Wĩrute Kuumana na Kiugo Kĩa Ngai

Akristiano Mabatithagio Nĩkĩ?

Gĩcunjĩ gĩkĩ kĩrĩ na ciũria hihi wanoria na nĩ kĩronania harĩa ũngĩona macokio ma ciũria icio thĩinĩ wa Bibilia yaku. Aira a Jehova no makenere kwarĩrĩria macokio macio hamwe nawe.

1. Ũbatithio wa Gĩkristiano ũrũgamagĩrĩra kĩĩ?

Ũbatithio nĩ njĩra ya kũũria Ngai atwĩtĩkĩrie tũgĩe na ũkuruhanu mwega nake. Kwoguo, Mũkristiano agĩrĩirũo kũbatithio akinyia ũkũrũ wa kũhota kwĩruta ũhoro wĩgiĩ Ngai na gũtuĩka mũrutwo wa Jesu, no ti e kaana. (Atũmwo 8:12; 1 Petero 3:21) Tũtuĩkaga arutwo a Jesu, hĩndĩ ĩrĩa tweruta na tweka maũndũ marĩa aathanire.—Thoma Mathayo 28:19, 20.

Hĩndĩ ya arutwo a Jesu, andũ aingĩ mooyaga ikinya rĩa kwĩruta ũhoro wĩgiĩ Ngai na Jesu matekũmaĩrĩria. Kwa ngerekano, rĩrĩa mũndũ ũmwe aamenyire atĩ gĩkuũ kĩa Jesu nĩ kĩngĩahotithirie andũ kũhonoka, o hĩndĩ ĩyo no gũtuĩka aatuĩkire mũrutwo. Ũmũthĩ, andũ aingĩ a ngoro theru nĩ methuurĩire gũtuĩka arũmĩrĩri a Jesu.—Thoma Atũmwo 8:26-31, 35-38.

2. Jesu aabatithirio nĩkĩ?

Jesu aarĩ wa mĩaka ta 30 rĩrĩa Johana Mũbatithania aamũrikirie maĩ-inĩ rũĩ-inĩ rwa Jorodani. Ũbatithio wa Jesu woonanirie atĩ nĩ aatuĩte itua rĩa gwĩka wendi wa Ngai rĩrĩa eetĩkĩrire itemi rĩa gũkorũo arĩ Mesia. (Ahibirania 10:7) Ũmwe wa maũndũ marĩa angĩahingirie nĩ kũruta muoyo wake ũrĩ igongona nĩ ũndũ wa mehia ma andũ. O na mbere ya kuuma igũrũ oke gũkũ thĩ, Jesu aatũire endete na aathĩkagĩra Ithe, Jehova.—Thoma Mariko 1:9-11; Johana 8:29; 17:5.

 3. Mũkristiano agĩrĩirũo kũbatithio nĩkĩ?

Tũkoragwo tũrĩ ngũrani na Jesu, tondũ tũciaragwo twĩna mehia. Ĩndĩ, gĩkuũ kĩa Jesu kĩa igongona nĩ gĩtũhotithagia kũgĩa na ũkuruhanu mwega na Ngai. (Aroma 5:10, 12; 12:1, 2) Ũhoro wa ma nĩ atĩ, no kũhoteke tũkorũo tũrĩ andũ a famĩlĩ yake. (2 Akorintho 6:18) Tũngĩkinyĩra mweke ũcio atĩa? Kũgerera ihoya tũrĩ keheri-inĩ, nĩ twĩyamũragĩra Jehova, tũkehĩta atĩ tũrĩkaga wendi wake ũtũũro-inĩ witũ wothe. Thutha wa ihoya ta rĩu rĩa kwĩyamũrĩra Ngai, nĩ tũmenyithanagia wĩyamũrĩri ũcio kũrĩ andũ arĩa angĩ kũgerera ũbatithio.—Thoma Mathayo 16:24; 1 Petero 4:2.

4. Ũngĩĩhaarĩa atĩa nĩ ũndũ wa ũbatithio?

Aira a Jehova nĩ merutaga Bibilia na mũndũ o wothe ũngĩenda gũkuhĩrĩria Ngai. Kwĩruta Bibilia hamwe na gũthiĩ mĩcemanio ya Gĩkristiano nĩ gũkuongerera wendo na wĩtĩkio waku harĩ Ngai. Ningĩ nĩ gũgũgũteithia kũgĩa na mawoni na mĩtugo mĩega. Gũkũria wendo, wĩtĩkio, na ngumo ingĩ cia ũngai, nĩ gũgũgũteithia ũtũũre kũringana na mwĩhĩtwa waku wa gũtungatĩra Jehova tene na tene.—Thoma Johana 17:3; Ahibirania 10:24, 25.

Nĩgetha wone ũhoro makĩria, rora gĩcunjĩ gĩa 18 thĩinĩ wa ibuku rĩrĩ, rĩrĩa rĩcabĩtwo nĩ Aira a Jehova. Bibilia Ĩrutanaga Atĩa Kũna?