O ta ũrĩa ũĩ, maheeni nĩ kwaria ũndũ ũkĩmenyaga ti wa ma. Hihi wee ũrĩ waria maheeni?— * O na andũ amwe agima na mendete Ngai manaria maheeni. No kũhoteke nĩ ũĩ mũndũ ũmwe thĩinĩ wa Bibilia waaririe maheeni. Nĩ ũmwe wa atũmwo arĩa 12 a Jesu wetagwo Petero. Reke tũthikĩrĩrie rũgano rwĩgiĩ kĩrĩa gĩatũmire arie maheeni.

Nĩ thaa thita cia ũtukũ ihĩtũkĩtie, Jesu akanyitwo, agatwarũo mũciĩ wa mũthĩnjĩri Ngai ũrĩa mũnene. Petero akaingĩra gĩthaku-inĩ kĩa mũciĩ wa mũthĩnjĩri Ngai ũcio na hatigĩe mũndũ ũkũmũmenya. Nĩ ũndũ wa ũtheri wa mwaki, mũirĩtu ũrĩa waikaraga mũrango-inĩ kwa mũthĩnjĩri Ngai ũcio akamenya Petero. Akamwĩra ũũ: “Wee nawe uuma hamwe na Jesu.” Nĩ ũndũ wa gwĩtigĩra Petero agakana.

Bibilia yugaga atĩ thutha ũcio “mũirĩtu ũngĩ akĩmuona.” Akiuga ũũ: “O na mũndũ ũyũ nake oima hamwe na . . . Jesu.” O rĩngĩ Petero agakana ũndũ ũcio. Thutha wa kahinda kanini andũ angĩ magathiĩ harĩ Petero makamwĩra: “Ti-itherũ o nawe wĩ wao.”

Petero arĩ na guoya. Nĩ ũndũ ũcio riita rĩa gatatũ akaria maheeni akoiga: “Mũndũ ũcio ndimũũĩ.” Ngũkũ ĩgakũga. Jesu akarora Petero, nake Petero akaririkana atĩ mathaa manini mahĩtũku, Jesu nĩ ekũmwĩrĩte: “Ngũkũ ĩtanagamba, ũrĩkorũo ũngaanĩte gatatũ.” Petero agatumũka na kĩrĩro arĩ na ruo rũingĩ mũno!

Hihi ũndũ ta ũcio no ũgũkore?—Wahota gũkorũo cukuru, ũigue arutwo makĩaria ũhoro wa Aira a Jehova. Mũrutwo ũmwe oige ũũ: “Acio matiinaga rwĩmbo rwa bendera.” Ũngĩ nake ongerere ũũ: “Matirũagĩrĩra bũrũri wao.” Nake ũngĩ oige ũũ: “Acio ti Akristiano, tondũ o na matikũngũyagĩra Krismasi.” Ũmwe acoke akũũrie, “Na githĩ wee ndũrĩ ũmwe wa Aira a Jehova?” Ũngiuga atĩa?—

 Ũkũbatara gũkorũo wĩhaarĩirie ũrĩa ũngĩcokia ũrĩa kwagĩrĩire mbere ya ũndũ ta ũcio ũgũkorete. Petero ndeeharĩirie. Rĩrĩa aahatĩkirũo mũno, akĩaria maheeni. O na kũrĩ ũguo nĩ eeririre mũno nĩ ũndũ wa gwĩka ũguo, na Ngai akĩmuohera.

Anania, Mũrutwo ũngĩ wa tene wa Jesu, o nake nĩ aaririe maheeni. No Ngai ndaigana kũmuohera o na kana kuohera mũtumia wake Safira. Maarĩkanĩrĩte na mũthuriwe marie maheeni. Reke tuone kĩrĩa kĩagiririe Ngai ohere Anania na Safira.

Nĩ matukũ ikũmi thutha wa Jesu gũtiga atũmwo ake na gũcoka igũrũ kũrĩ Ngai. Thĩinĩ wa Jerusalemu andũ 3,000 makabatithio. Amwe ao moimĩte mabũrũri ma kũraya moke makũngũĩre Bendegothito, na thutha wa gũtuĩka arutwo a Jesu, marenda gũikaranga Jerusalemu nĩguo merute makĩria ũhoro wĩgiĩ wĩtĩkio ũcio wao mwerũ. Arutwo amwe a Jesu marahũthĩra mbeca ciao gũteithia andũ acio.

Anania na Safira makendia mũgũnda wao nĩguo mone mbeca cia gũteithia Akristiano acio marabatithirio. Anania akarehe mbeca icio kũrĩ atũmwo, akamera nĩ iria ciothe arendirie mũgũnda. No ũcio ti ũhoro wa ma! Akeigĩra mbeca imwe! Ngai akareka Petero amenye ũndũ ũcio, nĩ ũndũ ũcio Petero akera Anania ũũ: “Ti mũndũ wakĩhenia, no Ngai.” Aigua ciugo icio, Anania, akagũa thĩ agakua! Thutha wa kĩndũ mathaa matatũ, mũtumia wake nake akaingĩra. Tondũ ndaramenya ũndũ ũrĩa ũkorete mũthuriwe, nake akaria maheeni na akagũa agakua.

Na githĩ rĩu ti ithoma inene mũno: Kwaria ũhoro wa ma nĩ kwa bata! Ithuothe nĩ tũkũbatara kwĩruta kuumana narĩo! O na kũrĩ ũguo, ithuothe nĩ tũhĩtagia, na makĩria mũndũ arĩ mwana. Hihi nĩ ũrakena nĩ kũmenya atĩ Jehova nĩ akwendete na nĩ arĩkuohagĩra o ta ũrĩa oheire Petero?— O na kũrĩ ũguo, ririkana atĩ nĩ twagĩrĩirũo nĩ kwaragia ma. Na tũngĩka ihĩtia rĩu iritũ rĩa kũhenania, nĩ tũkũbatara gũthaitha Ngai atuohere. No mũhaka akorũo ũguo nĩguo Petero eekire, na nĩ oheirũo. Tũngĩĩrutanĩria biũ kwaga kũhenania rĩngĩ, o na ithuĩ Ngai nĩ arĩtuohagĩra! ▪