TONDŨ kiugo “mũmena-Kristo” nĩ kĩhũthĩrĩtwo thĩinĩ wa maũndũ maingĩ ta thenema-inĩ na gĩkahũthĩrũo nĩ athamaki-rĩ, nĩ wega kwĩyũria kĩũria gĩkĩ: Hihi mũmena-Kristo nũũ? Hihi kiugo gĩkĩ nĩ kĩratũhutia mahinda-inĩ maya? Hatarĩ nganja, harĩa mũndũ angĩambĩrĩria gũthoma nĩguo amenye mũmena-Kristo nũũ, nĩ Bibilia-inĩ, ĩrĩa ĩgwetete kiugo kĩu maita matano.

Mũtũmwo Johana nowe tu harĩ aandĩki a Bibilia ũhũthĩrĩte kiugo “mũmena-Kristo.” Aatarĩirie atĩa igũrũ rĩgiĩ mũmena-Kristo? Ta rora ciugo ici irĩ thĩinĩ wa marũa make ma mbere: “Ciana ici, ĩno nĩyo thaa ya kũrigĩrĩria; na ta ũrĩa mwaiguire atĩ mũmena-Kristo nĩegũũka, o na rĩu nĩkũgĩĩte amena-Kristo aingĩ; na tondũ ũcio tũkamenya atĩ ĩno nĩyo thaa ya kũrigĩrĩria. Kuuma nĩmoimire kũrĩ ithuĩ, no matiarĩ aitũ; . . . Ũrĩa wa mathara nũ, tiga ũrĩa ũkaanaga atĩ Jesu tiwe Kristo? Ũcio nĩwe mũmena-Kristo, ũcio ũkaanaga Ithe witũ na agakaana Mũriũ.”—1 Johana 2:18, 19, 22.

Ciugo icio iratũruta atĩa? Johana aagwetire “amena-Kristo aingĩ,” kuonania atĩ mũmena-Kristo ti mũndũ ũmwe, no nĩ kiugo kĩronania gĩkundi kĩa andũ. Andũ kana mathondeka marĩa mangĩĩtwo mũmena-Kristo, matheremagia maheeni, magakaana atĩ Jesu nĩwe Kristo, kana Mesia, na makageria kũhithania ũhoro wa ma wĩgiĩ Ngai na Mũrũwe, Jesu Kristo. Mũmena-Kristo oigaga nĩwe Kristo, kana okĩte handũ ha Kristo, no tondũ “kuuma nĩmoimire kũrĩ ithuĩ,” nĩ meyeheririe kuuma kũrĩ morutani ma Bibilia marĩa ma ma. Makĩria ma ũguo, gĩkundi gĩkĩ kĩarĩ o kuo rĩrĩa Johana aandĩkire marũa make, “thaa ya kũrigĩrĩria,” kwahoteka nĩ mũthia-inĩ wa mahinda ma atũmwo.

Nĩ ũndũ ũrĩkũ ũngĩ Johana aandĩkire wĩgiĩ mũmena-Kristo? Akĩaria ũhoro wĩgiĩ anabii a maheeni, aaheanire mũkaana ũyũ: “Roho o wothe ũrĩa wĩtĩkagia atĩ Jesu Kristo nĩokĩte na mwĩrĩ-rĩ, ũcio nĩuumanĩte na Ngai, naguo roho o wothe ũrĩa ũtetĩkagia Jesu, ũcio nduumanĩte na Ngai; na ũcio nĩguo roho wa mũmena-Kristo, ũrĩa mũiguĩte atĩ nĩũgũũka, o na rĩu nĩ ũrĩkĩtie kũgĩa gũkũ thĩ.” (1 Johana 4:2, 3) Ningĩ, thĩinĩ wa marũa make ma kerĩ, Johana aatĩtĩrithirie ũndũ ũyũ: “Nĩ gũkorũo ahenania aingĩ nĩmoimĩrĩire gũkũ thĩ, arĩa matangĩĩtĩkia atĩ Jesu Kristo nĩokĩte na mwĩrĩ. Mũndũ ta ũcio nĩwe mũhenania ũrĩa, o na mũmena-Kristo.” (2 Johana 7) Hatarĩ nganja, mũtũmwo Johana nĩ aataũkĩirũo atĩ mũmena-Kristo nĩ andũ arĩa othe matheremagia maheeni ma ndini megiĩ Jesu Kristo na morutani make makĩmenyaga.

Hau kabere o na Johana atanaandĩka ũhoro wa andũ a ndini arĩa matheremagia maheeni, Jesu  Kristo nĩ aataarĩte arũmĩrĩri ake ũũ: “Wĩmenyagĩrĩrei anabii a mathara, arĩa mokaga kũrĩ inyuĩ mekĩrĩte njũa cia ng’ondu, no thĩinĩ makorokete ta njũi.” (Mathayo 7:15) O ũndũ ũmwe, mũtũmwo Paulo nĩ aaheanire mũkaana ũyũ kũrĩ Akristiano a Thesalonike: “Menyai mũkahenio nĩ mũndũ o na ũrĩkũ; nĩ gũkorũo mũthenya ũcio [wa Jehova] ndũgakinya, ũhoro ũrĩa wa ngariũkũ ũtaambĩte gũkinya, o nake mũndũ ũrĩa mũregi watho ataanaguũranĩrio, o ũcio mwana wa kũũra.”—2 Athesalonike 2:3.

Kwoguo, karine-inĩ ya mbere, anabii a maheeni na aregenyũki nĩ maambĩrĩirie kwĩyumĩria, marĩ na muoroto wa kũniina kĩũngano gĩa Gĩkristiano hinya. Andũ arĩa othe mahutanĩtie na gũtheremia maheeni megiĩ Jesu Kristo na morutani make, nĩ o Johana eetire “mũmena-Kristo.” Mawoni ma Jehova kũmerekera moonanirio rĩrĩa Paulo aataarĩirie atĩ nĩ o “mwana wa kũũra.”

Ĩ naguo ũmũthĩ kũhaana atĩa? Andũ na mathondeka marĩa mangĩĩtwo mũmena-Kristo no makararagia Kristo na morutani make. Matheremagia maheeni marĩ na muoroto wa kũhitha ma ĩgiĩ Ithe, Jehova Ngai, na Mũrũwe, Jesu Kristo. Nĩ twagĩrĩirũo kwĩmenyerera maheeni macio ma ndini. Reke twarĩrĩrie ngerekano igĩrĩ.

Thĩinĩ wa karine nyingĩ, ndini nĩ itheremetie ũrutani wa Ũtatũ, ikiuga atĩ Ithe na Mũriũ nĩ ũndũ ũmwe. Kwoguo mũmena-Kristo ahithanagia ma ĩgiĩ Jehova Ngai na Jesu Kristo. Kũhithania gũkũ kũgiragĩrĩria andũ arĩa me na ngoro njega kwĩgerekania na Jesu Kristo, na gũkuhĩrĩria Ngai ta ũrĩa Bibilia ĩmekagĩra ngoro meke.—1 Akorintho 11:1; Jakubu 4:8.

Kanitha icio itukanagia andũ makĩria na njĩra ya kũmekĩra ngoro mahũthĩre Bibilia iria cieheretie rĩĩtwa rĩa Ngai, Jehova, kuuma maandĩko-inĩ. Mekaga ũguo o na gũtuĩka rĩĩtwa Jehova rĩonekaga maita ta 7,000 thĩinĩ wa maandĩko ma tene ma Bibilia. Moimĩrĩro magakorũo marĩ marĩkũ? Ngai ũrĩa wa ma akahithanio kũgerera morutani marĩ kĩriga.

No rĩrĩ, kũmenya rĩĩtwa rĩa Ngai, Jehova, nĩ gũteithĩtie andũ aingĩ arĩa marĩ na ngoro njega kũmũkuhĩrĩria. Ũguo nĩguo kwahaanĩkire harĩ Richard, ũrĩa woigire ũũ akĩririkana ndeereti maarĩ nayo na Aira erĩ a Jehova: “Maanyonirie kuuma Bibilia-inĩ atĩ rĩĩtwa rĩa Ngai ũrĩa wa ma nĩ Jehova. Nĩ ndaakenire mũno nĩ kũmenya atĩ Ngai nĩ arĩ rĩĩtwa, ũndũ itaiguĩte hau kabere.” Kumanagia na hau, akĩgarũrĩra mũtũũrĩre wake ũringane na ithimi cia Bibilia nĩguo akenie Jehova. Oigire ũũ: “Kũmenya rĩĩtwa rĩa Ngai nĩ kũndeithĩtie gũkũria ũrata wa hakuhĩ nake.”

Kwa ihinda rĩa karine nyingĩ, mũmena-Kristo nĩ aigĩte andũ milioni nyingĩ thĩinĩ wa nduma ya kĩĩroho. No kũgerera kwĩruta Kiugo kĩa Ngai, Bibilia, nĩ tũhotaga kũmenya mũmena-Kristo nũũ na tũgakũũrũo kuumana na morutani make ma maheeni.—Johana 17:17.