MŨTHENYA ũmwe mami aanjũririe ũũ: “Nĩ kĩĩ kĩragiria ũthathaiye maithe maitũ? Kaĩ ũtamenyaga atĩ nĩo matũmaga ũkorũo muoyo? Na githĩ ndwagĩrĩirũo nĩ kũmacokagĩria ngatho? Nĩ kĩĩ kĩratũma ũtiganĩrie ũndũire ũrĩa ũkoretwo ũkĩrũmĩrĩrũo nĩ njiarũa na njiarũa? Kwaga gũtĩa maithe maitũ no ũndũ ũmwe na kuuga atĩ ũthathayia witũ nĩ wa ũrimũ.” Arĩkia kuuga ciugo icio, akĩambĩrĩria kũrĩra.

Mĩeri ĩigana ũna mbere ĩyo, Aira a Jehova nĩ moorĩtie mami kana no ende kwĩruta Bibilia. Tondũ ndeendaga kwĩruta, aaregire na njĩra ya wara akĩmeera mandute arĩ niĩ. Nĩ akinyire handũ akĩrakara nĩ ũndũ wakwa kwĩruta Bibilia na tondũ hingo ciothe nĩ ndaamwathĩkagĩra, ndwarĩ ũndũ mũhũthũ kũmũkararia. O na kũrĩ ũguo, tondũ warĩ wendi wakwa gũkenia Jehova, ndingĩatigire gũthiĩ na mbere kwĩruta. Ndwarĩ ũndũ mũhũthũ, ĩndĩ Jehova nĩ aaheire hinya.

O ta andũ aingĩ thĩinĩ wa Japan, famĩlĩ itũ yarĩ ya ndini ya Buddha. Thutha wa kwĩruta Bibilia na Aira a Jehova mĩeri ĩĩrĩ nĩ ndamenyire biũ atĩ ũhoro ũrĩa ũrĩ thĩinĩ wa Bibilia nĩ wa ma. Rĩrĩa ndaamenyire atĩ Jehova nĩ Ithe witũ wa igũrũ, nĩ ndeendire mũno kũmũmenya makĩria. Kĩambĩrĩria-inĩ, nĩ twaragĩrĩria na mami maũndũ marĩa ndeerutaga. Ngĩcoka ngĩambĩrĩria gũthiaga mĩcemanio ya Kiumia Nyũmba-inĩ ya Ũthamaki. Rĩrĩa ndeerutire maũndũ maingĩ, ngĩĩra mami atĩ ndigũcoka kũnyitanĩra maũndũ-inĩ ma ndini ya Buddha. Ndamwĩra ũguo, mwerekera wake ũgĩcenjia o rĩmwe. Akĩnjĩra ũũ: “Nĩ kĩrumi gũkorũo na mũndũ ũtendete maithe maitũ thĩinĩ wa famĩlĩ.” Akĩnjĩra ndige kwĩruta Bibilia na gũthiaga mĩcemanio. Ndingĩeciririe atĩ mami mũnjiari no anjĩre ũndũ ta ũcio! Ndoonire ta atarĩ we.

Baba nĩ aanyitire mami mbaru. Nĩ ndeerutĩte thĩinĩ wa Aefeso 6 atĩ Jehova endaga njathĩkĩre aciari akwa. Tondũ nĩ ndeendaga gũcokia thayũ famĩlĩ-inĩ itũ, ngĩciria atĩ ndamathikĩrĩria o nao nĩ megũthikĩrĩria. Ihinda-inĩ rĩu nĩrĩo ndeeharagĩria nĩ ũndũ wa igeranio cia cukuru. Nĩ ũndũ ũcio, kwa ihinda rĩa mĩeri ĩtatũ ngĩtua itua rĩa gwĩka ũrĩa aciari akwa meendaga. Ĩndĩ ngĩĩra Jehova atĩ ihinda rĩu rĩathira nĩ ngwambĩrĩria gũthiĩ mĩcemanio rĩngĩ.

Itua rĩu rĩakwa rĩtiarĩ rĩega nĩ ũndũ wa maũndũ merĩ. Wa mbere, ndeeciragia atĩ o na thutha wa mĩeri ĩtatũ wendi wakwa wa gũtungatĩra Jehova ndũgakorũo ũnyihĩte. Ĩndĩ, wĩtĩkio wakwa harĩ Jehova wahoereire na ihenya mũno. Wa kerĩ, nĩ hĩndĩ mami na baba meerutanĩirie mũno kũnjiguithia atĩ ndige gũtungatĩra Jehova.

Thĩinĩ wa Nyũmba ya Ũthamaki nĩ ndacemanĩtie na aarĩ na ariũ a Ithe witũ aingĩ arĩa maaingagĩrĩrũo thĩinĩ wa famĩlĩ ciao. Nĩ maanjĩkagĩra ngoro atĩ Jehova nĩ ekũhe hinya. (Mat. 10:34-37) Maanjĩraga atĩ ingĩikara ndĩ mwĩhokeku harĩ Jehova, no kũhoteke andũ a famĩlĩ itũ merute ũhoro wa ma. Tondũ nĩ ndendaga kwĩhoka Jehova, ngĩambĩrĩria kũhoya na kĩyo.

Famĩlĩ itũ yahũthagĩra njĩra itiganĩte kũnyingĩrĩra. Rĩmwe na rĩmwe mami nĩ aathaithaga na akahe ihooto atĩ nĩgetha ndige kwĩruta Bibilia. Maita maingĩ no gũkira ndaakiraga. Rĩrĩa ndacokia ũndũ, kaingĩ no kũnegenania twanegenanagia, tondũ o mũndũ eendaga kuoneke nĩwe ũramenya. Rĩu nĩ nyonaga atĩ maũndũ mangĩakoragwo marĩ ngũrani korũo nĩ ndonagia mami atĩ nĩ ndĩrataũkĩrũo nĩ ũrĩa aaiguaga na ngahe wĩtĩkio wake gĩtĩo. Aciari akwa maaheaga mawĩra maingĩ nĩguo ndikoime mũciĩ. Rĩmwe na rĩmwe makahingĩrĩria nja kana makaaga kũndigĩra irio.

Mami nĩ aageragia kwĩra andũ angĩ manjiguithie. O na nĩ eerĩte mwarimũ witũ anjarĩrie, no ũndũ ũcio ndwarutire wĩra. Kũrĩ hĩndĩ mami aandwarire kũrĩ mũnene wake wĩra-inĩ nĩgetha anjiguithie atĩ ndini ciothe nĩ cia tũhũ. Ningĩ kũrĩ hĩndĩ aahũrĩire andũ a famĩlĩ citũ thimũ akĩrĩraga akĩmathaithaga mamũteithie. Ũndũ ũcio nĩ wanjiguithirie ũũru mũno. O na kũrĩ ũguo, ndathiĩ mĩcemanio, athuri a kĩũngano nĩ maandirikanagia atĩ rĩrĩa mami arera andũ angĩ maũndũ macio nĩ kũhunjia aramahunjĩria.

Aciari akwa nĩ meendaga thiĩ yunivasĩtĩ nĩguo ngona wĩra mwega. Tondũ ndwarĩ ũndũ mũhũthũ kwarĩrĩria ũndũ ũcio na njĩra ya thayũ, nĩ ndaamandĩkĩire marũa maigana ũna ngĩmataarĩria mĩoroto ĩrĩa ndaarĩ nayo ũtũũro-inĩ. Rĩrĩa baba aaiguire ũhoro ũcio nĩ aarakarire mũno.  Aanjĩrire ũũ: “Ũreciria atĩ nĩ ũkuona wĩra! Gũgĩkinyĩria rũciũ ũkorũo wonete wĩra, wakorũo ti ũguo uume gũkũ.” Nĩ ndaahoire Jehova andeithie igũrũ rĩgiĩ ũndũ ũcio. Mũthenya ũyũ ũngĩ ndĩ ũtungata-inĩ, aarĩ a Ithe witũ erĩ nĩ maanjũririe kana no thomithagie ciana ciao mathomo ma cukuru. Baba ndaakenire nĩ niĩ kuona wĩra na nĩ aatigire kũnjaragĩria kana gũtindanagĩra na niĩ. Mami oigire atĩ nĩ kaba nduĩke kĩmaramari handũ ha gũtuĩka Mũira wa Jehova.

Rĩmwe na rĩmwe nĩ ndarigagwo kana nĩ wendi wa Jehova njĩke maũndũ mũgarũ biũ na wendi wa aciari akwa. Ĩndĩ nĩ ũndũ wa kũhoya Jehova na gwĩcũrania maandĩko marĩa marĩtie ũhoro wa wendo wake, nĩ ndaahotire kũgĩa na mwerekera ũrĩa wagĩrĩire na ngĩtaũkĩrũo atĩ aciari akwa maanyingagĩrĩra nĩ ũndũ wa gũkorũo makĩnyendera maũndũ mega. Jehova nĩ aandeithirie kũrũnga mwĩcirĩrie wakwa na kũmenya makinya marĩa nguoya. Ningĩ o ũrĩa ndaathiaga na mbere na ũtungata wakwa noguo ndaũkenagĩra. Nĩ ũndũ ũcio ngĩigĩra muoroto wa gũtuĩka painia.

Rĩrĩa aarĩ a Ithe witũ amwe maamenyire atĩ nĩ ndĩrenda gũtuĩka painia, maanjĩrire nyambe njeterere aciari akwa mahorere. Nĩ ndaahoire Jehova ahe ũũgĩ, ngĩka ũthuthuria, ngĩthuthuria muoroto wakwa wa kwenda gũtuĩka painia, na ngĩaria na aarĩ na ariũ a Ithe witũ arĩa agimaru kĩĩroho. Ngĩona atĩ wendi wakwa nĩ gũkenia Jehova. Ningĩ nĩ ndaamenyaga atĩ to mũhaka aciari akwa mangĩacenjirie mwerekera wao atĩ tondũ nĩ ndaiga mũhohio itua rĩakwa rĩa gũtuĩka painia.

Mwaka wakwa wa mũico thĩinĩ wa cukuru ya sekondarĩ ngĩambĩrĩria ũpainia. Thutha wa gũtungatĩra ndĩ painia ihinda rĩna nĩ ndeeigĩire muoroto wa gũthiĩ gũtungatĩra icigo-inĩ iria ciarĩ na bata mũnene wa ahunjia. Ĩndĩ mami na baba matiendaga nyume mũciĩ. Nĩ ũndũ ũcio ngĩamba gweterera nginyie mĩaka 20. Ningĩ nĩguo mami ndagatangĩke mũno, ngĩhoya wabici ya rũhonge ĩreke thiĩ gĩcigo-inĩ kĩmwe mwena wa mũhoro wa Japan kũrĩa kwarĩ na andũ a famĩlĩ citũ.

Gĩcigo-inĩ kĩu nĩ ndaahotire gũteithia andũ maigana ũna matuĩke ndungata cia Jehova. Ningĩ nĩ ndeerutire Gĩthũngũ nĩguo hote kwandandũra ũtungata wakwa. Kĩũngano-inĩ kĩrĩa ndaarĩ kwarĩ na ariũ a Ithe witũ erĩ maarĩ mapainia a mwanya. Tondũ nĩ ndonaga ũrĩa maarĩ na kĩyo na ũrĩa maateithagia andũ, ngĩĩigĩra muoroto wa gũtuĩka painia wa mwanya. Ihinda-inĩ rĩu mami nĩ aarwarire mũno maita merĩ. Maita macio merĩ nĩ ndainũkaga nĩgetha ngamũtumberie. Ũndũ ũcio nĩ wamũgegirie na nĩ ũndũ ũcio agĩthiĩ agĩcenjagia mwerekera wake.

Thutha wa mĩaka mũgwanja, nĩ ndaanyitire marũa kuuma kũrĩ Atsushi, ũmwe wa mapainia a mwanya arĩa ngwarĩtie ũhoro wao. Nĩ eeciragia kũhikania na nĩ ũndũ ũcio nĩ eendaga kũmenya kana no ndĩmũhikĩre. Gũtirĩ hĩndĩ ndoimĩte ndĩcirĩtie ũhoro wa Atsushi, na ndioigaga atĩ o nake nĩ eeciragia ũhoro wakwa. Thutha wa mweri ũmwe nĩ ndamũcokeirie marũa na ngĩmwĩra no nyende tũmenyane makĩria. Nĩ tuonire atĩ maũndũ maingĩ maitũ nĩ maahanaine tondũ muoroto witũ o ithuerĩ warĩ gũthiĩ na mbere ũtungata-inĩ wa hĩndĩ-ciothe na gũtungatĩra handũ o hothe harĩa tũngĩatũmirũo. Macũngĩrĩro-inĩ nĩ twahikanirie. Nĩ ndakenire mũno kuona mami na baba na andũ angĩ a famĩlĩ citũ ũhiki-inĩ witũ.

Thutha wa kahinda kanini o tũrĩ thĩinĩ wa ũpainia wa hĩndĩ ciothe, Atsushi nĩ aatuĩkire mũrori wa mũthiũrũrũko wa gũteithĩrĩria. Ihinda rĩtarĩ kũraihu, nĩ tuonire irathimo makĩria. Nĩ  twatuĩkire mapainia a mwanya na thutha ũcio tũkĩambĩrĩria gũtungata wĩra-inĩ wa gũceerera ciũngano. Thutha wa kũrĩkia gũceerera ciũngano ciothe mũthiũrũrũko-inĩ witũ riita rĩa mbere, nĩ twahũrĩirũo thimũ kuuma wabici-inĩ ya rũhonge. Tũkĩũrio kana no twĩtĩkĩre gũthiĩ bũrũri-inĩ wa Nepal gũceeragĩra ciũngano.

Nĩ ndaarigirũo ũrĩa aciari akwa mangĩamũkĩrire ũhoro ũcio wa gũthiĩ kũndũ kũraya ũguo. Nĩ ũndũ ũcio ngĩmahũrĩra thimũ nĩguo ndĩmamenyithie. Baba anjĩrire ũũ: “Kũu nĩ kũndũ kwega mũno.” Kiumia kĩmwe mbere ĩyo nĩ aaheetwo ibuku nĩ mũratawe rĩaragia ũhoro wa Nepal, na nĩ onete atĩ nĩ kũndũ kwega angĩenda gũthiĩ gũceera.

Nĩ twakenaga mũno tũgĩtungatĩra Nepal tondũ andũ a kũu nĩ mendete andũ mũno. Thutha ũcio mũthiũrũrũko witũ nĩ waandandũrirũo nginya Bangladesh. O na gũtuĩka Bangladesh nĩ gũkuhĩ na Nepal nĩ kũndũ ngũrani mũno. Tweyonagĩra maũndũ matiganĩte ũtungata-inĩ. Thutha wa mĩaka ĩtano nĩ twatũmirũo rĩngĩ Japan kũrĩa tũtungataga o wĩra-inĩ wa mũthiũrũrũko.

Gũtungatĩra thĩinĩ wa Japan, Nepal, na Bangladesh nĩ kũndutĩte maũndũ maingĩ mũno megiĩ Jehova. O bũrũri o bũrũri nĩ ũrĩ maũndũ na ũndũire wa kuo. Na thĩinĩ wa mabũrũri macio o mũndũ nĩ ngũrani na ũrĩa ũngĩ. Nĩ ndĩyoneire ũrĩa Jehova arũmbũyagia andũ ake marĩ mũndũ ũmwe ũmwe, akametĩkĩra, akamateithia, na akamarathima.

Niĩ mwene Jehova nĩ andathimĩte na njĩra ya kũndeithia ngĩe na ũmenyo wake, akahe wĩra wa kũruta, na akahe mũthuri mwega. Ningĩ nĩ andeithĩtie gũtua matua marĩa magĩrĩire na rĩu ndĩ na ũkuruhanu mwega hamwe nake na famĩlĩ itũ. Nĩ njokagĩria Jehova ngatho mũno tondũ rĩu tũrĩ na mami tũkoragwo tũrĩ arata. Nĩ ngenaga mũno nĩ kuona nĩ ndaiguanire na Ngai na ngĩiguana na mami.