BIBILIA NĨ ĨGARŨRAGA MĨTŨŨRĨRE YA ANDŨ

“Rĩu nĩ nyonete atĩ ndingĩhota gũcenjia thĩ ĩno”

Ta ũrĩa rũheanĩtwo nĩ Jukka Sylgren

RĨRĨA AACIARIRŨO: 1966

BŨRŨRI: FINLAND

HISTORĨ: MŨRŨĨRĨRI WA IHOOTO

MŨTŨŨRĨRE WAKWA WA HAU KABERE: Ndambĩrĩirie kwenda ũũmbi kuuma ndĩ mũnini. Kaingĩ tũrĩ famĩlĩ nĩ twakenagĩra kwĩrorera maria na mĩtitũ ya magegania, ĩrĩa ĩrigicĩirie taũni ya Jyväskylä, Finland kũrĩa twaikaraga. Ningĩ nĩ nyendete nyamũ. Ndĩ mũnini nĩ ndakenagĩra mũno kũhambata nyamũ o yothe ingĩacemanirie nayo. Ndagimara nĩ ndaiguaga ũũru mũno ndona andũ makĩherithia nyamũ. Thutha-inĩ, ngĩingĩra kĩama-inĩ kĩmwe gĩa kũrũĩrĩra ihooto cia nyamũ, kũrĩa ndaakorire andũ marĩ na mawoni ta makwa.

Nĩ twekaga kambĩini cia kũrũĩrĩra ihooto cia nyamũ. Twakinyagĩria andũ ũhoro, tũkarũrũngana kũregana na wendia wa maguoya ma nyamũ o hamwe na kũhũthĩra nyamũ gwĩka ũthuthuria wa ndawa. Ningĩ tũgĩthondeka kĩama kĩerũ gĩa kũgitagĩra nyamũ. Kaingĩ nĩ twahĩtanagia mũno na anene a thirikari nĩ ũndũ wa kuoya makinya mangĩ manene kũrũĩrĩra ihooto cia nyamũ. Ngĩnyitwo na ngĩtwarũo maita maigana ũna igoti-inĩ.

Makĩria ma kũrũĩrĩra nyamũ, nĩ ndaiguaga ngĩtangĩka nĩ ũndũ wa mathĩna mangĩ thĩinĩ wa thĩ. Thutha-inĩ, ngĩambĩrĩria kũrutithania wĩra na ciama ingĩ cigana ũna, ta Amnesty International na Greenpeace. Ngĩcinyita mbaru na hinya wakwa wothe. Ndatetagĩra andũ arĩa athĩni, arĩa maarĩ na ng’aragu, na arĩa mataarĩ ũhoti.

Ĩndĩ o kahora nĩ ndamenyire atĩ ndingiahotire kũrehe mogarũrũku thĩinĩ wa thĩ. O na gũtuĩka ciama icio nĩ ciahotire kũrũnga tũmaũndũ tũmwe tũnini, mathĩna marĩa manene no kwĩha mehaga. Ndonaga thĩ ta ĩtooretio nĩ ũũru na andũ makaaga gũtindanĩra. Ngĩona hatirĩ ũndũ ingĩahotire gwĩka.

ŨRĨA BIBILIA YAGARŨRIRE MŨTŨŨRĨRE WAKWA: Rĩrĩa ndonire atĩ ndirĩ na ũhoti, ngĩambĩrĩria gwĩciria ũhoro wĩgiĩ Ngai na Bibilia. Mbere ĩyo nĩ nderutaga Bibilia na Aira a Jehova.  O na gũtuĩka nĩ ndonaga atĩ Aira a Jehova nĩ maanyendete na nĩ maanũmbũyagia, ndiehaarĩirie gũcenjia mũtũũrĩre wakwa. No rĩu nĩ ndehaarĩirie gũcenjia.

Nĩ ndoire Bibilia na ngĩambĩrĩria gũthoma, na ironda ciakwa cia ngoro ikĩambĩrĩria kũhona. Ngĩona mĩhari mĩingĩ ya Bibilia ĩrĩa ĩtũrutaga tũcaayagĩre nyamũ. Kwa ngerekano, Thimo 12:10 yugaga atĩ “andũ arĩa ega nĩ marũmbũyagia nyamũ ciao.” (Good News Translation) Ningĩ nĩ ndataũkĩirũo atĩ Ngai tiwe ũrehaga mathĩna thĩinĩ wa thĩ. Ithenya rĩa ũguo, mathĩna ma andũ mongererekete tondũ andũ nĩ maregaga kũrũmĩrĩra ũtongoria wake. Nĩ ndaakenire mũno rĩrĩa nderutire ũhoro wĩgiĩ wendo na ũkirĩrĩria wa Jehova.—Thaburi 103:8-14.

Ihinda-inĩ o rĩu, nĩ ndaihũririe na ngĩtũma karatathi ga kũhoya ibuku rĩa Bibilia Ĩrutanaga Atĩa Kũna? Thutha wa kahinda kanini, Mũira wa Jehova ũmwe na mũtumia wake magĩũka gwakwa makĩnjũria kana no nyende kwĩruta Bibilia, na niĩ ngĩtĩkĩra. Ningĩ ngĩambĩrĩria gũthiaga mĩcemanio ya Gĩkristiano thĩinĩ wa Nyũmba ya Ũthamaki. Na njĩra ĩyo, ma ya Bibilia ĩkĩambĩrĩria kũgĩa na mĩri ngoro-inĩ yakwa.

Bibilia nĩ yandeithirie ngĩhota gwĩka mogarũrũku maingĩ. Ngĩtiga kũnyua thigara na ũrĩu. Ngĩagĩria mwĩhumbĩre na mwarĩrie wakwa. Na ngĩcenjia mawoni makwa kwerekera thirikari. (Aroma 13:1) Ningĩ ngĩtiga mĩthiĩre mĩũru, ũndũ ũrĩa ndaremetwo biũ gũtigana naguo.

Ũndũ ũrĩa warĩ mũritũ mũno harĩ niĩ nĩ kũgĩa na mawoni marĩa magĩrĩire kwerekera ciama cia kũrũĩrĩra ihooto cia ũmũndũ. Gwĩka ũguo nĩ kwoire kahinda. Mbere ndonaga ta ngokorũo ngĩkunyanĩra ciama icio ndeyeheria. Ĩndĩ, nĩ ndamenyire atĩ Ũthamaki wa Ngai noguo ũkaarehe kĩhonia kĩa ma thĩinĩ wa thĩ. Kwoguo ngĩtua itua rĩa kũnyita mbaru Ũthamaki ũcio na ngoro yakwa yothe na gũteithia andũ arĩa angĩ merute ũhoro ũwĩgiĩ.—Mathayo 6:33.

ŨRĨA NG’UNĨKĨTE: Ndĩ mũrũĩrĩri wa ihooto, ndonaga andũ marĩ ikundi igĩrĩ, andũ ega na oru na ndaikaraga ndĩhaarĩirie kuoera ikinya andũ arĩa ndonaga marĩ oru. No nĩ ũndũ wa gũteithio nĩ Bibilia, nĩ ndatigire kũmena andũ arĩa angĩ. Ithenya rĩa ũguo, rĩu nĩ ngeragia mũno kũgĩa na wendo wa Gĩkristiano kwerekera andũ othe. (Mathayo 5:44) Ũndũ ũmwe njĩkaga nĩ kũhunjĩria andũ ũhoro mwega wa Ũthamaki wa Ngai. Nĩ ngenaga mũno kuona ũrĩa wĩra ũcio wa bata ũtũmaga andũ magĩe na thayũ na gĩkeno na ũkamahe kĩĩrĩgĩrĩro kĩa ma.

Nĩ ngĩte na thayũ wa meciria nĩ ũndũ wa kwĩhoka Jehova. Nĩ ngoragwo na ma atĩ, Jehova arĩ we Mũũmbi, ndegwĩtĩkĩria nyamũ na andũ matũũre maherithĩtio kana thĩ ĩno itũ thaka yanangwo biũ. Mũgarũ na ũguo, kũgerera Ũthamaki wake, ica ikuhĩ nĩ egũthondeka maũndũ marĩa mothe mathũkĩtio. (Isaia 11:1-9) Nĩ ngĩte na gĩkeno kĩnene mũno kũmenaya ma icio cia Bibilia na gũteithia andũ arĩa angĩ maciĩhoke. Rĩu nĩ nyonete atĩ ndingĩhota gũcenjia thĩ ĩno.

[Mbica karatathi ka 12]

[Mbica karatathi ka 12]

[Mbica karatathi ka 12]

[Mbica karatathi ka 12]

Animalia