NDAKINYIA mĩaka kenda nĩ ndaatigire kũraiha. Rĩu ndĩna mĩaka 43, na ũraihu wakwa nĩ fiti ithatũ. Hĩndĩ ĩrĩa aciari akwa moonire atĩ ndingĩraiha hangĩ, nĩ maanjĩkĩrire ngoro ndute wĩra na kĩyo nĩguo ndigatindage ngĩĩciria ũrĩa haana. Nĩ ndaigire gathoko ka matunda hakuhĩ na nyũmba itũ na nĩ ndageragia mũno kũbanga matunda na njĩra ĩragucĩrĩria. Ũndũ ũcio nĩ watũmaga ngĩe na agũri aingĩ.

O na kũrĩ ũguo, kũruta wĩra na kĩyo gũtiacenjirie maũndũ mothe. Ndaarĩ mũkuhĩ mũno na nĩ ndaagiĩkaga ngĩĩka nginya maũndũ marĩa manini, ta gũkinyĩra ndirica ya nduka nĩgetha nyenderio kĩndũ. Ndoonaga maũndũ mothe ta maathondeketwo nĩ ũndũ wa andũ arĩa araihu. Nĩ ndeeiguagĩra tha mũno, no ũndũ ũcio nĩ wacenjirie ndĩna mĩaka 14.

Mũthenya ũmwe atumia erĩ Aira a Jehova nĩ mookire kũgũra matunda, na makĩambĩrĩria kwĩruta Bibilia na niĩ. Thutha wa kahinda o kanini, nĩ ndaamenyire atĩ kũmenya Jehova na muoroto wake nĩ kwa bata mũno gũkĩra ũrĩa haana. Ũndũ ũcio nĩ wandeithirie mũno. Nĩ ndaakenirio mũno nĩ rĩandĩko rĩa Thaburi 73:28. Gĩcunjĩ kĩa mbere kĩa rĩandĩko rĩu kiugaga ũũ: “Gũkuhĩhĩria Ngai, nĩkuo kũnjagĩrĩire.”

Famĩlĩ itũ nĩ yathamire Côte d’Ivoire ĩgĩthiĩ Burkina Faso, ũndũ ũrĩa wacenjirie ũtũũro wakwa mũno. Hĩndĩ ĩrĩa twaikaraga Côte d’Ivoire, andũ arĩa twarigainie nao nĩ maamenyerete kũnyona harĩa ndendagĩria matunda. No rĩu kũu ndaarĩ mũgeni, na andũ matiamenyerete kũnyona. Andũ maatindaga manjĩndoreire. Ũndũ ũcio watũmaga ndũũre ndĩhingĩire nyũmba kwa ihinda rĩa ciumia nyingĩ. Ngĩcoka ngĩririkana ũrĩa arĩ ũndũ mwega gũkuhĩrĩria Jehova. Nĩ ndaandĩkĩire wabici ya rũhonge ya Aira a Jehova na makĩndũmĩra mũndũ ũrĩa wanjagĩrĩire biũ. Aarĩ mwarĩ wa Ithe witũ mũmishonarĩ wetagwo Nani, na nĩ aarĩ na gatuthi.

Barabara cia gwitũ ciakoragwo irĩ ndenderũ, na hĩndĩ ya mbura igakorũo na ndoro mũno. Maita maingĩ Nani nĩ aagũaga na gatuthi gake agĩũka gũthomithia, no ũndũ ũcio ndwamũragaga ngoro. Mũthenya ũmwe nĩ eerutĩire kũndwara mĩcemanio. Ngĩmenya atĩ rĩu no mũhaka ingĩoimire nja na ngorũo ndĩharĩirie kwĩrorerũo nĩ andũ. Makĩria ma ũguo, gũkuuo nĩ Nani gatuthi-inĩ gake, nĩ kũngĩakongereire ũritũ makĩria na ũndũ ũcio nĩ ũngĩatũmire agiĩke agĩgatwarithia. O na kũrĩ ũguo, nĩ ndeetĩkĩrire gũthiĩ nake mĩcemanio, nĩ ũndũ wa kũririkana gĩcunjĩ gĩa kerĩ kĩa rĩandĩko rĩrĩa nyendete mũno: “Mwathani Jehova nowe nduĩte irahĩro rĩakwa.”

 Tũrĩ na Nani nĩ harĩ hĩndĩ twagũire ndoro-inĩ, no tondũ nĩ tweendete mĩcemanio, tũkĩĩrutanĩria gũkinya kuo. Nĩ ndoonire ngũrani nene mũno thĩinĩ wa Nyũmba ya Ũthamaki tondũ andũ maanyonagia wendo handũ ha kũnjĩndorera ũrĩa ndeeroragĩrũo na kũu nja. Mĩeri kenda thutha ũcio, nĩ ndaabatithirio.

Gĩcunjĩ kĩa mũico kĩa rĩandĩko rĩu nyendete mũno kiugaga: “Mawĩko maku mothe ndĩkĩmaganage.” Nĩ ndaamenyaga atĩ nĩ ingĩacemanirie na moritũ ũtungata-inĩ. No ndirikanaga riita rĩakwa rĩa mbere rĩrĩa ndaathire kũhunjia nyũmba kwa nyũmba. Andũ agima na ciana maanjĩndoragĩra, makanũmĩrĩra, na makegerekania na ũrĩa ndĩrathiĩ. Ũndũ ũcio nĩ wanjiguithagia ũũru mũno, ĩndĩ nĩ ndaikaraga ngĩĩririkanagia atĩ andũ acio o nao nĩ maabataraga Paradiso o ta ũrĩa o na niĩ ndaamĩbataraga, kwoguo ngĩhota gũkirĩrĩria.

Nĩguo hũthahũthĩrũo nĩ maũndũ, nĩ ndacaririe mũithikiri wa magũrũ matatũ wa gũcocerũo na moko. Ũrĩa twagaywo nake ũtungata-inĩ, nĩ aandindĩkaga rĩrĩa tũrambata handũ agacoka akahaica mũithikiri twatua gũikũrũka. O na gũtuĩka kĩambĩrĩria-inĩ nĩ ndoonaga kũhunjia arĩ ũndũ mũritũ, thutha wa kahinda nĩ ndaambĩrĩirie gũkenera mũno nginya ngĩtuĩka painia wa hĩndĩ ciothe mwaka wa 1998.

Nĩ ndeerutaga na andũ aingĩ Bibilia, na ana harĩ arutwo acio nĩ maabatithirio. Ningĩ mwarĩ wa maitũ ũmwe nĩ eetĩkĩrire ũhoro wa ma. Kũigua ũrĩa arĩa angĩ marathiĩ na mbere, nĩ kwanjĩkĩraga hinya mũno kaingĩ hĩndĩ ĩrĩa nguĩte ngoro. Mũthenya ũmwe ndĩ mũrwaru malaria nĩ ndaamũkĩrire marũa kuuma Côte d’Ivoire. Marũa macio maaragia ũhoro wa mũrutwo ũmwe wa yunivasĩtĩ ndaambĩrĩirie kwĩruta Bibilia nake bũrũri-inĩ wa Burkina Faso ngĩcoka ngĩmũneana kũrĩ mũrũ wa Ithe witũ. Mũrutwo ũcio nĩ aacokire agĩthamĩra Côte d’Ivoire. Nĩ ndaakenire mũno kũmenya atĩ nĩ aatuĩkĩte mũhunjia ũtarĩ mũbatithie.

No hotaga kuona mabataro makwa ma o mũthenya. Na njĩra ĩrĩkũ? Ithondeka rĩmwe rĩteithagĩrĩria andũ arĩa marĩ na wathe wa mwĩrĩ nĩ rĩandutire gũtuma. Mũrutani ũmwe nĩ oonire mũrutĩre wakwa wa wĩra na akiuga: “Nĩ tũgũkũruta gũthondeka thabuni.” Na makĩnduta gũthondeka thabuni. Rĩu ũcio nĩguo wĩra ũrĩa ndutaga. Andũ nĩ mendete thabuni ũrĩa thondekaga na nĩ meragĩra arĩa angĩ maũgũre. Nĩ ndĩmatwaragĩra thabuni ngĩhũthĩra gatuthi ka magũrũ matatũ.

Ũndũ wa kĩeha nĩ atĩ mwaka wa 2004 nĩ ndaatigire ũpainia nĩ ũndũ wa gũtuuragũo nĩ mũgongo. O na kũrĩ ũguo, no nyitanagĩra biũ wĩra-inĩ wa kũhunjia.

Andũ moigaga atĩ njũĩkaine mũno nĩ ũndũ wa gĩkeno gĩakwa. Ndĩna itũmi nyingĩ cia gũkorũo na gĩkeno tondũ gũkuhĩrĩria Ngai, nĩkuo kũnjagĩrĩire. —Ta ũrĩa rũheanĩtwo nĩ Sarah Maiga.