Gwĩtĩkia Hatarĩ Ũhinga na Gũtuĩka Raia Ehokeku Kũhingia Maũndũ Macio Merĩ

NĨ MAŨNDŨ marĩkũ merĩ ũtungata wa Jesu wahingirie? Ũndũ wa mbere, Jesu eerutanagĩria kũgarũra ngoro cia andũ, no ti mĩtabarĩre ya gĩũteti. Kwa ngerekano-rĩ, ta rora ũndũ ũrĩa Jesu aatĩtĩrithirie Mĩario-inĩ yake ya Kĩrĩma-inĩ. Atanaarĩrĩria bata wa mũndũ kũhaana ta cumbĩ o na ta ũtheri, eerire athikĩrĩria ake atĩ gĩkeno kĩa ma nĩ kĩa “arĩa matarĩ na mwĩgatho.” Ningĩ akiuga ũũ: “Gũkena-rĩ, nĩ arĩa ahoreri, . . . arĩa mateciragia ũũru ngoro, . . . ateithũrani.” (Mathayo 5:1-11) Jesu aateithirie arũmĩrĩri ake mone bata wa kũgarũra mwĩcirĩrie wao na ngoro ciao iringane na ithimi cia Ngai cia wega na ũũru, na mone bata wa gũtungatĩra Ngai na ngoro yothe.

Wa kerĩ, rĩrĩa Jesu onire mĩnyamaro ya andũ, tha ciake harĩ andũ nĩ ciamũtindĩkire kũmahũthahũthĩria mĩtangĩko yao. O na kũrĩ ũguo, ndaigana kũgeria kũniina mĩnyamaro yothe. (Mathayo 20:30-34) Nĩ aahonirie andũ arũaru, no mĩrimũ ndĩathirire. (Luka 6:17-19) Nĩ aahooreririe arĩa maarĩ ahinyĩrĩrie, ĩndĩ waagi wa kĩhooto no waathire na mbere kũnyamaria andũ. Akĩhe arĩa ahũtu irio, no ng’aragu no yathire na mbere kũgũmĩra andũ.—Mariko 6:41-44.

Gũteithia Ngoro cia Andũ Igarũrũke na Kũmahũthahũthĩria Mĩtangĩko

Nĩ kĩĩ gĩatũmaga Jesu erutanĩrie kũgarũra ngoro cia andũ na kũhũthahũthia mĩnyamaro handũ ha kũgarũra mĩtabarĩre ya gĩũteti kana kũniina mĩtangĩko? Jesu nĩ aamenyaga atĩ Ngai nĩ angĩkaahũthĩra Ũthamaki Wake thutha-inĩ aniine thirikari cia andũ ciothe, na eherie maũndũ marĩa mothe marehaga mĩnyamaro. (Luka 4:43; 8:1) Nĩ ũndũ ũcio, hĩndĩ ĩmwe rĩrĩa arutwo maamũringĩrĩirie athiĩ na mbere kũhonia arĩa arũaru-rĩ, Jesu aamacokeirie ũũ: “Nĩtuume gũkũ tũthiĩ mĩciĩ ĩrĩa ĩngĩ, ngaheane ũhoro o nakuo; amu nĩkĩo ndokire.” (Mariko 1:32-38) Jesu nĩ aahũthahũthĩirie andũ aingĩ mĩnyamaro ya kĩĩmwĩrĩ, no ũndũ ũrĩa eekagĩrĩra mũno nĩ kũhunjia kiugo kĩa Ngai.

Rĩrĩa me wĩra-inĩ wa kũhunjia, Aira a Jehova nĩ merutanagĩria gwĩka ta Jesu. Nĩ mahũthahũthagĩria andũ mĩtangĩko na njĩra ya kũmateithia marĩ mũndũ ũmwe ũmwe. Ĩndĩ, Aira a Jehova matigeragia kũniina waagi wa kĩhooto thĩinĩ wa thĩ. Metĩkĩtie atĩ Ũthamaki wa Ngai nĩguo ũkaaniina maũndũ marĩa mothe marehaga mĩtangĩko. (Mathayo 6:10) O ta Jesu, merutanagĩria kũgarũra ngoro cia andũ no ti mĩtabarĩre ya gĩũteti. Ĩyo nĩ njĩra njega tondũ thĩna ũrĩa mũnene wa andũ, ti wa gĩũteti, ĩndĩ nĩ wa mĩtugo.

Raia Ehokeku

O magĩkaga ũguo, Aira a Jehova makoragwo metĩkĩtie atĩ marĩ Akristiano, magĩrĩirũo gũkorũo me raia ega. Kwoguo nĩ matĩĩte ũnene wa gĩĩthirikari. Kũgerera mabuku mao na wĩra wao wa kũhunjia, nĩ mekagĩra andũ arĩa angĩ ngoro maathĩkagĩre watho. No rĩrĩa thirikari yoiga meke ũndũ ũrakararania na maathani ma Ngai, Aira a Jehova nĩ maregaga. ‘Maiguaga Ngai handũ ha kũigua andũ.’—Atũmwo 5:29; Aroma 13:1-7.

 Aira a Jehova maceeragĩra arĩa othe marĩ itũũra-inĩ rĩao nĩguo mamarute Bibilia hatarĩ marĩhi. Nĩ ũndũ wa gĩthomo kĩu, ngoro cia andũ milioni nyingĩ nĩ igarũrũkĩte. O mwaka andũ ngiri nyingĩ nĩ mateithagio gũtiga mĩtugo mĩũru ta kũnyua thigara, kũrĩo, kũhũthĩra ndawa cia ũrĩĩu, gũũtha karata, na ngomanio itagĩrĩire. Matuĩkaga raia mena mĩtugo mĩega nĩ ũndũ wa kwĩruta kũrũmĩrĩra ũrutani wa Bibilia ũtũũro-inĩ wao.

Makĩria ma ũguo, gĩthomo kĩa Bibilia nĩ gĩteithagia andũ thĩinĩ wa famĩlĩ gũtĩana na kwaranĩria wega makĩria—harĩ arĩa mahikanĩtie o na aciari na ciana ciao, na gatagatĩ-inĩ ga ciana cio nyene. Macio nĩ maũndũ matũmaga famĩlĩ ĩgĩe na hinya. Famĩlĩ ciagĩa na hinya, igatũma matũũra namo magaacĩre.

Thutha wa gũthuthuria maũndũ marĩa maarĩrĩirio gĩcunjĩ-inĩ gĩkĩ-rĩ, wee ũkuona atĩa: Hihi Bibilia nĩ ĩtĩkanagia na arĩa matukanagia ũteti na ndini? Hatarĩ nganja, macokio nĩ; aca. No hihi Akristiano nĩ magĩrĩirũo gũkorũo marĩ raia ehokeku? Ĩĩ, nĩ magĩrĩirũo. Mangĩĩka ũguo atĩa? Na njĩra ya kũrũmĩrĩra uuge wa Jesu wa gũtuĩka o ta cumbĩ na ũtheri harĩ thĩ.

Arĩa merutanagĩria kũrũmĩrĩra ũtongoria ũcio wa Kristo nĩ marĩgunĩkaga o ene na famĩlĩ ciao—o na andũ a itũũra rĩao. Aira a Jehova a itũũra rĩanyu no makenere gũkũhe ũhoro makĩria wĩgiĩ mũtaratara wa gũthomithia andũ Bibilia ũrĩa ũrathiĩ na mbere itũũra-inĩ rĩanyu. a

[Kohoro ka magũrũ-inĩ]

 [Mbica karatathi ka 7]

Jesu eerutanagĩria kũgarũra ngoro cia andũ no ti mĩtabarĩre ya gĩũteti

 [Mbica karatathi ga 8]

Aira a Jehova metĩkĩtie atĩ magĩrĩirũo gũkorũo marĩ raia ehokeku