“Na rĩrĩ, hĩndĩ ya athamaki acio-rĩ, nĩguo Ngai-wa-Igũrũ akahanda ũthamaki ũrĩa ũtagacoka gũthario o rĩ, o rĩ, o na kana wathani waguo ũneanwo moko-inĩ ma andũ angĩ, no nĩ kũmemenda ũkamemenda mothamaki macio mangĩ, ũmanine biũ, naguo ũtũũre wĩhandĩte tene na tene.”—Danieli 2:44.

Ũthamaki wa Ngai nĩ thirikari ĩhandĩtwo kũrĩa igũrũ. Mũthamaki wayo ũrĩa wamũrĩtwo Jesu Kristo, nĩ agaathana thĩ yothe na nĩ agaatigĩrĩra atĩ wendi wa Ngai nĩ ũrekwo gũkũ thĩ ta ũrĩa wĩkagwo kũrĩa igũrũ. (Mathayo 6:9, 10) Gũtirĩ thirikari ĩngĩ ya andũ ĩgaathana ithenya rĩa thirikari ĩyo tondũ ‘ũthamaki ũcio wa Mwathani na Mũhonokia witũ Jesu Kristo, ndũgathira.’ Nĩ ũkarehe thayũ wa gũtũũra.—2 Petero 1:11.

“Naguo ũguo ti ũrirũ, nĩ gũkorũo Shaitani o nake nĩehaananagia na mũraika wa ũtheri. Hakĩrĩ ũguo-rĩ, ti ũndũ mũnene ndungata ciake nacio igĩkorũo ciĩhaananĩtie na ndungata cia ũhoro wa ũthingu. Na marigĩrĩrio ma andũ acio-rĩ, makaringanio na maũndũ marĩa mekĩte.”—2 Akorintho 11:14, 15.

Ndini cia maheeni nĩ ikaaguũrio cioneke atĩ ikoragwo irĩ wĩra wa Mũcukani icoke cieherio biũ thĩinĩ wa thĩ. Mũthutũkanio na ũitangi wa thakame ũrĩa uumanaga na ndini cia maheeni nĩ ũgaathira kaimana. Ũndũ ũcio nĩ ũgatũma endi ‘Ngai ũrĩa ũrĩ muoyo, o we wa ma,’ mamũthathaiye na “wĩtĩkio o ũmwe,” ningĩ ‘mamũhoyage na roho na ma.’ Na githĩ maũndũ macio matikarehe thayũ na ũrũmwe!—1 Athesalonike 1:9; Aefeso 4:5; Johana 4:23.

“Nake Ngai we mwene agĩage o hamwe nao, . . . nake nĩekũmagiria maithori mothe mathire maitho mao; nakĩo gĩkuũ gĩtirĩ hingo gĩgacoka kũgĩa, o na gũtirĩ hingo gũgacoka kũgĩa na kĩeha, kana kĩrĩro, kana ruo; maũndũ marĩa ma mbere nĩ mathengu magathira.”—Kũguũrĩrio 21:3, 4.

 Jehova Ngai nĩ agaatũma ũndũ ũcio ũhingio nĩ Mũrũwe Jesu ũrĩa waarutire muoyo wake nĩ ũndũ wa andũ. (Johana 3:16) Rungu rwa ũtongoria wa Jesu, andũ nĩ magaatuĩka akinyanĩru. Gũtigakorũo na mĩnyamaro rĩngĩ tondũ ‘Ngai we mwene nĩ aakagĩaga hamwe nao’ na ‘amagirie maithori mathire maitho-inĩ mao.’ Kwaga gũkinyanĩra kwa andũ na mĩnyamaro itikaririkanwo rĩngĩ nĩ gũkorũo, “arĩa athingu nĩo makagaya thĩ, na gũtũũra mamĩtũũre o nginya tene.”—Thaburi 37:29.

“Nake [Jesu Kristo] akĩnyita ndamathia ĩrĩa, o yo nyamũ-ya-thĩ ĩrĩa ya tene, na noyo Mũcukani o na Shaitani, akĩmĩoha mĩaka ngiri ĩmwe, akĩmĩikia irima rĩu rĩtarĩ gĩturi, akĩrĩhinga, agĩcoka akĩrĩthingĩrĩria na akĩrĩcinĩrĩra rũũri igũrũ rĩayo, ndĩgacoke kũhĩtithia ndũrĩrĩ.”—Kũguũrĩrio 20:2, 3.

Ũgucania wothe wa Shaitani nĩ ũgaathira rĩrĩa Shaitani na ndaimono makanyitwo maikio irima “rĩtarĩ gĩturi,” kũndũ matakaahota kũhĩtithia ndũrĩrĩ rĩngĩ. Hĩndĩ ĩyo matikaahota rĩngĩ gũtongoria andũ ũũru. Gĩgakorũo kĩrĩ gĩkeno kĩnene mũno andũ gũtũũra thĩinĩ wa thĩ ĩtarĩ na ũgucania mũũru wa Shaitani na ndaimono!

Thutha wa kĩrĩa Jesu eetire “thĩna mũnene,” nĩrĩo “matukũ marĩa ma kũrigĩrĩria” magaakinya gĩturi. Jesu oigire ũũ: “Nĩ ũndũ hĩndĩ ĩo nĩgũkagĩa thĩna mũnene ũtarĩ wonwo taguo gwata kĩambĩrĩria gĩa thĩ nginya rĩu, o na ũtakonwo ũngĩ taguo o na rĩ.”—Mathayo 24:21.

Thĩna ũcio ũgakorũo ũrĩ mũnene tondũ ndũrĩ wonekana rĩngĩ. Thĩna ũcio nĩguo ũgaakinyĩria “mbaara ya mũthenya ũrĩa mũnene wa Ngai, Mwene-Hinya-Wothe” ĩrĩa ĩtagwo, “Hari-Magedoni.”—Kũguũrĩrio 16:14, 16.

Andũ kũndũ guothe arĩa mendete ũthingu nĩ merĩgagĩrĩra gũkoona mũthia wa thĩ ĩno njũru. Ta wĩcirie irathimo ici cigana ũna iria merĩgagĩrĩra rungu rwa Ũthamaki wa Ngai.

“Kĩrĩndĩ kĩingĩ mũno” nĩ gĩgaatũũra thĩinĩ wa thĩ njerũ ĩna thayũ: Kiugo kĩa Ngai kiugaga atĩ, “kĩrĩndĩ kĩingĩ mũno” gĩtangĩtarĩka kĩa andũ “arĩa moimĩte mĩnyamaro-inĩ ĩrĩa mĩnene,” nĩ gĩgaatũũra thĩinĩ wa thĩ ĩrĩ na ũthingu. (Kũguũrĩrio 7:9, 10, 14; 2 Petero 3:13) Gĩgakorũo kĩhonoketio nĩ Jesu Kristo, o we “Gatũrũme ka Ngai, karĩa ga gũtwara mehia ma kĩrĩndĩ!”—Johana 1:29.

Andũ nĩ makaagunĩka na gĩthomo kĩrĩa Ngai akaaheana: Thĩinĩ wa thĩ njerũ, “thĩ yothe nĩĩkaiyũrũo nĩ ũhoro wa kũmenya Jehova.” (Isaia 11:9) Ũrutani-inĩ ũcio ũkaheanwo nĩ Ngai, andũ nĩ makaarutwo gũikarania na thayũ na kũramata thĩ. Ngai eranĩire ũũ: “Niĩ nĩ niĩ Jehova Ngai waku ũrĩa ũkũrutaga maũndũ ma gũkũguna, o we ũrĩa ũgũtongoragia na njĩra ĩrĩa wagĩrĩirũo nĩ kũgera.”—Isaia 48:17.

Arĩa akuũ nĩ makaariũkio: Jesu arĩ gũkũ thĩ nĩ aariũkirie mũratawe Lazaro. (Johana 11:1, 5, 38-44) Kwoguo akĩonania ũrĩa angĩgeeka na gĩkĩro kĩnene makĩria rungu rwa Ũthamaki wa Ngai.—Johana 5:28, 29.

Thayũ na ũthingu nĩ igaatũũra tene na tene: Rungu rwa ũtongoria wa Kristo, wagi wa kĩhooto ndũgakorũo kuo rĩngĩ. Tũmenyaga ũguo atĩa? Nĩ gũkorũo Jesu, nĩ ahotaga gũthoma ngoro cia andũ, na nĩ akaahũthĩra ũhoti ũcio wake gũtuĩra mũndũ mũthingu na mwaganu. Andũ arĩa maregaga kũgarũrĩra mĩthiĩre yao mĩũru matigetĩkĩrio gũtũũra thĩinĩ wa thĩ njerũ.—Thaburi 37:9, 10; Isaia 11:3, 4; 65:20; Mathayo 9:4.

Twarĩrĩria o morathi mamwe marĩa marĩ thĩinĩ wa Bibilia megiĩ maũndũ mega marĩa marĩ mbere. Rĩrĩa Ũthamaki wa Ngai ũgakorũo ũgĩathana gũkũ thĩ, andũ nĩ ‘makaingĩhĩrũo nĩ thayũ’ tene na tene. (Thaburi 37:11, 29) Maũndũ mothe marĩa marehagĩra andũ ruo na mĩnyamaro nĩ magaathira kaimana. Ngai nĩ atũheete ũũma wa maũndũ macio, oigĩte ũũ: “Nĩ atĩrĩ, maũndũ mothe nĩ kũmerũhia ndĩramerũhia. . . . Ciugo icio nĩ cia kwĩhokwo na nĩ cia ma.”—Kũguũrĩrio 21:5.