorũo aarereirũo famĩlĩ-inĩ ya andũ meekanaga maũndũ moru, kana akorũo akĩhũthĩra njohi na njĩra njũru. O na kũrĩ ũguo, Ngai nĩ akaamũtuĩra nĩ ũndũ wa maũndũ marĩa agwĩkaga. Na mũndũ ũcio nĩ agĩrĩirũo kuoya makinya marĩa magĩrĩire nĩguo agarũrĩre ciĩko ciake.

 Ũrĩa Bibilia yugaga: “Ataarani aingĩ nĩ matũmaga maũndũ magaacĩre.”—Thimo 15:22.

 Ririkana ũũ: Ũngĩigua ũtarĩ na ũgitĩri kana ũtoĩ ũndũ ũrĩa ũngĩka, andũ angĩ no magũteithie.

 Hihi ũngĩbatara ũteithio kuuma kũrĩ andũ angĩ nĩkĩ? Ũngĩkorũo wĩkĩtwo maũndũ moru, no ũbatare gwĩciria ũhoro wa maũndũ maingĩ. No ũkorũo arĩ ũndũ mũritũ harĩ we gũtua ũrĩa ũgwĩka, tondũ no wage kũmenya ũndũ ũrĩa wa bata makĩria harĩ maya:

•   Ũgitĩri waku

•   Ũndũ ũrĩa mwega makĩria harĩ ciana ciaku

•   Ũhoti waku wa kĩĩmbeca

•   Wendo waku harĩ ũrĩa mũhikanĩtie nake

•   Wendi wa kũhonokia kĩhiko gĩaku ũrĩa mũhikanĩtie nake angĩcenjia

 Nĩ ũndũ wa kawainda kũigua ũtukanĩirũo kana ũritũhĩirũo. Nĩ kũ ũngĩona ũteithio?

 Mũrata wĩhokete kana mũndũ wa famĩlĩ no akũhe ũteithio ũrĩa ũngĩkorũo ũkĩbatara. No ũgunĩke mũno ũngĩaria na mũndũ ũkũrũmbũyagia.

 Kũhũũra thimũ kũrĩ arĩa maheaga andũ arĩa marahiũrania na ngũĩ cia kĩĩmũciĩ ũteithio, no gũkũhe ũteithio wa na ihenya. Arĩa mamũkagĩra thimũ icio no magũteithie kuona ũndũ ũrĩa ũngĩka nĩguo wĩgitĩre. Ũrĩa mũhikanĩtie nake angĩtĩkĩra atĩ arĩ na thĩna na akorũo biũ nĩ arenda gũcenjia, andũ ta acio no mamũteithie kũmenya makinya marĩa arabatara kwamba kuoya.

 Andũ angĩ arĩa maheanaga ũteithio wa hinahi no magũteithie ũngĩkorũo ũgwati-inĩ. Andũ acio no makorũo marĩ mandagĩtarĩ, arĩa marũmbũyagia arwaru, na andũ angĩ arĩa mathomeire maũndũ ta macio.

 Ũrĩa Bibilia yugaga: “Jehova b akoragwo hakuhĩ na arĩa mathuthĩkĩte ngoro; nĩ ahonokagia arĩa mahehenjekete roho.”—Thaburi 34:18.

 Ririkana ũũ: Ngai nĩ eranĩire atĩ nĩ egũgũteithia.

 Jehova nĩ akũrũmbũyagia mũno. (1 Petero 5:7) Nĩ ataũkagĩrũo nĩ ũrĩa ũraigua ngoro-inĩ na methugunda maku ma thĩinĩ biũ. No akũũmĩrĩrie kũgerera Kiugo gĩake, Bibilia. Na nĩ endaga ũmũhoyage. Rĩrĩa ũrahoya, no ũmũũrie akũhe ũũgĩ na hinya ũrĩa ũrabatara nĩguo ũhote kũhiũrania na ũndũ ũrĩa ũragerera.—Isaia 41:10.

 Ũrĩa Bibilia yugaga: “Magaatũũra o mũndũ rungu rwa mũthabibũ wake na rungu rwa mũtĩ wake wa mũkũyũ, na gũtirĩ mũndũ ũgaatũma maigue guoya.”—Mika 4:4, kohoro ka magũrũ-inĩ.

 Ririkana ũũ: Bibilia ĩranĩire atĩ ica ikuhĩ mĩciĩ yothe nĩ ĩgaakoragwo na thayũ.

 Jehova Ngai nowe ũrĩ na kĩhonia gĩa gũtũũra kĩa mathĩna maitũ mothe. Bibilia ĩranĩire ũũ: “Nĩ ekũmagiria maithori mothe mathire maitho-inĩ mao, na gĩkuũ gĩtigaacoka gũkorũo kuo rĩngĩ, o na gũcakaya kana kĩrĩro kana ruo.” (Kũguũrĩrio 21:4) Hĩndĩ ĩyo, o na tũtikaririkana maũndũ moru, tondũ tũgaakorũo tũgĩkenera maũndũ mega. (Isaia 65:17) Ũtũũro ũcio ũrĩ na thayũ nĩguo Bibilia ĩkwĩrĩire.