Hatarĩ nganja andũ no megũthiĩ na mbere maũndũ-inĩ megiĩ sayansi. No hihi nĩ kũrĩ hĩndĩ marĩhota kũhũthĩra ũmenyo wao gũteithia andũ makorũo na ngumo ya kũrũmbũyanagia? Aca. Thikũ ici andũ aingĩ nĩ meyendete na magakoroka. O na kũrĩ ũguo, Ngai arĩ na muoroto wa maũndũ mega wĩgiĩ andũ.​—Thoma 2 Petero 3:13.

Kiugo kĩa Ngai nĩ gĩtaarĩirie mahinda mokĩte marĩa andũ othe thĩinĩ wa thĩ magaakorũo mendaine. Andũ magaikara mahoreire gũtarĩ ũgwati, na gũtikagĩa mũndũ wa kũmamakia.​—Thoma Mika 4:​3, 4.

Ngai ombire mũndũ ũtaarĩ na mwerekera wa mwĩyendo. No rĩrĩa mũndũ wa mbere aathuurire kwaga gwathĩkĩra Ngai, nĩ aatuĩkire mũndũ ũtarĩ mũkinyanĩru. Twagaire mwerekera wa mwĩyendo kuuma kũrĩ we. O na kũrĩ ũguo, Ngai nĩ akaahũthĩra Jesu gũteithia andũ matuĩke akinyanĩru rĩngĩ.​—Thoma Aroma 7: 21, 24, 25.

Kũringana na wendi wa Ngai, Jesu nĩ aakuire arĩ ta igongona nĩguo eherie moimĩrĩro ma kwaga gwathĩka kwa mũndũ ũrĩa wa mbere. (Aroma 5:19) Kwoguo agĩtũma kũhoteke kũgĩa na mahinda mega mokĩte, rĩrĩa andũ matagaakorũo na mwerekera wa gwĩka maũndũ moru nĩ ũndũ wa mwĩyendo.​—Thoma Thaburi 37:​9-11.